რუსი ბიზნესმენი კამბოჯის ციხეში ჩასვეს

სკანდალურად ცნობილი რუსი ბიზნესმენი სერგეი პოლონსკი და რუსეთის კიდევ ორი მოქალაქე ადგილობრივი მეზღვაურების საჩივრის საფუძველზე კამბოჯაში დააპატიმრეს. ძიების თანახმად, ისინი ექვს მეზღვაურს დანებით შეიარაღებულნი ემუქრებოდნენ.

კამბოჯის სამხედრო პოლიციის ცნობით, რუსები ქალაქ სიანუკვილში დააპატიმრეს. პოლონსკი თავის მეგზურებთან ერთად კამბოჯაში ისვენებდა. როგორც თავის ინტერნეტგვერდზე წერდა, ახალ წელს აღნიშნავდა. "შესანიშნავად ვერთობით. ნაძვის ხე მოვრთეთ, ვისრიალეთ, ყინული გავადნეთ, დაუსახლებელ კუნძულებზე გავათიეთ ღამე. ყველაფერი მოვსინჯეთ". მოგვიანებით კი ჩხუბი მოუვიდათ იმ მეზღვაურებთან, რომლებსაც მორიგ კუნძულზე გასეირნების შემდეგ ნაპირზე გადმოჰყავდათ. რუსებს განზრახ ძალადობა და უკანონოდ თავისუფლების აღკვეთა წაუყენეს ბრალად.

თავად პოლონსკიმ რუს ადვოკატებს განუცხადა, რომ დამნაშავე არ არის. "შემეძლო 15 წუთში გამოვსულიყავი, თუ თავს დამნაშავედ ვაღიარებდი. მაგრამ მხოლოდ ჩემი სრული გამართლების შემთხვევაში გამოვალ, რადგან მომხდარში დამნაშავე არ ვარ", - აღნიშნა ბიზნესმენმა.

სერგეი პოლონსკი უმსხვილესი დეველოპერული კომპანია "მირაქს გრუპის" დამაარსებელი და მფლობელია. გასულ წელს ჟურნალისტებთან შეხვედრისას გამოაცხადა, თითქოს აღარ არის ბიზნესმენი, თუმცა კამბოჯაში მას საქმიანი ინტერესები აქვს. პოლონსკიმ ქონება სამშენებლო ბიზნესში იშოვა და 2008 წელს 40 ყველაზე მდიდარი რუსის სიაში მოხვდა.

პოლონსკის პოპულარობა ბიზნესმენობის გარდა სკანდალურმა გამონათქვამებმა და გამოხტ­ო­მებმაც მოუტანა, ეპ­ატაჟური პიროვნებაა და უყვარს საკუთარი თავის გარშემო აჟიოტაჟის ატეხვა. გა­მო­რ­იცხული არ არ­ის, ახლაც განგებ მოაწყო ეს ალიაქოთი, რომ თა­ვისი ერთ-ერთი გა­ტაცება - სკანდალებისა და ექსტრიმის სიყვარული დაეკმაყოფილებინა.

FINANCIAL TIMES

ჟურნალი "რეიტინგი"

(გამოდის ორშაბათობით)