"გასულ კვირას კიევში "გაიშნიკების რეიდში" მოვხვდი" - ეკა ხერხეულიძე
"ნაციონალური მოძრაობის" ერთ-ერთი წევრი ეკა ხერხეულიძე "ფეისბუქზე" პოსტს აქვეყნებს, რომელშიც უკრაინაში "პოლიციელებთან" გადამხდარ ისტორიას აღწერს.
"გასულ კვირას კიევში "გაიშნიკების რეიდში" მოვხვდი. უმიზეზოდ გაგვაჩერეს, ცხადია. ისე, როგორც დიადი საბჭოეთის დროს ხდებოდა ხოლმე. ცარიელ გზაზე მოულოდნელად ჩნდებოდნენ საშოვარზე გამოსული მილიციონერები და ზუსტად ისე მრავლდებოდნენ, როგორც ნაწვიმარზე სოკო.
მანქანას რიგითი ღიპიანი მოუახლოვდა, მძღოლს საბუთები მოსთხოვა და მიუხედავად იმისა, რომ ყველაფერი წესრიგში ჰქონდა, მაინც გაკვირვებული გვიყურებდა, რით ვეღარ ხვდებით, თუ გზის გაგრძელება გსურთ, როგორ უნდა მოიქცეთო...
გემახსოვრებათ ალბათ, ასეთი რიგითი გაიშნიკებისგან მოშორებით, მანქანაში ისხდნენ ამ საქმის ბოსები, კიდევ უფრო დიდი ღიპებით საჭესთან გაჭედილები. სწორედ მათთან უწევდათ "ურჩ მძღოლებს" საქმის გარკვევა. ჩვენ შემთხვევაშიც ასე მოხდა, მძღოლს ბოლო საზვერეს გავლა ისე მოსთხოვეს, რომ მგზავრების ეკიპაჟისთვის თვალი არც შეუვლია. ჩემი დანახვა განზრახვას რომ ვერ შეუცვლიდა, გასაგებია, მაგრამ წინ ერთი საინტერესო კაცი იჯდა, ადამიანი, რომელიც თმენით უყურებდა მახინჯ სისტემას და ზუსტად იცოდა, რომ სულ რამდენიმე დღეში, ეს უბადრუკი მექრთამე და სხვა მისი მსგავსი უსახურები წარსულს ჩაბარდებოდნენ.
სიამაყით აღვსილი ვუყურებდი უნებლიედ შესწრებულ სცენას და ვფიქრობდი, სულ ცოტა ხნის წინ, ახლა უკვე კარგად დავიწყებული საძაგლობის პარალელურად, როგორ გვიწევდა ცხოვრება. ის რეფორმატორები, რომლებმაც ცხოვრების ახალი სტანდარტები დანერგეს, აქედან განდევნილები, დღეს სხვა ქვეყანაში ცვლიან ცხოვრების წესს იმის გათვალისწინებით, რომ მათი მტრებად შერაცხვის შემდეგ, ჩვენს ქვეყანაში სასიკეთოდ არაფერი შეცვლილა...
წუხელ კიევის ქუჩებში საპატრულო პოლიციის პირველი 500 კაციანი ეკიპაჟი გავიდა. მიხარია ქართული ბრენდის ექსპორტი და ქართველების წარმატება უკრაინის სახელმწიფო მოწყობის დიდ საქმეში", - წერს ხერხეულიძე.
"ჩემი ლედი" - ლელა წურწუმიას და "მამულიჩას" ემოციური ფოტო კონცერტის კულისებიდან
ჰააგაში, უძველესი ტაძრის სამრეკლოდან გია ყანჩელის მელოდიები მისი ხსოვნის პატივსაცემად აჟღერდა
