ემი ვაინჰაუსის მამამ შვილის აქამდე უცნობი სიმღერა იპოვა

ემი ვაინჰაუსის მამამ განაცხადა, რომ შვილის დღემდე უცნობი სიმღერა იპოვა. ამის შესახებ ბრიტანული The Daily Star-ი წერს.

მიჩ ვაინჰაუსის თქმით, ჩანაწერი სტუდიაში ძველი მასალების გადარჩევის დროს აღმოაჩინეს. როდის გამოუშვებენ სიმღერას, მომღერლის მამას არ დაუკონკრეტებია.

როგორც პორტალი Digital spy აღნიშნავს, ამჟამად ემის მამა საკუთარ ალბომზე მუშაობს, რომლის გაყიდვიდან მიღებული შემოსავალი ქველმოქმედებას უნდა მოხმარდეს. არ არის გამორიცხული, რომ ნაპოვნი სიმღერა ამ ალბომში შევიდეს.

შეგახსენებთ, ემი ვაინჰაუსი 2011 წლის ივლისში 27 წლის ასაკში გარდაიცვალა. ის ლონდონში, საკუთარ სახლში  გარდაცვლილი იპოვეს. გარდაცვალების მიზეზი ალკოჰოლური თრობა გახდა. თავისი კარიერის მანძილზე მომღერალმა 2 ალბომი გამოუშვა და 20 მუსიკალური ჯილდო, მათ შორის 6 ”გრემი” მიიღო.

მომზადებულია The Daily Star-ის მიხედვით.