დავით უსუფაშვილი - პარლამენტში დავამკვიდრებთ ჭეშმარიტ მრავალპარტიულობას

"ქართული ოცნების" სამოქმედო პროგრამის ერთ-ერთი ქვაკუთხედი დემოკრატიის განვითარება და საქართველოში ავტორიტარული რეჟიმის დასრულებაა, - ამის შესახებ ჟურნალისტებს კოალიცია "ქართული ოცნების" ერთ-ერთმა ლიდერმა და პარლამენტის თავმჯდომარეობის კანდიდატმა, დავით უსუფაშვილმა განუცხადა.

მისივე განმარტებით, კოალიცია პარლამენტში მუშაობის დაწყებისთანავე აქცენტს გააკეთებს სწორედ აღნიშნულ მიმართულებებზე, ასევე მედიაზე, ბიზნესსა და სასამართლოზე კონტროლის გაუქმების საკითხზე.

"შესაძლოა, ხელისუფლების ყოფილი წარმომადგენლებისათვის პარლამენტში ბევრი მტკივნეული გადაწყვეტილება იქნას მიღებული, რადგან მათ სხვაგვარად წარმოედგინათ დემოკრატია. ჩვენ იქ დავამკვიდრებთ ჭეშმარიტ მრავალპარტიულობას და ამ თვალსაზრისით საზოგადოება ცვლილებებს ძალიან მალე ნახავს", - აღნიშნა დავით უსუფაშვილმა.

პარლამენტის თავმჯდომარეობის კანდიდატი "ქორთიარდ მარიოტში" მიმდინარე კონფერენციას ესწრება, რომელიც არსებულ პოლიტიკურ პროცესებსა და დემოკრატიის კონსოლიდაციისთვის გადასადგმელ ნაბიჯებს ეძღვნება.

"ინტერპრესნიუსი"