გიორგი ზერეკიძე ბიჭის მამა გახდება

გიორგი ზერეკიძე საზოგადოებამ რამდენიმე წლის წინ გაიცნო. მისი საქმე რეზონანსული გახლდათ, საზოგადოება აღაშფოთა 14 წლის ბიჭის გისოსებს მიღმა აღმოჩენამ. გიორგი ორჯერ დააკავეს და ციხეში დაახლოებით შვიდი წლის გატარებამ მოუწია. ამ წლების განმავლობაში ბევრი რამ მოასწრო, უნივერსიტეტში ჩაბარება, საყვარელი გოგონას გულის მოგება და სამწუხაროა, მაგრამ ბევრი მძიმე დღე გადაიტანა. ამაზე არაერთხელ უსაუბრია, ამიტომ ამჯერად მხოლოდ კარგზე და მის ახალ ოჯახზე ვისაუბრეთ. ინტერვიუ გიორგისთან და მის მეუღლესთან, მარიკა ვასაძესთან ჩავწერეთ. წყვილმა ოთხი თვის წინ იქორწინა და უკვე პატარას ელოდებიან.

მარიკა:

- მესამე კლასში ვიყავი, 53-ე სკოლაში რომ გადავედი და იქ გავიცანი გიორგი, მას შემდეგ ერთად მოვდივართ.

გიორგი:

- მარიკა დიდი ხანი არ მიმხელდა სიყვარულს და ორი წლის წინ გამომიტყდა. მე სულ მიყვარდა და ამას ღიად ვამბობდი. ყველამ იცოდა, რომ მარიკა ჩემი შეყვარებული იყო. თვითონ არ მელაპარაკებოდა, ეს საერთოდ მაგიჟებდა. ზედ არ მიყურებდა, იმის საშუალებას არ მაძლევდა, რომ დავლაპარაკებოდი. წლების შემდეგ გავუმხილე და ყოყმანით, მაგრამ თავადაც გამომიტყდა. მარიკა ჩემი პირველი სიყვარულია, ჩემთვის ის ყველაფერია. ბაღშიც კი არ მყოლია შეყვარებული. არ ვცდილობ, რომ მას თავი სხვანაირად მოვაჩვენო. ყველაზე ბუნებრივი მარიკასთან ვარ.

მარიკა:

- 14 წლისები ვიყავით, გიორგი რომ დააკავეს. ძალიან განვიცადე. მახსოვს, ლონდონში ვიყავი სასწავლებლად წასული, ჩემი ჩასვლიდან მეორე დღეს დედამ დამირეკა და მითხრა. მშობლები იცნობდნენ გიორგის და მეც მის ოჯახთან კარგი ურთიერთობა მქონდა. მომხდარი ძალიან განვიცადე. ჩემი ჩამოსვლის შემდეგ ბავშვების აქციები დაიწყო, გიორგის გამოშვების მოთხოვნით და მეც აქტიურად ჩავები.

- ოჯახი როგორ უყურებდა შენს აქტიურობას?

- გიორგი ციხიდან ყოველდღე მირეკავდა. დედა მეუბნებოდა, ცოტა მეშინია, დაკავების შემდეგ ციხეში ნერვები არ გაუფუჭდესო. დროთა განმავლობაში შეეგუა. რომ არ სცოდნოდა, გიორგი როგორი პიროვნება იყო, ალბათ წინააღმდეგი იქნებოდა. ყოველთვის დავდიოდი სასამართლოზე კლასელებთან ერთად. გიორგიმ სიურპრიზი მომიწყო და ციხიდან ეროვნულ გამოცდებზე გავიდა და ჩააბარა. ზუსტად იმ უნივერსიტეტში მოხვდა, სადაც მე. ძალიან გამიხარდა, მეგონა, რომ ამის მერე გამოუშვებდნენ, მაგრამ ისე მოხდა, რომ გიორგის გარდა ყველა გამოუშვეს. ორი წლის წინ დეკემბერში ციხე დატოვა და ერთად დავდიოდით უნივერსიტეტში.

გიორგი:

- ძალიან დაძაბული ფონი იყო გარშემო, ლაღად ვერ დავდიოდით. შიშის საშინელი განცდა მქონდა, ორ თვეში პროვოკაცია მომიწყვეს და ისევ დამაკავეს.

მარიკა:

- ძალიან რთული პერიოდი გადავიტანე, მაგრამ იმ ორი თვის განმავლობაში, როდესაც გიორგი გარეთ იყო, იმდენად კარგად ვგრძნობდი მასთან თავს, რომ მზად ვიყავი, გინდა რვა წელი მჯდარიყო, დავლოდებოდი.

- ალბათ, რთულია, როცა პატიმრობაში მყოფს იმაზეც გიწევდა ფიქრი, რომ შენი შეყვარებული თაყვანისმცემლებს არ შეეწუხებინათ.

- მარიკა ისეთი ტიპია, რომ აბეზარ თაყვანისმცემლებს ადვილად იშორებს. იმდენად აჩენს თავის პატიოსნებას, რომ ზედმეტს ვერ უბედავენ და ხვდებიან, რომ შანსი არ აქვთ.

მარიკა:

- ხშირად არ დავდიოდი ქუჩაში, კლუბებში, რომ ხალხს არ ეფიქრა, შეყვარებული ციხეში ჰყავს და რამდენს დადისო.

გიორგი:

- ჩემი მდგომარეობის მიუხედავად, მესმის მარიკას მშობლების, რომელთათვისაც ძნელია გაიგონ, რომ ბიჭს, რომელიც 14 წლიდან შვიდი წელი ციხეშია, ფსიქიკა შერჩეს. მაგრამ იმდენად კარგი დამოკიდებულება აქვთ, რომ მეხმარებიან, სწორად წარვმართო ჩემი ცხოვრება. სააკაშვილი კრიმინალს მეძახდა და ერთი-ორჯერ ციხეში მეც კრიმინალივით გავიარე, მაგრამ მთავარია, გარეთ გამოსვლის შემდეგ როგორ გარემოში ხარ, შენც მათ ემსგავსები.

იხილეთ ინტერვიუს სრული ვერსია