შსს-მ სოსო ჩიქობავას მკვლელობაში ეჭვმიტანილის აღიარებითი ჩვენება გაავრცელა

შინაგან საქმეთა სამინისტრომ ნინოშვილის ქუჩაზე, რუსულ ეკლესიასთან გუშინ მომხდარ მკვლელობაში ეჭვმიტანილის აღიარებითი ჩვენება გაავრცელა.

სოსო ჩიქობავას მკვლელობაში ეჭვმიტანილი, 1955 წელს დაბადებული ნიკოლოზ ხუბაშვილი აცხადებს, რომ გუშინ ვერცხლის ქუჩიდან მოდიოდა, თან ჰქონდა "მაკაროვის" სისტემის იარაღი.

როგორც ეჭვმიტანილი აცხადებს, გზაზე მან ეკლესიაში შეიარა სანთლების დასანთებად, რა დროსაც შეამჩნია სოსო ჩიქობავას მანქანა.

ნიკოლოზ ხუბაშვილის თქმით, მას ბინასთან დაკავშირებით დავა ჰქონდა სოსო ჩიქობავასთან და ამ საკითხე გამოელაპარაკა. "მან დამიწყო გინება, მეც ვერ მოვითმინე და ვესროლე", - აღნიშნა ხუბაშვილმა აღიარებით ჩვენებაში.

სოსო ჩიქობავა გუშინ საღამოს, ნინოშვილის ქუჩაზე, რუსული ეკლესიის უკან საკუთარ ავტომანქანასთან ცეცხლსასროლი იარაღით მოკლეს. წინასწარი ინფორმაციით, ჩიქობავას ექვსი ტყვია აქვს მოხვედრილი. გარდაცვლილის ცხედარი პროზექტურაში გადაასვენეს. როგორც ერთ-ერთმა თვითმხილველმა "ინტერპრესნიუსს" განუცხადა, მან ზურგიდან დაინახა მკვლელი, რომელმაც ცეცხლსასროლი იარაღით ხელში დატოვა ტერიტორია.

ამასთან, "გურია ნიუსმა" გაავრცელა განცხადება, სადაც აღნიშნულია, რომ სოსო ჩიქობავა, რომელიც კონტროლის პალატის თანამშრომელი იყო, ჯერ კიდევ 2011 წლიდან აქტიურად თანამშრომლობდა მათთან და "ამხელდა კონტროლის პალატაში მიმდინარე მოვლენებს, რომელსაც წინა წლებში ჰქონდა ადგილი".

"ბოლო პერიოდში, ჩემთან საუბრისას სოსო ჩიქობავა ხშირად საუბრობდა იმაზე, რომ მის თავს უცნაური ამბები ხდებოდა და რამდენჯერმე პირად მეილზე მიუვიდა შეტყობინება იმის შესახებ, რომ ვიღაცა ცდილობდა მისი პაროლის გატეხვას. ცოტა მოგვიანებით კი მოგვწერა, რომ თავისი მეილიც და პირადი "ფეისბუქიც" დაბლოკილი იყო", - წერს "გურია ნიუსი".

იხილეთ ვიდეო

"ინტერპრესნიუსი"