"ვერ ვხედავ გზას, რომ უკრაინამ ომი მხოლოდ ბრძოლის ველზე მოიგოს... საჭიროა მოლაპარაკებები" - უკრაინის დაზვერვის უფროსის ინტერვიუ: რისთვის ემზადება რუსეთი
უკრაინის თავდაცვის სამინისტროს მთავარი სადაზვერვო სამმართველოს უფროსის მოადგილის, ვადიმ სკიბიცკის განცხადებით, ვერ ხედავს გზას, რომ უკრაინამ ომი მხოლოდ ბრძოლის ველზე მოიგოს და მიაჩნია, რომ ასეთი ომები მხოლოდ ხელშეკრულებებით შეიძლება დასრულდეს.
- მისი თქმით, მაშინაც კი, თუ უკრაინა შეძლებს, რუსული ჯარები თავის საზღვრებთან დააბრუნოს, რაც სულ უფრო შორეული პერსპექტივაა, ეს ომს არ დაასრულებს.
სკიბიცკიმ აღნიშნა, რომ ახლა ორივე მხარე ცდილობს დაიკავოს „სასარგებლო პოზიცია“ პოტენციური მოლაპარაკებების წინ, მაგრამ, მისი შეფასებით, მნიშვნელოვანი მოლაპარაკებები, შეიძლება, 2025 წლის მეორე ნახევრამდე არ დაიწყოს.
- მთავარი სადაზვერვო სამმართველოს ხელმძღვანელის მოადგილე აცხადებს, რომ იარაღი, შესაძლოა, ორივე მხარეს დაუმთავრდეს, მაგრამ თუ სხვა ასპექტებში არაფერი შეიცვლება, უკრაინა პირველი იქნება, რომელსაც იარაღის მარაგი ამოეწურება.
სკიბიცკი აცხადებს, რომ ომის ყველაზე დიდი უცნობი ფაქტორი ევროპაა. თუ უკრაინის მეზობლები არ იპოვიან გზას, კიდევ უფრო გაზარდონ თავდაცვის წარმოება უკრაინის დასახმარებლად, საბოლოოდ ისინიც რუსეთის სამიზნეში აღმოჩნდებიან.
"ჩვენ გავაგრძელებთ ბრძოლას. არჩევანი არ გვაქვს. გვინდა ვიცხოვროთ. მაგრამ ომის შედეგი მხოლოდ ჩვენზე არ არის დამოკიდებული“, - აღნიშნა ვადიმ სკიბიცკიმ.
მისივე თქმით, რუსეთი ხარკოვისა და სუმის ოლქებზე თავდასხმისთვის ემზადება და სავარაუდოდ, გაზრდის ჯარების რაოდენობას ამ ოპერაციებისთვის, მაგრამ დიდი ქალაქის ასაღებად ეს საკმარისი არ იქნება.
"რუსების წარმატება დამოკიდებულია იმაზე, თუ რამდენად ძლიერი იქნება უკრაინის თავდაცვა დონბასში. რუსეთის მთავარი შეტევა მაისის ბოლოს ან ივნისის დასაწყისში დაიწყება" - ამბობს სკიბიცკი.
მისი თქმით, რუსეთის ჩრდილოეთი ძალები, რომლებიც ხარკოვთან საზღვარზეა დისლოცირებული, ამჟამად 35 000 ჯარისკაცს მოიცავს, მაგრამ, სავარაუდოდ, 50 000-დან 70 000-მდე გაიზრდება. რუსეთი ასევე ქმნის „სარეზერვო დივიზიას” (15 000-20 000 ჯარისკაცამდე) ცენტრალურ რუსეთში, რომელიც, შესაძლოა, ძირითად ძალას დაამატოს.
სკიბიცკის თქმით, ამ შემთხვევაშიც კი რუსებს არ ექნებათ საკმარისი რესურსი დიდი ქალაქის დასაკავებლად, თუმცა, შესაძლებელია უფრო მცირე მასშტაბის ოპერაციები.
"სწრაფი ოპერაცია შესვლისა და გასვლისთვის, შესაძლებელია, მაგრამ ხარკოვის, ან თუნდაც სუმის აღება სხვა ბრძანებაა. რუსებმა ეს იციან. ჩვენ ეს ვიცით“, - აღნიშნა სკიბიცკიმ.