თეა წულუკიანი - "ბედუკაძის შუამდგომლობაზე გადაწყვეტილება მთავარმა პროკურორმა დამოუკიდებლად მიიღო"

საქართველოს იუსტიციის მინისტრის, თეა წულუკიანის განცხადებით, როგორი გამოსავალი უნდა მოიძებნოს ვლადიმერ ბედუკაძესთან დაკავშირებით, ამაზე მთავარი პროკურატურა მუშაობს.

როგორც თეა წულუკიანმა ჟურნალისტებთან საუბარში განაცხადა, ბედუკაძის საქმესთან დაკავშირებით მთავარი პროკურატურის შუამდგომლობის შესახებ გადაწყვეტილება მთავარმა პროკურორმა დამოუკიდებლად მიიღო.

წულუკიანი აცხადებს, შუამდგომლობა მას შემდეგ ნახა, რაც ეს დოკუმენტი სასამართლოში მიიტანეს.

"შუამდგომლობას გარკვეულწილად, დასაბუთებული იყო, თუმცა გამორჩენილი იყო ის ფაქტი, რომ საქმე ეხებოდა სულ მცირე არაადამიანურ მოპყრობას და მაქსიმუმ - წამებას. ამ ორ ნაწილში საერთაშორისო სამართალი და მათ შორის ჩვენი კანონი კრძალავს იმას, რომ ვინმეს რაიმე ტიპის შეღავათი გაუკეთონ, მითუმეტეს, ამ ხარისხის შეღავათი. ამიტომ გადასასინჯია, როგორი გამოსავალი უნდა გამოიძებნოს. მე ამაზე ვიცი, რომ მთავარი პროკურატურა მუშაობს და დაველოდოთ ხვალინდელ დღეს, რა გამოსავალს შემოგვთავაზებენ. თუმცა, თვითონ სისხლის სამართლის, როგორც მატერიალური, ისე საპროცესო კოდექსი ძალიან ბევრ გასაქანს ამ მხრივ არ იძლევა", - განაცხადა თეა წულუკიანმა.

ჟურნალისტების კითხვაზე, იღებს თუ არა ამ საკითხზე თავის წილ პასუხისმგებლობას, წულუკიანმა აღნიშნა, რომ არასოდეს არ გაქცევია პასუხისმგებლობას და ასე იქნება ამ შემთხვევაშიც.

"ინტერპრესნიუსი"