ბათუმში მოკლული მარიამ კოჩალიძის ოჯახს საცხოვრებლიდან ასახლებენ

ბათუმში მოკლული 17 წლის მარიამ კოჩალიძის ოჯახს დროებითი საცხოვრებლიდან ასახლებენ. როგორც კოჩალიძის დედამ, ჟუჟუნა ბერიძემ "ინტერპრესნიუსს" განუცხადა, ბათუმში, ჯავახიშვილის #72 ნომერში წლების განმავლობაში მუშაობს და ცხოვრობს, დღეს კი მიიღო წერილი ფართის დაცლის შესახებ:

"მთავრობას ვთხოვე, ეს ფართი ჩემთვის გადმოეცათ შეღავათიან ფასში, თავის დროზე გავარემონტე და შეძენაც მინდოდა. ჩემი ბინა იპოთეკით დავტვირთე და ბანკიდან კრედიტი გამოვიტანე. აღარც ეს ფართი მომყიდეს, ბინა კი ბანკმა წამართვა. მთავრობას დახმარებას ვთხოვდი, გასვენების დღეს კი წერილი მივიღე ფართი დაცალეთო. დღესაც მივიღე წერილი, ალბათ გამომასახლებენ და წასასვლელი არსად მაქვს", - აღნიშნა ჟუჟუნა ბერიძემ.

მისივე თქმით, დახმარების თხოვნით რამდენჯერმე მიმართა აჭარის უმაღლეს საბჭოს, აჭარის მთავრობას, ბათუმის საკრებულოს და საპატრიარქოს, თუმცა თხოვნა უშედეგოა.

ამასთან, ჟუჟუნა ბერიძე აღნიშნავს, რომ მისი შვილის გამოძიების საქმეზე ახალი არაფერია:

"დღიური, ტელეფონი, კომპიუტერი, ველოსიპედი, ტანსაცმელი არ დამიბრუნეს. მივაკითხე გამოძებას, მეუბნებიან არ დასრულებულა გამოძიებაო, მაჩვენეს 50 სანტიმეტრამდე თაბახის ფურცლები და მითხრეს ერთი ამდენი კიდევ დაემატებაო", - აღნიშან ჟუჟუნა ბერიძემ.

მარიამ კოჩალიძე ბათუმის ახალი ბულვარის ბოლოს 23 ივლისს მოკლული იპოვეს. მის მკვლელობაში ირანის მოქალაქეა ეჭვმიტანილი.

"ინტერპრესნიუსი"