ისრაელის დიდი შურისძიება: მორიგ თავდასხმას "ჰამასის" ლიდერის სამი შვილი ემსხვერპლა - რა არის ცნობილი ისმაილ ჰანიესა და მისი ვაჟების მდიდრულ ცხოვრებაზე?
ისრაელმა ღაზის ჩრდილოეთით მდებარე შატის ლტოლვილთა ბანაკზე საჰაერო თავდასხმა განახორციელა. შედეგად "ჰამასის" ლიდერის ისმაილ ჰანიეს სამი შვილი და სამი შვილიშვილი დაიღუპა. ჰანიემ ოჯახი წევრების გარდაცვალება Al Jazeera-სთვის მიცემულ ინტერვიუში დაადასტურა.
"მოწამეების სისხლითა და ტკივილით ჩვენ ვქმნით იმედს, ვქმნით მომავალს, ვქმნით დამოუკიდებლობასა და თავისუფლებას ჩვენი ხალხისა და ჩვენი ერისთვის“, - განაცხადა ჰანიემ და აღნიშნა, რომ თავდასხმის დროს, მისი შვილები ლტოლვილთა ბანაკში ნათესავებს სტუმრობდნენ.
- ვინ არის ისმაილ ჰანიე?
ის პალესტინის ეროვნული ადმინისტრაციის მე-3 პრემიერ-მინისტრი იყო 2006-2007 წლებში.
ისმაილ აბდელ სალამ ჰანია, მეტსახელად აბუ ალ-აბდი, 1963 წელს დაიბადა ღაზის სექტორში განთავსებულ შატის ლტოლვილთა ბანაკში, სწავლობდა გაეროს სკოლებში, რომლებიც ლტოლვილებისთვისაა განკუთვნილი. 1987 წელს დაამთავრა ისლამური უნივერსიტეტის არაბისტიკის ფაკულტეტი. მოგვიანებით დაუახლოვდა "ჰამასის" დამფუძნებელს, შეიხ აჰმედ იასინს. ისმაილ ჰანია დაქორწინებულია და ჰყავს 13 შვილი.
2006 წლის 16 თებერვალს "ჰამასმა" ჰანია პალესტინის პრემიერ მინისტრად დანიშნა. ერთი წლის შემდეგ, პალესტინის ეროვნული ხელისუფლების პრეზიდენტმა მაჰმუდ აბასმა ჰანიეს მთავრობა დაითხოვა, მაგრამ "ჰამასმა" ეს გადაწყვეტილება არალეგიტიმურად გამოაცხადა და მინისტრთა კაბინეტმა მუშაობა გააგრძელა. აშშ-ს სახელმწიფო დეპარტამენტმა ჰანიე ტერორისტად გამოაცხადა.
- ისმაილ ჰანიე ყველაზე მდიდარია "ჰამასის" ლიდერებს შორის. მან ერთ დროს პირობაც კი დადო, რომ მხოლოდ ზეითუნის ზეთსა და ზა'ათარის სანელებლებზე იცხოვრებდა.
61 წლის ჰანია 2019 წლიდან მიმალვაშია. ის 13 შვილის მამაა და ყატარსა და თურქეთში ძვირადღირებულ სასტუმროებში ცხოვრობს. გერმანული გამოცემის თანახმად, ის მეგობარი ქვეყნების ლიდერებთან შესახვედრად პირადი ვერტმფრენით ხშირად დაფრინავს თეირანში, სტამბულში, მოსკოვსა და კაიროში.
ისმაილ ჰანიას ორი ვაჟი, მააზი და აბდელ სალამიც ტკბებიან ფუფუნებით. ახალგაზრდები სტამბოლის და დოჰას სასტუმროებში ნებივრობისას ხშირად ჩნდებიან ინსტაგრამის ფოტოებში. მააზს, რომელიც თვითონაც ძალიან მდიდარი უძრავი ქონების მაგნატია, ღაზაში "სახლების მამის" სახელით იცნობენ. მიუხედავად მისი ისლამური სარწმუნოებისა, მააზი თურქეთში ყოფნისას ხშირადაა მიმზიდველი ქალების და ალკოჰოლის გარემოცვაში. გამოცემა მის ქონებას 2.5 მილიონ დოლარად აფასებს, თუმცა ისრაელის საელჩოს რწმუნებით, ის 3.2 მილიარდ დოლარს შეადგენს.
ნახეთ ასევე: