ზურაბ წერეთელმა მაცხოვრის გიგანტური ქანდაკება ჩამოასხა

რუსეთში მოღვაწე ქართველმა მოქანდაკე ზურაბ წერეთელმა მაცხოვრის გიგანტური ქანდაკება ჩამოასხა. 33-მეტრიანი ძეგლი, რომლის სიმაღლეც ქრისტეს მიწაზე ცხოვრების წლების სიმბოლოა, 47-მეტრიან კვარცხლბეკზე აღიმართება. აღსანიშნავია, რომ მოსკოვში აღმართული პეტრე პირველის ძეგლი, რომლის ავტორი ასევე ზურაბ წერეთელია, უფრო მაღალია - მისი საერთო სიმაღლე 98 მეტრია.

"მაცხოვრის ხელის გულები ხალხისკენ არის მიპყრობილი, ეს რელიგიის მასწავლებელი ქრისტეა", - ასე ხსნის საკუთარ ჩანაფიქრს ოსტატი.

მონუმენტის შიგნით ტიტანის მტკიცე კარკასია დამონტაჟებული.

ჯერჯერობით უცნობია, სად აღიმართება მონუმენტი, - წერეთელი ფიქრობს, რომ ის სოჭში უნდა განთავსდეს და მზადაა ზამთრის ოლიმპიადის დედაქალაქს საკუთარი ნამუშევარი უსასყიდლოდ გადასცეს. ქალაქის ხელისუფლება ამის შესახებ ჯერჯერობით ინფორმირებული არ არის.

მომზადებულია eg.ru-ს მიხედვით.