მოქალაქეები VS დავით ნარმანია - მერობის კანდიდატის პასუხები თბილისელების მწვავე კითხვებზე

თბილისი მალე ახალ მერს აირჩევს. მერობის რამდენიმე კანდიდატი უკვე ცნობილია, მათ შორისაა მმართველი გუნდის კანდიდატი - რეგიონალური განვითარებისა და ინფრასტრუქტურის უკვე ყოფილი მინისტრი დავით ნარმანია.

17 წლის იყო, როცა ზუგდიდის რაიონის სოფელ კოკიდან თბილისში სასწავლებლად ჩამოვიდა. ამბობს, რომ გაუცხოება არ ჰქონია, რადგან მისი თქმით, თბილისს აქვს უნარი, ისე დახვდეს სტუმარს, როგორც მას ეკადრება. რას პირდება ის თბილისელებს, მერობის კანდიდატი ინტერნეტკონფერენციის სტუმარია და მოქალაქეების შეკითხვებს პასუხობს.

შენიშვნა: გამოგზავნილი კითხვების სიმრავლის გამო  ერთი შინაარის კითხვები თემატურად დაკომპლექტებულია.

თამარი:

მაინტერესებს, ფეხით თუ გაგივლიათ ქალაქში და მიწისქვეშა გადასასვლელებით თუ გისარგებლიათ? ეს არის ქალაქის სირცხვილი, არც ერთმა მერმა არ მიხედა ამ პრობლემას. გაქვთ გეგმაში მიწისქვეშა გადასასვლელების რეაბილიტაცია?

-რასაკვირველია დავდივარ ქალაქში ფეხით, რომ დავათვალიერო ქალაქში არსებული მდგომარეობა. ვსარგებლობ მიწისქვეშა გადასასვლელებით და ჩემთვის ცნობილია ეს პრობლემა. ჩვენს პროგრამაში ერთის მხრივ არის მიწისქვეშა გადასასვლელების ინფრასტრუქტურის მოწესრიგების საკითხები. მეორეს მხრივ ასევე იქ არსებული მდგომარეობის გაუმჯობესება. მიწისქვეშა გადასასვლელებზე უნდა დამონტაჟდეს შესაბამისი კამერები,-როგორც უსაფრთხოების თვალსაზრისით, ასევე მონიტორი უნდა იყოს გარეთ გამოტანილი. ეს არის ერთერთი სისტემა იმისა, თუ როგორ ავირიდოთ მიწისქვეშა გადასასვლელები დაბინძურებისგან. ამ საკითხებთან დაკავშირებით აქტიურად გაგრძელდება მუშაობა. ასევე მიწისქვეშა გადასასვლელები იქნება ადაპტირებული შეზღუდული შესაძლებლობების მქონე პირებისთვის.

კახაბერი:

რას ფიქრობთ უბინაო თბილისელებზე, იქნებ შეიმუშაოთ საბინაო პროექტი ამ პრობლემის გადასაჭრელად, ან საბანკო პროექტი,რომ დაბალი ხელფასის პირობებში შევძლოთ სახლის ყიდვა გრძელვადიანი, შეღავათიანი კრედიტით.

-პრობლემა ჩემთვის ცნობილია და ყველა შეხვედრაზე, რომელსაც მე ვატარებ თბილისის რეგიონებში, მინიმუმ ორი-სამი ადამიანი მაინც მოდის, რომელსაც ეს პრობლემა აწუხებს. მასშტაბი არის ძალიან დიდი. თუმცა კონკრეტულად ცალკეული ფიზიკური პირებისთვის საბინაო ფონდის შექმნა არ არის მერიის უფლებამოსილება, მაგრამ სოციალური საცხოვრისები და მიუსაფარი ადამიანებისთვის შესაბამისი თავშესაფრის მშენებლობა მერიის ვალდებულებაა. ჩვენ ამ ადამიანებზე ვზრუნავთ. რაც შეეხება ამ საკითხს სხვა თვალსაზრისით, მერია ვერ ჩაერევა საბანკო სექტორის საქმიანობაში, მაგრამ მერიას შეუძლია კოორდინაცია გააკეთოს საბანკო სექტორსა და მშენებლებს შორის და შეასრულოს მედიატორის როლი, რათა დააინტერესოს, როგორ ერთი, ასევე მეორე მხარე. ის, თუ როგორ მოხდება კრედიტების განაწილება, ეს მხოლოდ საბანკო და სამშენებლო სექტორის გადასაწყვეტია.

