ჯორჯ ბუში თავის ნახატებს გამოფენს

აშშ-ის ექს-პრეზიდენტი ჯორჯ ბუში საკუთარი ნახატების გამოფენას გეგმავს. გამოფენა აპრილის დასაწყისში, დალასში გაიხსნება.

გამოფენაზე წარმოდგენილი იქნება 20-ზე მეტი პორტრეტი. ხელმოწერის ნაცვლად, ბუში ტილოებზე ციფრ ”43”-ს  წერს. უცნობია, ვინ არიან გამოსახული პორტრეტებზე. ნახატების გარდა, გამოფენაზე წარმოდგენილი იქნება ფოტოები ბუშის პოლიტიკური მოღვაწეობიდან.

როგორც ცნობილია, ბუში მხატვრობის გაკვეთილებსაც კი ესწრებოდა. აშშ-ის ექსპრეზიდენტს ფერწერისადმი ინტერესი უინსტონ ჩერჩილის წიგნის - Painting as a Pastime წაკითხვის შემდეგ გაუჩნდა.

"მე სრული სერიოზულობით ვეკიდები ფერწერას, მან ჩემი ცხოვრება შეცვალა. ფერწერა გაძლევს შემოქმედების და თვითგამოხატვის შესაძლებლობას და ეს მე ძალიან მომწონს",- განაცხადა ჯორჯ ბუშმა.

შეგახსენებთ, ჯორჯ ბუში-უმცროსი მხატვრობამ 2009 წელს, საპრეზიდენტო პოსტის დატოვების შემდეგ გაიტაცა.