დასვენება "დანაღმულ" რეგიონში - რუსული ტურისტული კომპანიები აფხაზეთში მუშაობის გაუქმებაზე საუბრობენ

"არ ჩანს პერსპექტივა, რომ აფხაზეთში, თუნდაც ტურისტულ სეზონზე ვითარება უსაფრთხოების მხრივ გამოსწორდება; ვერც გზებზე დარეგულირდა, ტურისტებს ისე ყვლეფენ როგორც უხერხდებათ, ზოგი იარაღით, ზოგიც "კანონით"... ვითომ სიიაფის გამო, მაინც მიდიან აფხაზეთში, რისკავენ, ჯანმრთელობისა და სიცოცხლის ფასად; იქ დასვენება დანაღმულ ველზე სიარულს ჰგავს. ამიტომაც იქნებ, სხვა გზა არსებობდეს, რამე უკეთესი, რომ არ გარისკოს ხალხმა... იმის ნაცვლად, რომ ერთადერთი შემოსავლის წყაროს შენარჩუნებას ადგილობრივი მოსახლეობა თავად ითხოვდეს და კრიმინალს საზოგადოებრივი პროტესტით მოჰყვეს, ადგილობრივები ამას იმით ამართლებენ, რომ თურმე სამუშაო არ არის და ახალგაზრდები იძულებულნი არიან იქურდონ და იყაჩაღონ", - წერენ რუსები სოციალურ ქსელებში...

აფხაზეთში არსებული უმძიმესი კრიმინოგენული ვითარების პასუხად, რუსულ მედიაში ვრცელდება ინფორმაცია, რომ შესაძლოა, რუსულმა ტურისტულმა კომპანიებმა, აფხაზეთის მიმართულებით მუშაობა შეწყვიტონ... მათივე ინფორმაციით, ბოლო წვეთი, აფხაზეთში სამხედრო საწყობის აფეთქება გახდა, რომლის შედეგადაც, რუსეთის ორი მოქალაქე დაიღუპა და 30-მდე დაშავდა.

რამდენიმე დღის წინ, რუსეთის ე.წ. საელჩომ გააფრთხილა თავისი მოქალაქეები, აფხაზეთში დასვენებისას, სიფრთხილე გამოიჩინონ... საქმე ის არის, ბოლო დროს, რუსების მიმართ მზარდი აგრესია იგრძნობა; - მათი შევიწროების მიზეზი მხოლოდ ყაჩაღობა და "ფინანსური შემოსავალი" არ არის.

აფხაზური მედიის ინფორმაციით, 4 აგვისტოს, გუდაუთის რაიონში, სოფელ ხიპსტაში, რუსების სახლი დააყაჩაღეს. ანატოლი ივანოვი და ვალენტინა ბიკოვეცი აფხაზეთში, კონკრეტულად გუდაუთაში, საცხოვრებლად დიდი ხნის წინ ჩამოვიდნენ. მათ აქ სახლი იყიდეს და გაარემონტეს.. (აფხაზურ მედია არ აკონკრეტებს, ეს სახლი ქართველის იყო თუ არა, რომელიც შემდეგ აფხაზმა მიისაკუთრა...) მათ, ბელორუსიდან ჩამოსული ნათესავი, ვადიმ ლუგინი ეხმარებოდა. ღამის 3 საათისთვის, მათ ნიღბიანი შეიაღებულები შეუვარდნენ და ძალის გამოყენებით დააყაჩაღეს. როგორც სახლის დიასახლისი, ვალენტინი აცხადებს, ის თავის გადარჩენას ცდილობდა, რა დროსაც მეორე სართულის ფანჯრიდან გადახტა და მოტეხილობები მიიღო... ის გუდაუთის საავადმყოფოში გადაიყვანეს.

ადგილობრივი მოსახლეობის თქმით, მსგავსი ფაქტები გუდაუთაში არაერთხელ მომხდარა, თუმცა, რუსული დიასპორის მოთხოვნის მიუხედავად, არც ერთი დანაშაულის საქმე არ გახსნილა. ადგილობრივ ე.წ. მილიციაში, მათ მიმართ განხორციელებული დანაშაულის გარდა, დიდი რაოდენობით დახურული "საქმე" ინახება.

სწორედ ასეთი მძიმე ფონი გახდა მიზეზი, რომ აფხაზეთში რუსული ტურისტული კომპანიები მუშაობის გაგრძელებაზე დაფიქრდნენ.

"ტურისტული კომპანიები არ გამორიცხავენ, რომ ამ ქვეყნაში შეძენილი ტურების გაუქმების მოთხოვნით განცხადებები შევიდეს ", - აცხადებს რუსეთის ტურისტული ინდუსტრიის კავშირის პრეს-მდივანი, ირინა ტიურინა.

ლალი პაპასკირი

AMBEBI.GE