რა ცვლილებებს მოიტანს მთვარის დაბნელება მსოფლიოში და პროგნოზი ზოდიაქოს ყველა ნიშნისთვის

16 მაისს, 8:11-ზე, მორიელის ოცდამეექვსე გრადუსში ველოდებით მთვარის დაბნელებას, სავსემთვარეობაზე და ამით დაიხურება გაზაფხულის დაბნელებების დერეფანი. მზე ახლა კუროშია, მთვარე მორიელში. გააქტიურებულია კურო-მორიელის ღერძი - ფინანსები, რესურსები. მორიელის არის ტრანსფორმაცია, კრიზისი, პარტნიორის ფინანსები, კრედიტი, გადასახადები, ექსტრიმი, ფორსმაჟორული სიტუაცია. მორიელის მმართველი არის პლუტონი, რომელიც ახლა თხის რქაში და რეტროგრადული სვლაშია. მოსალოდნელია ცვლილებები მსოფლიო ეკონომიკაში, ფინანსურ და საბანკო სფეროში, გაზისა და ნავთობის თემებში.

მთვარის დაბნელებაზე მომატებულია ემოციურობა. მოერიდეთ დაპირისპირებას გარშემო მყოფებთან. მთვარის დაბნელება ეს არის საუკეთესო პერიოდი საქმეების, პროექტების დასასრულებლად, პატიებისთვის, მავნე ჩვევებისგან გასათავისუფლებლად. გათავისუფლდებით დამოკიდებულებების, ავადმყოფობისგან, შიშებისგან, ვალებისგან.

უნდა დაფიქრდეთ, რა რესურსებს ფლობთ, რამ უნდა მოგიტანოთ მატერიალური კეთილდღეობა. შეიძლება მიიღოთ შედეგი ადრე შესრულებული საქმისგან, პროექტისგან. ზოგადად, შეიძლება თავი შეგახსენოთ წარსულმა, განახლდეს ძველი ურთიერთობები, საქმეები. 2021 წლის შემოდგომაზე უკვე იყო ასეთი დაბნელება და გაიხსენეთ, რისი დასრულება დაიწყეთ, რას საქმიანობდით მაშინ, სად გსურდათ ცვლილებები? გაიხსენეთ, რა ხდებოდა 2004 წლის აპრილში, შეიძლება განმეორდეს მოვლენები. ან დაასრულოთ საქმეები, ურთიერთობები, რაც მაშინ დაიწყეთ.

ნუ გაგიკვირდებათ, თუ შეფერხდება ზოგიერთი საქმე, ნუ გაართულებთ დამოკიდებულებას ასაკით და თანამდებობით უფროს ადამიანებთან, მოგინდებათ განმარტოება, გაცივდება ურთიერთობები, - მზე სატურნთან კონფლიქტშია. ამასთან, მერკურიც რეტროგრადულია. იყავით მეტად დაკვირვებული. მოიმატებს დაძაბულობა, პასუხისმგებლობა, ვალდებულებების შესრულების აუცილებლობა. იყავით მომართული სულიერებაზე. კარგი იქნება შემოქმედებითი იდეების განხორციელება, ქველმოქმედება; მეტი დრო გაატარეთ ოჯახის წევრებთან ერთად. არ გადაიღალოთ, არ გადატვირთოთ გული, ხერხემალი.

გარდა ამისა, სიფრთხილე გმართებთ ქიმიურ ნივთიერებებთან, შხამ-ქიმიკატებთან (საოჯახო ქიმიასთანაც). საქმე იმაშია, რომ 18 მაისს მარსისა (ომის ღმერთი) და ნეპტუნის (ილუზიები, ტყუილები) შეერთება გველოდება, მაგრამ ასპექტი აქტიურია 14-დან 22 მაისის ჩათვლით და თან მთვარის დაბნელება ამძაფრებს სიტუაციას. შეიძლება გააქტიურდეს რელიგიური ექსტრიმზი. გამორიცხული არაა, გამომჟღავნდეს საიდუმლო. გაფრთხილდით, ილუზიებში, ტყუილებში გადავარდნილმა არ ჩაიდინოთ აგრესიული ქმედება ან ქველმოქმედების სახელით არ გახდეთ აფერისტების მსხვერპლი. დაპირისპირებულმა მხარეებმა შეიძლება გამოიყენონ ქიმიური ან ბიოლოგიური იარაღი. გამორიცხული არაა, დაბინძურდეს წყალი (შემთხვევით ან განზრახ), ან კატაკლიზმებმა იმატოს წყალზე. მაქსიმალური სიფრთხილე გმართებთ მათრობელა (ალკოჰოლი, ნარკოტიკი) ნივთიერებებთან, აგრეთვე, მედიკამენტებთანაც (მედიკამენტური მოწამვლა).

