26 წლის ასაკში გაჩენილი ინტერესი და წარმატებული საქმიანობა ტექნოლოგიებში - პროექტი, რომელმაც მარიამ ნონიკაშვილი მიზნამდე მიიყვანა

21-ე საუკუნეში მსოფლიო და მათ შორის, საქართველო ებრძვის სტერეოტიპს, რომ ტექნოლოგიები მამაკაცების მიმართულებაა და ქალები ამ საქმეში ძლიერები არ არის. თუმცა არსებობს უამრავი ქალი, რომლებიც ტექნოლოგიებში ძალიან წარმატებულები არიან. არაერთი დიდი ტექნოლოგიური გამოგონების ავტორიც სწორედ ქალია.

ეს ყველაფერი რომ სტერეოტიპებია და მეტი არაფერი, 29 წლის მარიამ ნონიკაშვილის ისტორიაც დაგარწმუნებთ. მან 26 წლის ასაკში დაიწყო ვებ დეველოპმენტის შესწავლა და დღეს პროექტში „კოდინგის სკოლა 1500 ქალისთვის“ მონაწილეობის შედეგად გუნდთან ერთად ქმნის ვებპორტალს BTU-ს პარტნიორისთვის European Energy Efficiency towards Mutually Reinforcing Partnership with Georgia, Azerbaijan and Ukraine პროექტის ფარგლებში. უფრო ახლოს გაგაცნობთ Full-stack დეველოპერ მარიამ ნონიკაშვილს.

მარიამ, როგორ მოხდა თქვენი ტექნოლოგიებთან დაკავშირება?

ჩემი ტექნოლოგიებით დაინტერესება გამოიწვია ცნობისმოყვარეობამ. ყოველთვის მაინტერესებდა, თუ რა ხდებოდა დიდი აპლიკაციების მიღმა და როგორ მუშაობდნენ ის სერვისები, რასაც ყოველდღიურად ვიყენებთ. ამ ინტერესმა მიბიძგა, რომ 26 წლისას დამეწყო ვებ დეველოპმენტის შესწავლა.

თქვენი გამოცდილებით, რამდენად რთულია გოგოსთვის ისწავლოს და დასაქმდეს ტექნოლოგიების მიმართულებით?

როგორც ნებისმიერ სფეროში, ტექნოლოგიების მიმართულებითაც, წარმატების მისაღწევად საჭიროა ბევრი შრომა და დისციპლინა. ვფიქრობ, სქესს არ აქვს მნიშვნელობა იმდენად, რამდენადაც გარემო ხელშემწყობ პირობებს. თუ გაქვს კომპიუტერი და ინტერნეტი, ყველგან შეგიძლია ისწავლო, განვითარდე და იმუშაო.

ეს სფერო ყოველდღიურად ვითარდება და პროგრამისტებს გვიწევს ფეხი ავუწყოთ ამ პროცესებს. ასე რომ, მუდმივად გამოწვევების წინაშე ვდგავართ.

ამ მიმართულებით განვითარებაში დაგეხმარათ BTU-ს პროექტი „კოდინგის სკოლა 1500 ქალისთვის“. მოგვიყევით პროექტის შესახებ

მქონდა მოლოდინი, რომ BTU-გან შემოთავაზებული პროექტი იქნებოდა შედეგზე ორიენტირებული და ამ კურსზე დამხვდებოდა პროფესიონალი ლექტორი. კურსის განმავლობაშიც და მისი დასრულების შემდგომაც, უნივერსიტეტის საორგანიზაციო გუნდის დიდ მხარდაჭერას ვგრძნობ ჩემი კარიერული განვითარებისთვის. ამის მაგალითია ის პროექტიც, რომელშიც წარმატებული კურსდამთავრებულები ჩაგვრთეს. მაქვს არაერთი სამსახურის შემოთავაზება. რაც ძალიან მნიშვნელოვანია და რითაც გამოირჩევა ეს პროექტი, არის უწყვეტი ნეთვორქინგისა და მენტორშიპის პროგრამა, რომელიც ახლაც გრძელდება.

რას ურჩევთ გოგოებს, რომლებსაც ტექნოლოგიების მიმართულებით განვითარება სურთ და სტერეოტიპების ეშინიათ?

ვურჩევ, იყვნენ გაბედულები და შეუპოვრები. საკუთარ თავზე, რაც შეიძლება მეტი იმუშაონ და შედეგს ყოველდღიურად დაინახავენ. ასევე, ვეტყვი, რომ არ გამოტოვონ BTU-სგან შემოთავაზებულ პროექტებში მონაწილეობის შანსი. ის ცოდნა, მენტორშიფი და ნეთვორქინგი, რასაც აქ მიიღებენ, წარმატების მიღწევაში დაეხმარებათ.

R