ნინო ბურჯანაძე - უცნაურია, რომ ჯერ ახალი პრემიერი არ დასახელებულა და მისი მოადგილე უკვე გადაწყვეტილია

"უცნაურია, რომ ჯერ ახალი პრემიერ-მინისტრი არ დასახელებულა და მისი მოადგილე უკვე გადაწყვეტილია", - ამის შესახებ ჟურნალისტებს "დემოკრატიული მოძრაობის" პრეზიდენტობის კანდიდატმა ნინო ბურჯანაძემ განუცხადა.

რაც შეეხება არსებულ ინფორმაციას, რომ მთავრობის თავმჯდომარის პოსტზე ბიძინა ივანიშვილის შემცვლელი ჯანდაცვის მინისტრი დავით სერგეენკო იქნება, ბურჯანაძე აღნიშნულის კომენტირებისგან წინასწარ თავს იკავებს, თუმცა განმარტავს, რომ ბიძინა ივანიშვილის პოლიტიკიდან წასვლის გადაწყვეტილება სამწუხაროა.

"რატომ უნდა ვიმარჩიელოთ, რეალურად გამოცხადდეს ვინ იქნება კანდიდატი და ამაზე შემდეგ ვისაუბროთ. უბრალოდ უცნაურია, რომ ჯერ ახალი პრემიერ-მინისტრი არ დასახელებულა და უკვე მისი მოადგილე გადაწყვეტილია. კიდევ ერთხელ ვიმეორებ, რომ სამწუხაროა, ბიძინა ივანიშვილის მიერ პოლიტიკიდან წასვლის გადაწყვეტილება - თუ ის ფიქრობდა, რომ საჭირო იყო თავის კოალიციაზე ზემოქმედება ჰქონოდა, ის ხელისუფლებაში უნდა დარჩენილიყო. სხვა შემთხვევაში, ეს უბრალოდ გაუგებარ ფორმებს მიიღებს და შეიძლება კოალიციის დაშლაც კი გამოიწვიოს", - განაცხადა ნინო ბურჯანაძემ.

მისივე შეფასებით, აღნიშნულის მიუხედავად, ის ივანიშვილის პირად გადაწყვეტილებას პატივს სცემს.

"ინტერპრესნიუსი"