ვისზე იმოქმედებს ყველაზე მეტად მთვარის დაბნელება? რა თქმა უნდა, მორიელებზე. განსაკუთრებით 15-21 ნოემბრის შუალედში დაბადებულებს, აგრეთვე, მათზე, ვისაც მორიელში, უფრო კონკრეტულად კი 23-29 გრადუსში გყავთ პირადი პლანეტები ან მნიშვნელოვანი წერტილები. კირჩხიბებს (15-21 ივლისის შუალედში დაბადებულებს) და თევზებს (13-19 მარტის შუალედში დაბადებულებს) გაქვთ შანსი, მოიცილოთ ყველაფერი უსარგებლო და განვითარების უმაღლეს საფეხურზე გადაინაცვლოთ. ცოტა მეტი დაკვირვება გმართებთ კუროებს (13-19 მაისის შუალედში დაბადებულებს), ლომებს (15-21 აგვისტოს შუალედში დაბადებულებს) და მერწყულებს (11-17 თებერვლის შუალედში დაბადებულებს) დაკვირვებით მოაგვარეთ ფინანსური და სამემკვიდრეო საკითხები. არ გაართულოთ დამოკიდებულება მშობლებთან, პარტნიორებთან, ცვლილებებისთვის მოემზადეთ.

პროგნოზს გაეცანით თქვენი მზისა და ასცენდენტის ნიშნის მიხედვით:

ვერძი

ცვლილებები შეეხება თქვენს ფინანურ თემას: გახდებით ფინანსურად დამოუკიდებელი. მოგინდებათ ფულის დაბანდება სარფიან ბიზნესში. შეიძლება მიიღოთ სარგებელი პარტნიორის ფინანსებისგან, მემკვიდრეობა. უმეტესობა გაისტუმრებთ ვალებს, გადასახადებს. მთვარის დაბნელების შემდეგ მოიცილეთ ყველა უსარგებლო ნივთი. გათავისუფლდით არაფრისმომცემი ვალდებულებებისგან. შეიძლება გადაწყვიტოთ დაშორება თქვენს სექსუალურ პარტნიორთან ან პირიქით, ახალგაცნობილთან გახადოთ ურთიერთობა მეტად სერიოზული.

კურო

ცვლილებები შეეხება თქვენს პარტნიორულ ურთიერთობებს. ზოგიერთ საქმიან ან სასიყვარულო პარტნიორთან დაასრულებთ ურთიერთობას; ან გადახვალთ ახალ საფეხურზე. გადაწყვეტთ გააფორმოთ ხელშეკრულება ან დაასრულოთ პროექტი, თანამშრომლობა. თუ მომსახურების სფეროში საქმიანობთ, შეიძლება ზოგიერთი კლიენტი დაგემშვიდობოთ, ადგილი გაუთავისუფლოს სხვას. შეიძლება გადაწყვიტოთ მეორე შვილის გაჩენა ან გაიგებთ, რომ გეყოლებათ. ცვლილებებს განსაკუთრებით იგრძნობთ 15-21 მაისის შუალედში დაბადებულები.

ტყუპი

ცვლილებები შეეხება თქვენს ყოველდღიურობას, ჯანმრთელობის სფეროს. მოგეხსნებათ ზედმეტი ვალდებულებები. გამოიცვლით სამსახურს ან სამუშაო გრაფიკს. ცვლილებები გელით, თუ შინ გყავთ შინაური ცხოველები. გაფრთხილდით, რომ არ გაგექცეთ. თუ რამე დაავადება გაწუხებდათ, გამონახავთ ექიმს ან მკურნალობის ახალ მეთოდს და განიკურნებით. კარგი იქნება სამედიცნო კვლევის ჩასატარებლად. მთვარის დაბნელება საუკეთესო დროა მავნე ჩვევებისგან გასათავისუფლებლად. ძილის, კვებისა და დასვენების გასაუმჯობესებლად.