ლალი:

წარმატებას გისურვებთ, ბატონო დავით. მაინტერესებს თქვენი ხედვა თბილისის მომავალი ინფრასტრუქტურის განვითარების კუთხით.

-ინფრასტრუქტურის განვითარება ერთ-ერთ მნიშვნელოვან ადგილს იჭერს. გვაქვს როგორ საგზაო ინფრასტრუქტურის მოწესრიგების, ასევე სანიაღვრე სისტემის, მიწისქვეშა გადასასვლელების, ტროტუარების მოწესრიგების საკითხები, მათ შორის საგზაო ინფრასტრუქტურა - საცობების განტვირთვის მიზნით გვაქვს მზა პროექტი. ასევე მიმდინარეობს ახალი პროექტების დამუშავება. პროგრამაში უფრო დეტალური ხედვებია მოცემული და ნებისმიერ დაინტერესებულ ადამიანს შეუძლია გაეცნოს ვებ-გვერდს.

ქეთათო:

გაგრძელდება თუ არა წინა მთავრობის დროინდელი მერიის უფასო კურსები ინგლისურსა და კომპიუტერში?

-ჩვენ დასაქმების ხელშეწყობის ოთხი მიმართულება გვაქვს და ერთ-ერთი არის ცალკეული პროფესიის ადამიანების გადამზადებისთვის ხელშეწყობა. ჩვენ ჩავატარებთ დედაქალაქში შრომის ბაზრის კვლევას და გვიჩვენებს, რა ტიპის გადამზადებაზე იქნება მოთხოვნა. ჩვენ გვინდა გავაკეთოთ ისეთი გადამზადების პროგრამები, რომლებიც მუნიციპალური სერვისების მიწოდების გაუმჯობესებაზე იქნება მიმართული და უხეშად არ ჩავერიოთ კერძო სექტორის საქმიანობაში. წინა ხელისუფლება, მიუხედავად იმისა, რომ ლიბერალური ეკონომიკური კუთხის მომხრე იყო, მაინც ერეოდა მათ საქმიანობაში და მათ შორის ასეთი კურსების შეთავაზება იყო კერძო სექტორის საქმიანობაში უხეში ჩარევა. თუმცა შეფასებებისა და კვლევის გარეშე გადაწყვეტილების მიღება არ მიგვაჩნია სწორად და ამიტომ  კვლევის ჩატარების შემდეგ მივიღებთ გადაწყვეტილებას.

მანანა:

მაინტერესებს, რას ფიქრობთ თბილისელების დასაქმებაზე, რადგან მათი უმრავლესობა არის უმუშევარი და კატასტროფული მდგომარეობაა. გთხოვთ დროულად მიხედოთ ამ საკითხს, რადგან ეს არის ნომერი პირველი პრობლემა!

