"გეოპოლიტიკური სიტუაციიდან გამომდინარე, საქართველო მიიღებს კანდიდატის სტატუსს" - რიკარდ იოზვიაკი
"ვფიქრობ, რომ საქართველო საბოლოოდ მიიღებს ევროკავშირის კანდიდატის სტატუსს - არა იმიტომ, რომ ხელისუფლება ამას იმსახურებს, არამედ იმიტომ, რომ ეს არის დღევანდელი პოლიტიკური ვითარება ევროპაში. ევროკავშირს ესმის, რომ ეს არის გეოპოლიტიკური გადაწყვეტილება და საქართველო არ უნდა დარჩეს ამ პროცესისგან განცალკევებული“, - ამის შესახებ "რადიო თავისუფლების" ევროპის ბიუროს რედაქტორმა, რიკარდ იოზვიაკმა განაცხადა.
- მისი თქმით, ევროკავშირს არ სურს გაღრმავდეს უფსკრული ერთი მხრივ საქართველოსა და მეორე მხრივ, მოლდოვა-უკრაინას შორის.
იოზვიაკის მოლოდინით, წლის ბოლოს ევროკავშირი სამივე შემთხვევაში დადებით გადაწყვეტილებას მიიღებს, თუმცა საქართველოს დამატებითი პირობები წარედგინება.
"ევროკომისია ყოველთვის ხაზს უსვამს, რომ კანდიდატის სტატუსი ეფუძნება დამსახურებას, აკვირდებიან რეკომენდაციების შესრულებას და ამის საფუძველზე იღებენ გადაწყვეტილებას. დიახ, ეს არის დამსახურებაზე დაფუძნებული გადაწყვეტილება, ისევე როგორც პოლიტიკური გადაწყვეტილება“, - ამბობს იოზვიაკი.
იოზვიაკის ინფორმაციით, 31 ოქტომბერს ევროკომისია გამოაქვეყნებს ანგარიშს გაფართოების შესახებ, რომელიც შეაფასებს, თუ როგორ შეასრულა საქართველომ ევროკავშირის 12 რეკომენდაცია.