სინდი კროუფორდმა პირველად ისაუბრა რიჩარდ გირთან განქორწინების მიზეზებზე

თავის დროზე ქალების გულთამპყრობელი რიჩარდ გირი და სუპერმოდელი სინდი კროუფორდი ჰოლივუდის ერთ-ერთ ულამაზეს წყვილად მიიჩნეოდა. ისინი 1995 წელს გაიყარნენ. მაშინ მათი განქორწინების შესახებ ბევრი ჭორი დადიოდა.

თუმცა ვარსკვლა­ვ­ები ჯიუტად ინარჩუ­ნებდნენ დუმილს და ჟურნალისტებს არ უა­მ­ბობდნენ, რა გახდა მათი გაყრის მიზეზი. მხოლოდ ახლა, 47 წლის მანეკენი დათანხმდა, გულწრფელად ესაუბრა თავისი ცხოვრების ამ ეპიზოდზე.

სინდიმ და რიჩარდ გირმა ერთმანეთი 1987 წელს გაიცნეს, ფოტოგრაფ ჰერბ რიტცთან მოწყობილ ბარბექიუზე.

- მე მაშინ 21 წლის ვიყავი. ყველაფერი ახალი იყო ჩემთვის. რიტცთან ბევრ ცნობილ ადამიანს შევხვდი, მათ შორის რიჩარდსაც... პრაქტიკულად, მაშინვე დავიწყეთ ურთიერთობა. სხვათა შორის, სწორედ იმ პერიოდში, როცა გირთან ვცხოვრობდი, მოვიპოვე პოპულარობა, - აღნიშნა სინდიმ.

ოთხი წლის შემდეგ წყვილმა იქორწინა, კიდევ ოთხი წლის მერე კი - გაიყარნენ. დაქორწინების დროს გირი 42 წლის იყო, კროუფორდი - 25-ის. მათ "საუკუნის წყვილს" უწოდებდნენ. მოდელის თქმით, თავიდან იმდენად შეყვარებული იყვნენ, რომ დიდხანს ვერ ამჩნევდნენ, რამდენი რამ განასხვავებდათ.

- ასაკში 17-წლიანი სხვაობა, ბოლოს და ბოლოს, გახდა კიდეც გაყრის მიზეზი, - აღიარა მოდელმა, - 20 წლისა ჯერ კიდევ მზად ვიყავი, რიჩარდს ყველგან გავყოლოდი - ისიც ასე აღმიქვამდა: მას მივყავდი, მე მივყვებოდი. მაგრამ წლების მატებასთან ერთად, მინდოდა, თუნდაც მის გვერდით, მხარდამხარ მევლო და არა მის უკან... ის არ იყო მზად, ქცევის ასეთი მოდელი მიეღო.

თუმცა ამ განქორწინებას სინდი ტრაგედიად არ აღიქვამს.

- ისე მოხდა, როგორც უნდა მომხდარიყო. რიჩარდი ძალიან ჭკვიანი კაცია, მასთან ბევრი ახალი გავიგე. ჩვენი ქორწინება დიდი თავი იყო ჩემს ცხოვრებაში... ერთი მომხიბვლელი საყვარელი გოგო ვიყავი, რომელიც მზად იყო, ყველას დახმარებოდა და ყველა შეკითხვაზე გაეცა პასუხი "დიახ". მინდოდა, რომ ადამიანებს ვყვარებოდი. რიჩარდთან ვისწავლე, რომ არ იყო აუცილებელი, ყველასთვის კოჭი მეგორებინა, უბრალოდ, შეიძლებოდა თავაზიანი უარის თქმა.

1998 წელს სინდი რესტორატორ რენდი გერბერს გაჰყვა ცოლად და ორი შვილი გაუჩინა - ვაჟი პრესლი და ქალიშვილი კაი. რიჩარდ გირმაც იქორწინა 2002 წელს მოდელ კერი ლოუელზე, 2004 წელს კი, 55 წლის ასაკში, პირველად გახდა ვაჟის მამა.

VOGUE

ჟურნალი "რეიტინგი"

(გამოდის ორშაბათობით)