"რას იწყევლები, კაცი ხარ თუ ადამიანი. იარე შენ მაგ სიმართლით" - პარლამენტში მეძმარიაშვილი და ხაბარელი ერთმანეთს ლუკა კურტანიძის გამო დაუპირისპირდნენ
სპორტისა და ახალგაზრდულ საკითხთა კომიტეტის სხდომაზე ერთმანეთს სიტყვიერად დაუპირიპირდნენ კომიტეტის თავმჯდომარის მოადგილე ირაკლი მეძმარიაშვილი და კომიტეტის წევრი შოთა ხაბარელი. მეძმარიაშვილმა გააკრიტიკა ოლიმპიური კომიტეტი ლუკა კურტანიძის ბრალდებების თაობაზე გავრცელებული განცხადების გამო.
ცნობისთვის:
- რამდენიმე დღის წინ ჭიდაობის ეროვნული ფედერაციის საანგარიშო ყრილობაზე მომხდარ ინციდენტს, რა დროსაც ხელმძღვანელობამ ცნობილ სპორტსმენს ლუკა კურტანიძეს კარისკენ მიუთითა, საქართველოს ეროვნული ოლიმპიური კომიტეტი სპეციალური განცხადებით ეხმაურება. ვრცელი პოსტი, რომელიც კომიტეტის ოფიციალურ გვერდზე გამოქვეყნდა, საკმაოდ კრიტიკულია ფედერაციის ამჟამინდელი ხელმძღვანელობის მიმართ და მხარდაჭერას უცხადებს ლუკა კურტანიძეს.
ხაბარელმა მეძარიაშვილი ვითარების გამწვავების გამო გააკრიტიკა.
"კორექტული იყო ფედერაციაც, ოლიმპიური კომიტეტიც, თქვენ გამოსვლით ძაბავთ სიტუაციას..." - უთხრა ხაბარელმა მეძმარიაშვილს, თავის მხრივ, მეძმარიაშვილმა კი მიუგო: "მაგ სიმართლით იარეთ თქვენ". ამის პასუხად ხაბარელმა მეძმარიაშვილს მოუწოდა, წყევლისგან თავი შეეკავებინა.
"რას იწყევლები, კაცი ხარ თუ ადამიანი. იარე შენ მაგ სიმართლით" - განაცხადა ხაბარელმა.
შეგახსენებთ, რომ ყრილობაზე მომხდარ ინციდენტზე ლუკა კურტანიძემ სოციალურ ქსელში თავად ისაუბრა. ჩემპიონი წერდა, რომ ჯერ პრეზიდენტმა გეგა გეგეშიძემ მიანიშნა, რომ იქ ზედმეტი იყო... შემდეგ კი გენერალურმა მდივანმა უთხრა, რომ მას ყრილობაზე დასწრების უფლება არ ჰქონდა და კარისკენ მიუთითა.
ასევე იხილეთ:
- "იქ შეკრებილი საზოგადოების თვალწინ ზურგი შეაქციეს და კარისკენ მიუთითეს" - საქართველოს ეროვნული ოლიმპიური კომიტეტი ლუკა კურტანიძეს ექომაგება
- "ჯერ გეგა გეგეშიძემ მიმანიშნა, რომ იქ ზედმეტი ვიყავი, შემდეგ კი კარისკენ მიმითითეს.... ძალიან დავმცირდი, მეტკინა და წამოვედი" - რა წერს ლუკა კურტანიძე ჭიდაობის ფედერაციაში მომხდარ ამბავზე?