"ავტომობილი ჩემი მეორე სახლია"

ჟურნალისტ ხატია სიჭინავასთვის ავტომობილი ცხოვრების განუყოფელი ნაწილია და მიუხედავად იმისა, რომ თვითნასწავლი მძღოლია, მიაჩნია, რომ როდესაც საჭეს უზის, მგზავრები არ ნერვიულობენ.

- მართვა 25 წლისამ ვისწავლე, როცა მანქანა შევიძინე. ავტომანქანა იმდენად მიყვარს და ისე მინდოდა მემართა, საჭეს რომ მივუჯექი, ყოველგვარი ავტოსკოლის გარეშე, თვითონ გავატარე.

- რომელი იყო შენი პირველი ავტომობილი?

- "ფოლკსვაგენ ჯეტა". ბანკიდან აღებული სესხით ვიყიდე. ახლა კი მინდა ჯიპი შევიძინო. ეს ავტომობილი გარეგნულად ძალიან მომწონს. მირჩევნია, ავტომატური კოლოფი ჰქონდეს, იმიტომ, რომ თვითნასწავლი მძღოლი ვარ და მექანიკასთან ვერ ვმეგობრობ.

- ხატია, პატრულთან როგორი დამოკიდებულება გაქვს, ხშირად გაჩერებენ?

- ყოველ ნაბიჯზე. თანაც ჩემი ავტომობილის სერიაა "XAT" და პირდაპირ ასე ყვირიან: "ხატია, მანქანა გადააყენე!". ერთხელ ისე გავბრაზდი, პატრულის შეურაცხყოფისთვის კინაღამ დამაპატიმრეს.

- ავტოსაგზაო შემთხვევა გქონია?

- რამდენიმე წლის წინ თავისუფლების მოედანზე ავტოავარიაში მოვყევი და სასიკვდილოდ დავშავდი. ეს აღდგომის ღამეს მოხდა და მიმაჩნია, რომ ამ დღის მადლმა გადამარჩინა.

- რას შეადარებ საკუთარ ავტომობილს?

- პეპელას, ისეთი ლამაზია. სალონში კი სულ გაზაფხულის სურნელი დგას.

- მანქანის ნომერს მნიშვნელობას ანიჭებ?

- მომწონს, როცა სერია ავტომობილის მფლობელის სახელს ემთხვევა. ამიტომაც ავიღე "XAT".

- ხშირად რეცხავ?

- ძალიან ხშირად. გოგოსავით ვუვლი... ავტომობილი ჩემი მეორე სახლია. შიგნით მინიგარდერობი მაქვს. მანქანაში მიდევს წმინდა ნიკოლოზის ხატიც, რომელიც ჩემი მფარველი წმინდანია.

- რომელი საგზაო ნიშანი გაღიზიანებს?

- "გაჩერება აკრძალულია".

- რომელია შენი ოცნების ავტომობილი?

- "ბე-ემ-ვე  ჯინა" ყველაზე მეტად მომწონს.

სოფო ყარალაშვილი

ყოველკვირეული გაზეთი ”ყველა სიახლე”

(გამოდის ხუთშაბათობით)