სასჯელაღსრულების სამინისტროს შენობაზე სოზარ სუბარის ფიტული ჩამოკიდეს (+ვიდეო)

საქართველოს სასჯელაღსრულების სამინისტროსთან დაპირისპირება მოხდა. მინისტრ სოზარ სუბარის საწინააღმდეგო აქციაზე, რომელსაც ორგანიზაცია "თავისუფალი ზონა" მართავდა , სიტყვიერი შელაპარაკება მოხდა. კერძოდ, "თავისუფალი ზონის" წარმომადგენლებმა სამინისტროსთან ბუშტებზე შებმული სოზარ სუბარის ფიტული, ასევე ინდაური მიიყვანეს და აქციას მართავდნენ.

სამინისტროსთან პოლიტპატიმრის სტატუსით გათავისუფლებული მიშა მესხი და რატი მაისურაძე მივიდნენ. აქციის მონაწილეებსა და მათ შორის სიტყვიერი დაპირისპირება მას შემდეგ მოხდა, რაც "თავისუფალი ზონის" წარმომადგენლებმა განაცხადეს, რომ ვანო მერაბიშვილი სოზარ სუბარის პირადი პატიმარია. პოლიტპატიმრის სტატუსით გათავისუფლებულები კი ვანო მერაბიშვილის საწინააღმდეგო განცხადებებს აკეთებდნენ.

სიტყვიერი დაპირისპირება მალევე განიმუხტა. რაც შეეხება აქციას, "თავისუფალი ზონის" წარმომადგენლებმა სოზარ სუბარის ფიტული სამინისტროს შენობასთან ჩამოკიდეს. შენობაში ინდაურის გაშვებაში კი მათ ხელი სამინისტროს დაცვის თანამშრომლებმა შეუშალეს. სოზარ სუბარისთვის მიყვანილი ინდაური ორგანიზაციის წარმომადგენლებმა სამინისტროს შესასვლელთან დატოვეს.

რაც შეეხება აღნიშნულ სიმბოლურ აქციას, როგორც აქციის ერთ-ერთმა ორგანიზატორმა, "თავისუფალი ზონის" წარმომადგენელმა სალომე მახარაშვილმა განაცხადა, სოზარ სუბარის უწყებიდან ვანო მერაბიშვილი უკანონოდ გაიყვანეს და ამაზე, სამინისტროს მხრიდან არც ერთი ქმედითი ნაბიჯი არ გადადგმულა.

"სოზარ სუბარი არის ინდაური და მას საჩუქრად სიმბოლურად ინდაური მოვუყვანეთ", - განაცხადა სალომე მახარაშვილმა.

იხილეთ ვიდეო