დედაქალაქის ლიდერი თეატრი რეგიონის თეატრს დაეხმარება

მოზარდ მაყურებელთა თეატრი ბოლო წლებთან შედარებით, საგრძნობლად გააქტიურებულია. ილიას სახელმწიფო უნივერსიტეტის თანამედროვე ქართული თეატრის კვლევის ცენტრმა 2013 წლის შედეგები წარმოადგინა, რომლის მიხედვითაც, ნოდარ დუმბაძის სახელობის მოზარდ მაყურებელთა სახელმწიფო თეატრი რამდენიმე ნომინაციაში ლიდერობს. სახელმწიფო თეატრებიდან ყველაზე მეტი პრემიერა (23), რეგიონალური გასტროლი (15), წარმოდგენების რაოდენობა (618), დამსწრე მაყურებლის რაოდენობა (92.054) მას ჰქონდა.

2013 წლის ყველაზე პროდუქტიული ქალი მსახიობის ნომინაციაშიც აღნიშნული თეატრი ლიდერობს (ხატია მელქაძე, ნინო ლეჟავა, სალომე წურწუმია, ნინო არჩაია, ნინო პაპიაშვილი). ყველაზე პროდუქტიული მამაკაცი მსახიობები კვლაც ამ თეატრს ჰყავს (ვახტანგ ნოზაძე, ნიკოლოზ ნანიტაშვილი).

2013 წელს სხვადასხვა თეატრში მიწვეული მსახიობების რაოდენობრივი მაჩვენებლებითაც პირველია (ნიკოლოზ ნანიტაშვილი, ანა ზამბახიძე, გაგა შიშინაშვილი, მაია ხორნაული). ასე რომ, მოზარდ მაყურებელთა თეატრი ბოლო წლებთან შედარებით, საგრძნობლად გამოცოცხლებულია. ამასთან, საქველმოქმედო აქციებშიც აქტიურობს, თუ შარშანდელი წლის მიწურულს, კოჯრის ბავშვთა სახლისთვის განსაკუთრებული აქცია მოაწყო, 26 იანვარსაც საქველმოქმედო აქციის გასამართად ემზადება.

თათია პაქსაშვილი, თეატრის საზოგადოებასთან ურთიერთობის სამსახურის ხელმძღვანელი:

- სპექტაკლს "ფიფქია და 7 ჯუჯას" ზუგდიდის შალვა დადიანის სახელობის სახელმწიფო დრამატული თეატრის დასახმარებლად ვითამაშებთ და შემოსული თანხა მთლიანად გადაირიცხება ზუგდიდის თეატრის ანგარიშზე! ეს არის პირველი საქველმოქმედო აქცია ზუგდიდის თეატრის გადასარჩენად. თეატრებს შორის მოზარდ მაყურებელთა თეატრი პირველია, ვინც კოლეგებს დასახმარებლად გამოეხმაურა...

ლალი ფაცია