უნიკალური აღმოჩენა პომპეიში - ნაპოვნია უძველესი ფრესკები: რომელი მითოლოგიური გმირები არიან იქ გამოსახული და რას ამბობენ არქეოლოგები?

პომპეიში არქეოლოგიური გათხრების შედეგად უძველესი ფრესკა აღმოაჩინეს - არქეოლოგების მტკიცებით, ეს აქამდე აღმოჩენილ ფრესკებს შორის საუკეთესოა და მასზე მითოლოგიური გმირები არიან გამოსახული: მათ შორის, ელენე ტროელი, პარისი, კასანდრა და აპოლონი.

"შავი ოთახი" - ეს სახელი უწოდეს დარბაზს, რომლის კედლებზეც ახლად აღმოჩენილი ფრესკაა გამოსახული. ვარაუდობენ, რომ შავი ფერი ერთგვარი ეფექტის შესაქმნელად შეირჩა: მზის ჩასვლის შემდეგ, სანთლების შუქზე ნახატები თითქოს ცოცხლდებიან.

ფართო საცხოვრებელი და კომერციული ბლოკი, ცნობილი როგორც "რეგიონი 9", ვეზუვის ფერფლისგან იწმინდება - არქეოლოგებმა ადგილზე მუშაობა 12 თვის წინ დაიწყეს. სიძველის გამო ფრესკების განადგურების რისკი დიდია, ამიტომ მათ დასაცავად თაბაშირის წებო გამოიყენება.

”პასუხისმგებლობა უზარმაზარია... დიდი ვნება და სიყვარული გვამოძრავებს ამ საქმის მიმართ. ეს აღმოჩენა შემდგომი თაობებისთვისაც საინტერესო იქნება" - ამბობს მთავარი რესტავრატორი რობერტა პრისკო.

არქეოლოგების თქმით, კედლებზე ხშირად ხვდებიან ინიციალებს "ARV" - მისი ვინაობა ცნობილია:

"ეს არის აურუს ლუსტიუს ვერუსი. ცნობილი პოლიტიკოსი. საკმაოდ მდიდარ ადამიანი იყო. ეს საფუძველს გვაძლევს ვიფიქროთ, რომ შენობის მფლობელი სწორედ ის უნდა ყოფილიყო."

• პომპეი ვულკან ვეზუვის ამოფრქვევის შედეგად ჩვენი წელთაღრიცხვის 79 წელს განადგურდა. იგი პირველად 1748 წელს აღმოაჩინეს, თუმცა არქეოლოგიური სამუშაოები 1860 წლამდე არ დაწყებულა. ისტორიული წყაროების თანახმად, ქალაქში 10 000-დან - 20 000-მდე მოსახლე ცხოვრობდა. დღემდე აღმოჩენილია1 500-ზე მეტი ადამიანის ნაშთი.