ჯონ კერი - მოვუწოდებთ რუსეთს, 2008 წლის "ცეცხლის შეწყვეტის" შეთანხმების პირობები დაიცვას

აშშ-ის სახელმწიფო მდივანმა ჯონ კერიმ რუსეთს 2008 წლის აგვისტოში გაფორმებული "ცეცხლის შეწყვეტის" შესახებ შეთანხმებით გათვალისწინებული პირობების დაცვისკენ კიდევ ერთხელ მოუწოდა.

შესაბამისი განცხადება ჯონ კერიმ აშშ-საქართველოს სტრატეგიული პარტნიორობის კომისიის პლენარულ სხდომაზე გააკეთა, რომელსაც ირაკლი ღარიბაშვილთან ერთად უძღვება. მისივე განმარტებით, ბარიერების აღმართვა მათთვის მიუღებელია.

"რა თქმა უნდა, მილიტარიზაცია, საზღვრების გავლება, ბარიერების აღმართვა - ეს ჩვენთვის მიუღებელია და ჩვენ მოვუწოდებთ რუსეთს, რომ 2008 წლის "ცეცხლის შეწყვეტის" შეთანხმების პირობები დაიცვას და კონფლიქტურ რეგიონებში ჰუმანიტარული დახმარების განხორციელებას შესაძლებლობა მისცეს", - განაცხადა ჯონ კერიმ.

ამასთან, სახელმწიფო მდივნის თქმით, აშშ მიესალმება კონფლიქტის მშვიდობიანად გადაწყვეტის თაობაზე საქართველოს ხელისუფლების პოზიციას.

"თქვენი მცდელობა, კონფლიქტის მშვიდობიანად გადაჭრასთან დაკავშირებით, ასევე არის აღსანიშნავი და ჩვენ მას ვაფასებთ. შეერთებული შტატები მზადყოფნას გამოთქვამს საქართველოს ტერიტორიული მთლიანობის მხარდაჭერის თაობაზე", - დასძინა სახელმწიფო მდივანმა. მისივე შეფასებით, საქართველომ უკანასკნელი ათწლეულების განმავლობაში მსოფლიოს მრავალი სერიოზული მიღწევა დაანახა და დარწმუნებულია, რომ საქართველო-აშშ-ის ურთიერიერთობა მომავალში კიდევ უფრო წარმატებული იქნება.

იხილეთ ვიდეო

"ინტერპრესნიუსი"