თეა წულუკიანი - დიპლომატიური ურთიერთობები ყოველგვარი წინაპირობების, დათქმების და სანაცვლო დაპირებების გარეშე უნდა აღდგეს

დიპლომატიური ურთიერთობები ყოველგვარი წინაპირობების, დათქმების და სანაცვლო დაპირებების გარეშე უნდა აღდგეს, - ამის შესახებ იუსტიციის მინისტრმა თეა წულუკიანმა ჟურნალისტებს დიმიტრი მედვედევის გუშინდელი განცხადების კომენტირებისას განუცხადა.

საქართველოს იუსტიციის მინისტრის შეფასებით, დიპლომატიური ურთიერთობები ორ დაპირისპირებულ მხარეს შორის როგორც წესი, ყველანაირი წინაპირობების გარეშე აღდგება ხოლმე სწორედ იმიტომ, რომ სალაპარაკო მაგიდა გაიხსნას.

"თუ სალაპარაკო მაგიდა ვერ გაიხსნა, ისე ჩვენ ვერც ერთ თემაზე, მათ შორის ვერც ტერიტორიული მთლიანობის აღდგენაზე ვერ ვისაუბრებთ საფუძვლიანად, ამიტომ დიპლომატიური ურთიერთობები უნდა აღდგეს ყოველგვარი წინაპირობების, დათქმების და სანაცვლო დაპირებების გარეშე", - აღნიშნა თეა წულუკიანმა.

იუსტიციის მინისტრის შეფასებით, რუსეთი საქართველოს ოკუპანტი სახელმწიფოა და ამ მოცემულობას ვერც ერთი სახელმწიფოს მმართველთა შეფასებითი მსჯელობა ვერ შეცვლის.

"2008 წლის აგვისტოში რუსეთი შემოიჭრა საქართველოს ტერიტორიაზე და დღესაც რამდენიმე კილომეტრში იმყოფება ჩვენი ქვეყნის დედაქალაქიდან. ამიტომაც არის ოკუპანტი და მეტიც. ის ახორციელებს მცოცავ ანექსიას. ჩვენ გვახსოვს მავთულხლართების ტრაგიკული ისტორია, როდესაც ისედაც შუაზე გაყოფილი სახლები და ქართული ტერიტორიები კიდევ ერთხელ მოხვდა მეორე მხარეს. ეს არის მოცემულობა და ამას ვერ შეცვლის ვერც ერთი სახელმწიფო. მითუმეტეს, რუსეთის მმართველი რგოლების შეფასებითი მსჯელობა", - აღნიშნა თეა წულუკიანმა.

რუსეთის პრემიერ-მინისტრმა დიმიტრი მედვედევმა "Russian Today"-სთან ინტერვიუში განაცხადა, რომ თუ საქართველო 2008 წელს მომხდარ ფაქტს აღიარებს, დიპლომატიური ურთიერთობების აღდგენაზე საუბარი შესაძლებელია.

"ინტერპრესნიუსი"