ივანიშვილის "მორიდებული კრიტიკა" გურამ ოდიშარიას - "ის არ გადის "ძალიან კარგ მინისტრებს" შორის"

კულტურის მინისტრი არ გადის "ძალიან კარგ მინისტრებს" შორის, - ამის შესახებ საქართველოს ყოფილმა პრემიერ-მინისტრმა, სამოქალაქო მოძრაობა "მოქალაქის" ლიდერმა ბიძინა ივანიშვილმა "ტელეიმედის" გადაცემა "პოლიტიკის დროში" განაცხადა.

მისივე განმარტებით, მას მინისტრები "ძალიან კარგ" და "კარგ" კატეგორიებად ჰყავს დაყოფილი. "მე შემიძლია გითხრათ თამამად, რომ კულტურის მინისტრი არ გადის ძალიან კარგ მინისტრებში. კულტურის მინისტრი გადის იმ მინისტრებში, რომლებიც საჭიროებენ შემდგომ განვითარებას. მე დავყავი მინისტრები "ძალიან კარგად" და "კარგად". ცუდს არ ვეძახი, რადგან მათ გულწრფელად აქვთ სურვილი დაეხმარონ ქვეყანას და განახორციელონ, რაც ევალებათ საკუთარი პოსტიდან გამომდინარე, მაგრამ არ გამოსდით და ამიტომ ბევრი საჭიროებს განვითარებას", - აღნიშნა ბიძინა ივანიშვილმა.

ამასთან, ყოფილი პრემიერის შეფასებით, გურამ ოდიშარიას გამოცდილება, პრინციპულობა და გადაწყვეტილების მიღების დროულობა აკლია.

"ძალიან დიდ პატივს ვცემ, ძალიან კარგი ადამიანია, ძალიან გულწრფელია, მაგრამ ეს არ ყოფნის ყველაფერ იმას, რომ იყო პროფესიონალი და კარგად გამოგივიდეს ყველაფერი. აკლია მას გამოცდილება, პრინციპულობა, აკლია გადაწყვეტილების მიღების დროულობა და ა.შ", - აღნიშნა ბიძინა ივანიშვილმა.

"ინტერპრესნიუსი"