ფეხმძიმე ჰოლი ბერიმ მთა დალაშქრა

ჰოლივუდის მსახიობი ჰოლი ბერი ახალი ფილმის "განგაშის" წარსადგენად ბრაზილიას ესტუმრა. ფეხმძიმე მსახიობმა რიოს ქუჩებში შავ მაისურსა და ჯინსებში გამოწყობილმა ისეირნა. მოგვიანებით კი შაქრისთავას სახელით ცნობილი მთა დალაშქრა. მთის მწვერვალიდან რიო-დე-ჟანეიროს დამატყვევებელი ხედი იშლება.

ვიდრე ჰოლი ბერი ბრაზილიის ხედებით ტკბებოდა, ადგილობრივი მაცხოვრებლები თავად მსახიობის ცქერით ტკბებოდნენ - კინოვარსკვლავს ფეხმძიმობა ძალიან მოუხდა.

საღამოს სადღესასწაულო სამოსში მსახიობი "განგაშის" პრემიერას დაესწრო. ფილმმა მაყურებლების დიდი მოწონება დაიმსახურა.

ბრედ ანდერსონის ფილმი, რომელშიც ბერი მთავარ როლს ასრულებს, საგანგებო სიტუაციების სამსახურის ქოლ-ცენტრის ოპერატორზე მოგვითხრობს. ქოლ-ცენტრში გოგონა რეკავს, რომელიც მანიაკის თავდასხმის მსხვერპლი გახდა. ოპერატორს გოგონას დასახმარებლად კოშმარის გადატანა უწევს.

მომზადებულია Socialite Life-ის მიხედვით.