მარინე მიზანდარი - გურამ ოდიშარიას დიდი მომავალი არ უწერია

მარინე მიზანდარის განცხადებით, კულტურული მემკვიდრეობის შესახებ კანონპროექტზე, რომელიც ძეგლის სტატუსის მინიჭება-მოხსნის საკითხს ეხებოდა, კულუტურის სამინისტროს და მინისტრის პოზიცია ძალიან სუსტი იყო. ამის შესახებ კულტურის მინისტრის პირველი მოადგილის თანამდებობიდან გათავისუფლებულმა მარინე მიზანდარმა დღეს გამართულ პრესკონფერენციაზე განაცხადა.

მიზანდარის განმარტებით, ეს კანონპროექტი გულისხმობდა იმას, რომ მისი ძალაში შესვლის შემდეგ, ნებისმიერ უწყებას შეეძლებოდა ძეგლის სტატუსის მოხსნის საკითხის დაყენება მთავრობის წინაშე.

"აქაც ჩვენი სამინისტროს პოზიცია იყო ძალიან სუსტი. მინისტრმა აქაც ვერ დაიცვა დარგი. მიუხედავად იმისა, რომ ეს კანონპროექტი ინიცირებული გახლდათ ეკონომიკისა და მდგრადი განვითარების სამინისტროს მიერ, ჩვენ ვართ დარგობრივი სამინისტრო, ჩვენი უპირველესი მოვალეობაა ამ დარგის დაცვა და რაღაცნაირად, ასე ბურთის სხვის კალათში გადაგდება არ მიმაჩნდა გამართლებულად. ჩვენი მხრიდან ამას დროული და ადეკვატური რეაგირება არ მოჰყოლია. მოჰყვა მხოლოდ მას შემდეგ, რაც ძალიან დიდი პროტესტის ტალღა წამოვიდა პროფესიონალთა მხრიდან. ამის შემდეგ მოხდა სამინისტროს კუთხითაც რაღაც რეაგირება და მოლაპარაკების რეჟიმში გადასვლა, მაგრამ ეს არ იყო მტკიცე პოზიცია", - განაცხადა მიზანდარმა.

მან მაგალითად მოიყვანა ე.წ.მიხაილოვის საავადმყოფო და აღნიშნა, რომ იქ გარკვეული ინტერესები იყო, რომ აღმაშენებლის ქუჩაზე გამომავალ ორ შენობას მოხსნოდა ძეგლის სტატუსი, რასაც არ დათანხმდა.

"სამინისტრო ბოლო პერიოდში ვერ იცავდა სათანადოდ თავის პოზიციას. სამწუხაროდ, კულტურის სამინისტრო უფრო თავდაცვის პოზიციაში აღმოჩნდა. არამცთუ თავდაცვის პოზიციაში არ უნდა ყოფილიყო, არამედ პირიქით, ზოგჯერ თავდასხმის პოზიციაშიც უნდა ყოფილიყო იმდენად მნიშვნელოვანი საკითხები იყო სასწორზე", - განაცხადა მიზანდარმა.

მანვე აღნიშნა, რომ დღეს კულტურის სამინისტროში არის როგორ უწყებრივი, ასევე მართვის და ხედვის პრობლემები. მიზანდარი ამბობს, რომ სამინისტროს ახალი კადრები შეემატა, "რამაც მდგომარეობა კიდევ უფრო დაამძიმა".

კითხვაზე, უნდა გააგრძელოს თუ არა კულტურის და ძეგლთა დაცვის მინისტრის პოსტზე მუშაობა გურამ ოდიშარიამ, მარინე მიზანდარმა აღნიშნა, რომ თუ გააგრძელებს, ის წარმატებას უსურვებს.

"მაგრამ, ასეთი მიდგომით, მართვით და ასეთი დამოკიდებულებით პრინციპული საკითხებისადმი, მას დიდი მომავალი არ უწერია", - დასძინა მიზანდარმა.

"ინტერპრესნიუსი"