მოსკოვში აფხაზეთის ექსპრეზიდენტი ვლადისლავ არძინბა გარდაიცვალა. აფხაზეთის ყოფილი პრეზიდენტი ვლადისლავ არძინბა 64 წლის ასაკში მოსკოვის ცენტრალურ კლინიკურ საავადმყოფოში 4 მარტს, დილით გარდაიცვალა. ამის შესახებ ”ინტერფაქსს” არძინბას ქვრივმა, სვეტლანა არძინბამ აცნობა.
მისი თქმით, მძიმე მდგომარეობაში მყოფი არძინბა სოხუმიდან მოსკოვში რუსეთის ფედერაციის საგანგებო სიტუაციების სამინისტროს სპეცთვითმფრინავით გადაიყვანეს.
ვლადისლავ არძინბა 1945 წლის 14 მაისს სოხუმის მახლობლად, სოფელ ქვემო ეშერაში დაიბადა. სკოლა და პედაგოგიური ინსტიტუტი სოხუმში დაამთავრა.
1969-87 წლებში ცხოვრობდა მოსკოვში. იქვე, საბჭოთა კავშირის მეცნიერებათა აკადემიის აღმოსავლეთმცოდნეობის ინსტიტუტში დაიცვა საკანდიდატო დისერტაცია.
1987 წელს არძინბა სოხუმში დაბრუნდა, სადაც ენის, ლიტერატურისა და ისტორიის აფხაზურ ინსტიტუტს ხელმძღვანელობდა.
1989-91 წლებში იყო სახალხო დეპუტატი და საბჭოთა კავშირის უმაღლესი საბჭოს წევრი.
1990 წელს იგი აფხაზეთის უმაღლესი საბჭოს თავმჯდომარედ აირჩიეს, 1994-2005 წლებში კი არაღიარებული რესპუბლიკის პრეზიდენტი იყო.
მომზადებულია bbc.co.uk-ის და ”ინტერფაქსის” მიხედვით