კირჩხიბი

ცვლილებები შეეხება პირადი ურთიერთობების სფეროს: გადაწყვეტთ დაწყვილებას, დასრულდება თქვენი მარტოობა. დაასრულებთ შემოქმედებით პროექტს, ზოგიერთი კი პირიქით, გაიხსენებს და განავითარებს ჰობის. იმატებს დღესასწაულებზე დასწრების, მოწყობის სურვილი, საბავშვოსიც. ზოგიერთმა შეიძლება გაიგოთ, რომ შვილი გეყოლებათ ან ცვლილებები ელით თქვენ შვილებს. ცვლილებებს განსაკუთრებით იგრძნობთ 17-22 ივლისის შუალედში დაბადებულები.

ლომი

ცვლილებები შეეხება თქვენს საოჯახო სფეროს: დაკავდით უძრავ ქონებასთან დაკავშირებული საკითხების მოგვარებით (ყიდვა-გაყიდვა, არენდა). შეიძლება მოგიწიოთ მისამართის შეცვლა, ემიგრაცია. თუ ბინაში რემონტი გქონდათ ან სახლის მშენებლობა, დაასრულებთ. ზოგიერთს შეგეცვლებათ ოჯახური მდგომარეობა: დაქორწინება ან განქორწინება გელით. ცვლილებებს განსაკუთრებით იგრძნობთ 17-22 აგვისტოს შუალედში დაბადებულები.

ქალწული

ცვლილებები შეეხება თქვენი სწავლის, ახლო ურთიერთობების სფეროს: შეიძლება დაასრულოთ სასწავლო კურსი (მაგ., ავტომობილის მართვის) ან პირიქით, გადაწყვიტოთ სასწავლო კურსებზე ჩაწერა. მოგინდებათ გაჯეტების, ავტომობილის შეცვლა, მაგრამ სანამ მერკური რეტროგრადული სვლიდან არ გამოვა არ გირჩევთ. დაფიქრდით, რა გიშლით ხელს განვითარებაში, რა უნდა მოიცილოთ, რისგან უნდა გათავისუფლდეთ რომ წარმატებას მიაღწიოთ. ზოგიერთს შეიძლება შეგეცვალოთ სამეგობრო, სამეზობლო. ნუ გაართულებთ დამოკიდებულებას და-ძმებთან. ცვლილებებს განსაკუთრებით იგრძნობთ 17-22 სექტემბერს შუალედში დაბადებულები.

სასწორი

ცვლილებები შეეხება თქვენს მატერიალურ სფეროს: მიიღებთ შედეგს, ფულს, ფინანსურ დამოუკიდებლობას ან შემოსავლის დამატებით წყაროს. აიმაღლებთ თვითშეფასებას, თუ მომსახურების სფეროში ხართ, გააძვირებთ თქვენს მომსახურებას. გააფორმებთ ყიდვა-გაყიდვის საბუთებს. დასრულდება საქმეები, ურთიერთობები. ზოგიერთი იყიდით ძვირად ღირებულ ნივთს.

მორიელი

მთვარის დაბნელება თქვენს ნიშანში ხდება და ცვლილებები შეეხება თქვენს პიროვნებას. დაფიქრდით, როგორ უნდა გაიუმჯობესოთ საკუთარი თავი, ჯანმრთელობა, მდგომარეობა საზოგადოებაში. ცვლილებები გელით პირად ცხოვრებაში: ახალი ნაცნობობა, ურთიერთობების გაუმჯობესება, განვითარება ან დასრულება. დაფიქრდით, რა საქმიანობა, მიმართულება მოგიტანთ წარმატებას. დაასრულებთ პროექტს ან წამოხვალთ სამსახურიდან. ზოგიერთმა შეიძლება გადაწყვიტოთ გარეგნობის შეცვლა (იმიჯი, სტილი). მთვარის ამ დაბნელების დროს უნდა დატოვოთ წარსული წარსულში. გათავისუფლდით მავნე ჩვევებისგან; ყველაფრისგან, რაც სიამოვნებას აღარ განიჭებთ. ნუ გაეკიდებით იმას, რაც თქვენგან მიდის, პირიქით, გაუთავისუფლეთ ადგილი ახალს. ცვლილებებს განსაკუთრებით იგრძნობთ 17-21 ნოემბრის შუალედში დაბადებულები.

