შთამბეჭდავი კადრები ფარავნის ტბიდან, სადაც განბანვის რიტუალი შესრულდა - მომლოცველების ემოციები AMBEBI.GE-ს ფოტორეპორტაჟში
მართლმადიდებელი ეკლესია დღეს, ნათლისღების დღესასწაულს აღნიშნავს. ამასთან დაკავშირებით ტაძრებში წირვა-ლოცვა ჩატარდება.
ნათლისღების დღესასწაულზე ტაძრებში წყალკურთხევის წესი სრულდება, მსახურების ბოლოს მორწმუნეებს ნაკურთხი წყლის სახლში წაღება შეუძლიათ.
საეკლესიო სწავლებით, ნაკურთხ წყალს უფლის მიერ კურთხეული მდინარე იორდანეს მადლი ენიჭება და უხრწნელ თვისებებს იძენს. მორწმუნეებს მისი მიღება უზმოზე შეუძლიათ, განსაკუთრებით – ავადმყოფობისა და განსაცდელების დროს.
- ნათლისღების დღესასწაული თორმეტ საუფლო დღესასწაულს შორის ერთ-ერთია. სხვაგვარად ამ დღეს ღვთის გამოცხადების დღესასწაულს უწოდებენ, რადგან ყოვლადწმინდა სამება გაცხადდა. ყოველი წლის ამ დღეს მდინარე იორდანე აღმა იწყებს სვლას, როდესაც იერუსალიმის პატრიარქი მდინარეში სამჯერ ჯვარს გადააგდებს, როგორც ეს მოხდა უფლის მდინარეში ჩასვლის დროს.
უკვე რამდენიმე წელია საქართველოში ამ დღეს მორწმუნეები ტრადიციული რიტუალით აღნიშნავენ რამდენიმე რეგიონში. ფოკის მამათა მონასტერში ნათლისღების სადღესასწაულო ლიტურგიის შემდეგ მომლოცველები ფარავნის გაყინულ ტბაში ჯვრის ფორმას ჭრიან, წყალში ჩადიან და ამის შემდეგ ხდება განბანა. ტრადიცია არც წელს დარღვეულა.
გთავაზობთ "ინტერპრესნიუსის" ფოტორეპორტიორის გიორგი ჟამერაშვილის ფოტორეპორტაჟს ფარავნის გაყინული ტბიდან:
