ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ ახალი პროექტი დაიწყო, რომლის ფარგლებშიც 10 000-მდე დევნილ ოჯახს საცხოვრებელი ფართი დაუკანონდება.
როგორც "ინტერპრესნიუსს" სამინისტროდან აცნობეს, დევნილთა მართლზომიერ მფლობელობაში არსებული საცხოვრებელი ფართების საკუთრებაში გადაცემის პროექტი, რომელიც მთავრობის განკარგულებით დამტკიცდა, 1-ელი ნოემბრიდან დაიწყო და 10 თვის განმავლობაში გაგრძელდება.
პროექტის ფარგლებში შესწავლილი იქნება 815-მდე დევნილთა ჩასახლება. პროექტი ორ ეტაპადაა დაყოფილი. პირველ ეტაპზე, 2 თვის განმავლობაში, მოხდება დევნილთა ჩასახლებების შესწავლა. მეორე ეტაპი, რომელიც 8 თვე გაგრძელდება, დევნილებისთვის საცხოვრებელი ფართების საკუთრებაში გადაცემას ითვალისწინებს.
აღნიშნული პროექტის წარმატებით განსახორციელებლად სამინისტრომ დროებით 64 ახალი თანამშრომელი აიყვანა. კადრების შერჩევა ღია კონკურსის წესით განხორციელდა. შერჩეული კანდიდატები მუშაობას ორდღიანი ტრენინგის გავლის შემდეგ დაიწყებენ.