გარდაუვალი დარტყმა ისრაელზე? - რისთვის ემზადება ირანი, რას აცხადებენ აშშ-ისა და ისრაელის დაზვერვაში? მსოფლიო მორიგი კონფლიქტის ზღვარზე
"შეერთებულ შტატებსა და მის მოკავშირეებს მიაჩნიათ, რომ ირანის ან მისი მარიონეტების მიერ ისრაელის სამხედრო და სამთავრობო ობიექტებზე სარაკეტო ან დრონებით დარტყმები გარდაუვალია", - ინფორმაციას Bloomberg-ი ამერიკისა და ისრაელის დაზვერვის წარმომადგენლებზე დაყრდნობით ავრცელებს.
- მათი თქმით, პოტენციური თავდასხმა, ზუსტი მართვადი რაკეტების გამოყენებით, შეიძლება, უახლოეს დღეებში განხორციელდეს.
სააგენტოს ერთ-ერთმა წყარომ განუცხადა, რომ ამერიკის და ისრაელის დაზვერვის შეფასებებიდან გამომდინარე, საქმე უფრო ეხება იმას, თუ როდის მოხდება თავდასხმა, ვიდრე იმას, მოხდება თუ არა ეს თავდასხმა.
Bloomberg-ი წერს, რომ დასავლეთის ქვეყნების, კერძოდ, შეერთებული შტატების დაზვერვის მონაცემებით, ირანისა და მისი მარიონეტების თავდასხმა შესაძლოა სულაც არ მოხდეს ისრაელის ჩრდილოეთიდან, სადაც ლიბანში "ჰეზბოლა“ მოქმედებს.
- სტატიაში აღნიშნულია, რომ ისრაელის ოფიციალური პირები ეთანხმებიან მოკავშირეების მოსაზრებებს და საჯაროდ დაემუქრნენ ირანს, რომ თუ ის ისრაელის ტერიტორიას დაარტყამს, ირანზე საპასუხო დარტყმას განახორციელებენ.
ამ ინფორმაციის ფონზე აშშ-ის პრეზიდენტი ჯო ბაიდენი აცხადებს, რომ ირანისგან ისრაელზე პოტენციური დარტყმის შემთხვევაში, ისრაელს ექნება ამერიკის "რკინის მხარდაჭერა".
"ყველაფერს გავაკეთებთ, რათა დავიცვათ ისრაელის უსაფრთხოება", - აცხადებს ბაიდენი.
შეგახსენებთ, 1-ელ აპრილს ირანის საკონსულოს შენობაზე თავდასხმის შედეგად 13 ადამიანი დაიღუპა, მათ შორის ირანელი სამხედრო მეთაურები. მიიჩნევენ, რომ თავდასხმის უკან ისრაელი დგას, თუმცა მას პასუხისმგებლობა ოფიციალურად არ აუღია. ირანის უზენაესმა ლიდერმა, აიათოლა ალი ხამენეიმ გუშინ განაცხადა, რომ ისრაელის მიერ დამასკოში, ირანის საკონსულოზე განხორციელებული თავდასხმა ირანზე თავდასხმის ტოლფასია. „ბოროტი რეჟიმი უნდა დაისაჯოს და დაისჯება კიდეც“, - აღნიშნა აიათოლა ალი ხამენეიმ.
აშშ-ის პრეზიდენტი, ჯო ბაიდენი ისრაელს, ირანის მხრიდან თავდასხმის შიშის ფონზე, მტკიცე მხარდაჭერას ჰპირდება.
„ყველაფერს გავაკეთებთ, რათა დავიცვათ ისრაელის უსაფრთხოება. როგორც პრემიერ-მინისტრ ნეთანიაჰუს ვუთხარი, ისრაელის უსაფრთხოების მიმართ ჩვენი ვალდებულება, ირანისა და მისი მარიონეტების მხრიდან საფრთხის ფონზე, რკინისებრია – ნება მომეცით კიდევ ერთხელ ვთქვა, რკინისებრი“, - აღნიშნა ბაიდენმა.