ხელისუფლება უშიშროების საბჭოს ფუნქციების პრეზიდენტსა და მთავრობას შორის გადანაწილებაზე მუშაობს

ხელისუფლება ეროვნული უშიშროების საბჭოს ფუნქციების პრეზიდენტსა და მთავრობას შორის გადანაწილებაზე მუშაობს. ამის შესახებ ჟურნალისტებს ახლად არჩეულმა პრეზიდენტმა გიორგი მარგველაშვილმა განუცხადა.

"საქმე ის არის, რომ რეალურად ახალ საკონსტიტუციო რეალობაში კრიზისული სიტუაციების ოპერატიული მართვა სწორედაც რომ მთავრობისა და პრემიერ-მინისტრის კომპეტენციაა. მეორე მხრივ, არსებობს კრიზისის პოლიტიკური მართვის საკითხი, სადაც კონსტიტუციის მიხედვით, გარკვეული კომპეტენციები პრეზიდენტს გააჩნია. შესაბამისად, ჩვენ ახალი რეალობიდან გამომდინარე ვმუშაობთ ფუნქციათა გადანაწილებაზე", - განაცხადა მარგველაშვილმა.

ახლად არჩეული პრეზიდენტის განმარტებით, აუცილებელია,  ეფექტურად იმუშაოს იმ სტრუქტურამ, რომელიც აქამდე თავიდან ბოლომდე პრეზიდენტის დაქვემდებარების ქვეშ იყო.

"ინტერპრესნიუსი"