"სოსო აღარ არის" - გარდაიცვალა მსახიობი და ყოფილი დეპუტატი, სოსო ჯაჭვლიანი

65 წლის ასაკში გარდაიცვალა მსახიობი, რეჟისორი, სპორტსმენი და ყოფილი დეპუტატი, სოსო ჯაჭვლიანი. ამის შესახებ ინფორმაცია Ambebi.ge-ს მისმა ახლობლებმა დაუდასტურეს.

"მეუღლეს ვესაუბრე თურქეთში და მითხრა, რომ აღარ არის", - გვითხრა ოჯახის ახლობელმა, ხათუნა მიქაცაძემ.

როდის ჩამოასვენებენ მსახიობს სამშობლოში და სხვა დეტალები ამ დროისთვის უცნობია.

ცნობისთვის, ჯაჭვლიანი დიდი ხანია მძიმე სენს ებრძოდა. ის სამკურნალოდ თურქეთში წაიყვანეს. მეგობრები ამბობდნენ, რომ თავს უკეთ გრძნობდა, თუმცა როგორც ჩანს, დაავადებას ვერ მოერია.

სოსო ჯაჭვლიანი 1958 წლის 5 ივნისს, მესტიაში დაიბადა.

1978 წელს დაამთავრა საქართველოს სახელმწიფო ფიზიკური კულტურის ინსტიტუტი, ხოლო 1991 წელს შოთა რუსთაველის სახელობის საქართველოს სახელმწიფო თეატრალური ინსტიტუტის კინოსარეჟისორო ფაკულტეტი. იყო შოთა რუსთაველის სახელობის თეატრალური უნივერსიტეტის რეჟისორი, საერთაშორისო კინოფესტივალების ჯილდოების მფლობელი, კინოსტუდია "ქართული ფილმის“ სამეთვალყურეო საბჭოს თავმჯდომარე, საქართველოს მკლავჭიდის ფედერაციის პრეზიდენტი, მსოფლიოს და ევროპის ჩემპიონი მკლავჭიდში. 2012-2016 წლებში იყო საქართველოს მე-8 მოწვევის პარლამენტის წევრი (თბილისის, გლდანის მაჟორიტარი), საარჩევნო ბლოკიდან "ბიძინა ივანიშვილი - ქართული ოცნება“.

შესრულებული აქვს არაერთი კინოროლი. განსაკუთრებული პოპულარობა მოუტანა თენგიზ აბულაძის "ნატვრის ხეში" გედიას როლმა.

ასევე გადაღებული აქვს არაერთი ფილმი.