საქართველოს ელჩის ინფორმაციით, კეზერაშვილი დიდი ალბათობით სამხრეთ საფრანგეთში იმყოფება

საქართველოს ელჩი საფრანგეთში დავით კეზერაშვილის დაკავების დეტალების და ადგილსამყოფელის გარკვევას ცდილობს. როგორც "ინტერპრესნიუსს" ეკატერინე სირაძე-დელონემ განუცხადა , თავდაპირველად არსებული ინფორმაციით, დაკავებული პარიზში იმყოფებოდა, თუმცა ამ დროისთვის განსხვავებული ცნობები ვრცელდება.

"გავრცელდა ინფორმაცია, რომ დაკავებული, დიდი ალბათობით, სამხრეთ საფრანგეთში იმყოფება. ჩვენ ვცდილობთ, დავადგინოთ მისი ადგილმდებარეობა, რათა მივიდეთ და გავეცნოთ, რა პირობებშია და როგორ არის დაკავებული, ასევე მივიღოთ ინფორმაცია, რა პროცედურები მიმდინარეობს. გვაქვს კონტაქტები ინტერპოლთან, ვცდილობთ, კავშირზე გავიდეთ პროკურატურასთან, რათა მოვიძიოთ მაქსიმალური ინფორმაცია", - განაცხადა ეკატერინე სირაძე-დელონემ.

ელჩის განმარტებით, სხვა მხრივ საელჩო ამ ეტაპზე არ ფლობს იმისგან განსხვავებულ ინფორმაციას, რაც საქართველოში ვრცელდება.

საქართველოს თავდაცვის ყოფილი მინისტრი დავით კეზერაშვილი საფრანგეთში დააკავეს. კეზერაშვილის დაკავების ფაქტს საქართველოს შინაგან საქმეთა სამინისტროში ადასტურებენ და განმარტავენ, რომ ამ თემაზე ოფიციალური განცხადება მოგვიანებით გავრცელდება.

დავით კეზერაშვილის წინააღმდეგ, ორი სისხლის სამართლის საქმეა აღძრული. თბილისის საქალაქო სასამართლოში მის წინააღმდეგ საქმეები განხილვის პროცესშია.

დავით კეზერაშვილს პროკურატურა ორ ეპიზოდში ედავება - ე.წ. სპირტის კონტრაბანდის და ტელეკომპანია "იმედის" გასხვისების საქმეებზე, სადაც კეზერაშვილი დედაქალაქის მერთან, გიგი უგულავასთან ერთად არის ბრალდებული.

"ინტერპრესნიუსი"