ბიძინა ივანიშვილი – არა მგონია, რომ თენგიზ გუნავას დაკავება პოლიტიკურად მოტივირებული იყო

არ შეიძლება ყველაფერს პოლიტიკურად მოტივირებული დავარქვათ, - ასე ეხმაურება საქართველოს პრემიერ-მინისტრი ბიძინა ივანიშვილი სამეგრელო-ზემო სვანეთში პრეზიდენტის რწმუნებულის, თენგიზ გუნავასთვის პატიმრობის შეფარდების თაობაზე "ნაციონალური მოძრაობის" მხრიდან გაკეთებულ შეფასებებს.

როგორც ივანიშვილმა ჟურნალისტებს განუცხადა, ყველამ, მათ შორის უმცირესობამ სამართალდამცავ უწყებებსა და სასამართლოს პატივი უნდა სცეს.

"არა მგონია, რომ გუნავას დაკავება პოლიტიკურად მოტივირებული იყო. ყველა დაკავებას, როგორც წესი, პოლიტიკურად მოტივირებულს ეძახიან ოპოზიციის მხრიდან, ასე არ შეიძლება. სამართალდამცავ უწყებებს პატივი უნდა სცენ, მათ რიცხვში უმცირესობის წევრებმა. უნდა გაიაზრონ, რომ მათ მიეცეთ მუშაობის საშუალება. არ შეიძლება ყველაფერს პოლიტიკურად მოტივირებული დავარქვათ", - აღნიშნა ივანიშვილმა.

თენგიზ გუნავას თბილისის საქალაქო სასამართლომ გუშინდელი განჩინებით 4-წლიანი პატიმრობა შეუფარდა.