მშვილდოსანი

საინტერესო ცვლილებების დრო დაგიდგათ. უნდა გამოუთავისუფლოთ ადგილი ყველაფერ ძველს, უსარგებლოს, რათა დაიწყოთ ახლის მშენებლობა, კეთება. მიიღებთ შედეგს ადრე შესრულებული საქმისგან. თუ იყავით იზოლაციაში ან დახურული ტიპის დაწესებულებაში მუშაობდით, გამოხვალთ იზოლაციიდან. გათავისუფლდებით უსარგებლოსგან. ეს შეიძლება იყოს სამსახური, ურთიერთობა, დაავადება. ზოგიერთი კი ემიგრაციაში გადაწყვეტს წასვლას. გათავისუფლდებით ფინანსური და მორალური ვალებისგან. კარგ შედეგს მოგიტანთ წმინდა ადგილების მონახულება, ლოცვა. იმატებს უჩვეულო მომენტები თქვენს ცხოვრებაში. თუ ფარული ურთიერთობა გქონდათ, ან დააასრულებთ, ან გამოამჟღავნებთ.

თხის რქა

ცვლილებები შეეხება თქვენს სოციუმის სფეროს. ცვლილებები გელით პირად ურთიერთობაში - გადაწყვეტთ, გააგრძელოთ ურთიერთობა, თუ წერტილი დაუსვათ. მომავალ მეწყვილს შეიძლება მეგობრებმა შეგახვედრონ ან ინტერნეტში გაიცნოთ. ზოგიერთმა შეიძლება დაასრულოთ ინტერნტპროექტზე მუშაობა გამოხვიდეთ ჯგუფიდან, თუ ის აღარ შეესაბამება თქვენს ინტერესებს, გაწყვიტოთ კავშირი თანამოაზრეებთან. მიიღოთ შედეგი ადრე შესრულებული საქმისგან. შეგეცვლებათ სამეგობრო წრე; ზოგიერთს დაემშვიდობებით. მიიღებთ შედეგს, აგისრულდებათ სურვილი, მიზანი. ახალი ბავშვები შეიძლება გამოჩნდნენ თქვენს ცხოვრებაში: ნათლული, გერი. ცვლილებებს განსაკუთრებით იგრძნობთ 15-19 იანვრის შუალედში დაბადებულები.

მერწყული

ცვლილებები შეეხება თქვენს კარიერულ სფეროს. შეიცვლით სტატუსს, მიიღებთ შედეგს, თანამდებობას ან გადაწყვეტთ, სამსახურიდან, ბიზნესიდან წამოსვლას ან პენსიაში გახვალთ. შეგეცვლებათ სტატუსი: თუ დაქორწინებული ხართ შეიძლება განქორწინდეთ ან დააკანონთ თქვენი კავშირი. მიიღებთ მემკვიდრეობას, გადახვალთ საცხოვრებლად მდიდრულ ბინაში, პრესტიჟულ უბანში. მნიშვნელოვანი ცვლილებები ელით თქვენს მშობლებს. ცვლილებებს განსაკუთრებით იგრძნობთ 13-18 თებერვლის შუალედში დაბადებულები.

თევზები

სასიამოვნო ცვლილებები გელოდებათ. თუ საზღვარგარეთ აპირებდით გამგზავრებას სწავლის, მოგზაურობის ან ცხოვრების მიზნით, სასურველ შედეგს მიიღებთ. გაიცნობთ უცხოელს, რომელიც შეცვლის თქვენს ცხოვრებას. გადაწყვეტთ უმაღლესში ჩაბარებას ან დაასრულებთ სწავლას და დაიწყებთ პედაგოგიურ საქმიანობას, შექმნით თქვენს სასწავლო პროგრამას. თუ თქვენი საქმიანობა წერასთანაა კავშირში, შეიძლება დაიბეჭდოს თქვენი სტატია, გამოსცეთ წიგნი. თუ იურიდიულ საბუთებს აგროვებთ ან სასამართლოში გაქვთ შეტანილი სარჩელი, მიიღებთ შედეგს. გაიგებთ, რომ გეყოლებათ შვილიშვილი ან მათ ცხოვრებაში მოხდება ცვლილებები. ზოგიერთი შეწყვიტავთ ურთიერთობას მეუღლის ნათესავებთან. თქვენი მიზეზით ან თქვენგან დამოუკიდებელი მიზეზების გამო. ცვლილებებს განსაკუთრებით იგრძნობთ 15-19 მარტის შუალედში დაბადებულები.