კოსმოსური ტექნოლოგია მაღალ მოდაში - შექმნეს ჩანთა, რომლის მასალის 99% ჰაერია
4 მარტს, ფრანგული ბრენდის, "კოპერნის“ ჯგუფმა თაყვანისმცემლებს ახალი ჩანთის დიზაინი გაუზიარა და გაუმხილა მისი შემადგენლობა: "Air Swipe ჩანთა დამზადებულია 99% ჰაერისგან და 1% მინისგან.”
ჩანთა დამზადებულია NASA- ს სილიციუმის აეროგელის ნანო მასალისგან, რომელიც ადრე გამოიყენებოდა მხოლოდ ვარსკვლავური მტვრის დასაჭერად და მარსის როვერის იზოლაციისთვის, მაგრამ დღესდღეობით უმაღლესმა მოდამ მას ახალი ფუნქცია უპოვა.
აღნიშნული მოდელი, რომელსაც ასევე მოიხსენიებენ, როგორც Air Swipe Bag-ს, დამზადებულია ერთ-ერთი ყველაზე მსუბუქი მასალისგან, მისი წონა 33 გრამს შეადგენს.
მაგრამ მიუხედავად იმისა, რომ ის არაპრაქტიკულად გამოიყურება, კოპერნი ამტკიცებს, რომ ის არა მხოლოდ ლამაზია, მასში თავისუფლად შეიძლება მობილურის მოთავსება და ტარება, მაგრამ ამ კომენტარის მიუხედავად, სოციალურ ქსელებში მოდის თაყვანისმცემლები სკეპტიკურად უყურებენ ამ საკითხს.
საზოგადოებაში უამრავი კითხვა გაჩნდა:
- “რისი ტარება შეიძლება ასეთ პატარა ჩანთით?“
- "რომ დავარდეს, დაიმსხვრევა?“
- "ასრულებს თუ არა თავის ფუნქციას?“
კომპანიამ საზოგადოების კითხვები უპასუხოდ არ დატოვა და ერთ-ერთ კომენტარს ასე უპასუხა:
- “იმის მიუხედავად, რომ ჩანთა ღრუბელს ჰგავს, ის უპრობლემოდ ასრულებს საკუთარ დანიშნულებას, მასში თავისუფლად ეტევა მობილური ტელეფონი“.
შესაბამისად, თუ iPhone 15 Max იწონის 221 გრამს, ეს იმას ნიშნავს, რომ ჩანთა თავის წონაზე ექვსჯერ მეტს იტევს. წყარო
- მოამზადა ანასტასია შალიკაშვილმა