ნატო საბრძოლო ოპერაციების მართვის უფლებას ავღანეთის ხელისუფლებას გადააბარებს

ავღანეთში, ნატო-ს შეიარაღებული ძალები საბრძოლო ოპერაციების მართვის უფლებას დღეს ქვეყნის ხელისუფლებას გადააბარებს. "ბიბისის" ინფორმაციით, ცერემონიას ავღანეთის პრეზიდენტი ჰამიდ კარზაი და ნატო-ს გენერალური მდივანი ანდერს ფოგ რასმუსენიც დაესწრებიან.

ადგილობრივი ხელისუფლებისთვის კონტროლის გადაბარების პროცესი ჯერ კიდევ 2011 წელს დაიწყო. ISAF-ის მიერ ავღანეთის ხელისუფლებისთვის საბრძოლო ოპერაციების კონტროლის გადაბარება დღეს 95 რაიონში მოხდება.

"ბიბისის" ინფორმაციით, ავღანეთის უსაფრთხოების ძალების რიცხვი 6 წლის განმავლობაში საგრძნობლად გაიზარდა და 40 ათასიდან დღეს მათი რაოდენობა 350 ათასს აღწევს.

ავღანეთში, ISAF-ის მისიაში ამ ეტაპზე 97 ათასი სამხედროა წარმოდგენილი, აქედან 68 ათასი ამერიკელია, დანარჩენი კი - ISAF-ის მისიაში მონაწილე 50 ქვეყნის სამხედროა.

ამ დროისთვის ნატო-ს კონტროლის ქვეშ ავღანეთში 13 სასაზღვრო რაიონი რჩება, მათ შორის, ე.წ. "თალიბების" სამშობლო - ყანდაგარის პროვინცია.

ნატო-ს ჯარები ავღანეთს 2014 წლის ბოლოსთვის დატოვებენ. თუმცა, აშშ-ის პრეზიდენტს ბარაქ ობამას ჯერ არ დაუკონკრეტებია, რა რაოდენობის სამხედროები დარჩებიან ავღანეთის ტერიტორიაზე 2014 წლის შემდეგ.

"ინტერპრესნიუსი"