-დასაქმება ძალიან მნიშვნელოვანი თემაა და უმუშევრობა დედაქალაქის პრობლემებიდან ყველაზე მწვავეა. ოფიციალური სტატისტიკით დედაქალაქის 30%-ზე მეტი არის უმუშევარი. უმუშევრობის პრობლემის მოგვარება ერთი ხელისმოსმით შეუძლებელია, თუმცა ჩვენ გვაქვს დასაქმების ხელშეწყობის ოთხი ძირითადი მიმართულება, რაზეც აქტიურად იმუშავებს მერია, რათა ხელი შევუწყოთ ადამიანების დასაქმებას. პირველი: ეს იქნება იმ პროექტების გაზრდა და დაფინასება, რომელიც მერიის ბიუჯეტიდან ფინანსდება, იმისთვის რომ ამ პროექტებში მეტი ადამიანი იქნას დასაქმებული. მეორე:  ეს არის მცირე და საშუალო ბიზნესის განვითარების ხელშეწყობა, რისთვისაც მერიაში შეიქმნება ბიზნეს საკონსულტაციო ცენტრი, ე.წ ბიზნესის ინკუბატორი, რაც მცირე და საშუალო ბიზნესში ადამიანების დასაქმების შესაძლებლობას მოგვცემს.

მესამე საკითხი იქნება ტურიზმის მშენებლობის და სხვა სექტორების მხარდაჭერა, რომელსაც მერია განახორციელებს, რათა ინვესტორების და დამატებითი ადამიანების დასაქმების ხელშემწყობად იქცეს. მეოთხე: გადამზადების პროგრამები, რასაც გავაკეთებთ მერიის ფარგლებში. რაც ადამიანებს მისცემს შესაძლებლობას იყვნენ ბაზარზე უფრო მეტად კონკურენტუნარიანები.

ნინო:

ბატონო დავით მაინტერესებს მარჩენალ დაკარგულებზე რამე სიახლეს თუ გეგმავთ ?

-მარჩენალდაკარგულები არიან ის კატეგორია, რომელსაც სოციალური დაცვა სჭირდებათ, თუმცა მათთვის ცალკე პროგრამა გაკეთდება. ჩვენ შესაბამისი კრიტერიუმები უკვე შევიმუშავეთ და ეს პროგრამა ჩაჯდება იმ 800 მილიონიან პროგრამებში, რომელიც ჩვენ დავაანონსეთ ჯანმრთელობის დაცვის და სოციალური უზრუნველყოფის თვალსაზრისით..

თამარი:

რა ქმედებების განხორციელებას აპირებთ ქალაქში არსებულ უსახლკარო ცხოველებთან დაკავშირებით? როგორც ცნობილია, ბოლო წლებში გაიხსნა მერიის მუნიციპალური თავშესაფარი, სადაც მიყავთ ქუჩის ცხოველები, მცირე რაოდენობას ცრიან, უტარებენ სტერილიზაციას და ბუნებრივ არეალში აბრუნებენ, დანარჩენების ბედი კი უცნობია. იქნებ მოგვეწვია რომელიმე ორგანიზაცია რომელიც არ პრობლემის გადაჭრაში დაგეხმარებათ.

-ჩვენ საერთაშორისო გამოცდილებას ვიცნობთ და საარჩევნო პროგრამაში ერთ-ერთი პუნქტი ეხება უპატრონო ცხოველებისგან ქალაქის და მოსახლეობის დაცვას. ჩვენი მოდელის მიხედვით უნდა გაფართოვდეს სარეაბილიტაციო ცენტრი. ვაპირებთ, აქტიურად ჩავრთოთ ის არასამთავრობო ორგანიზაციები, რომელბსაც გააჩნია შესაბამისი გამოცდილება და რესურსი, რათა იმუშაონ ჩვენთან ერთად და ერთობლივი ძალისხმევით მოვაგვაროთ დედაქალაქში არსებული ეს პრობლემა.

მზია მდინარაძე და 70 ოჯახი:

როდის გვეღირსება გზა, ტრიკოტაჟის (ზემო კუმისი) დასახლებაში?

-თბილისის იმ უბნებში სადაც რთული მდგომარეობაა, ჩვენ გავაკეთებთ გრაფიკს და მომდევნო წლების განმავლობაში ამ გრაფიკის შესაბამისად პერიოდულად აღვადგენთ გზებს. იქ, სადაც მოძრაობის ინტენსივობა არის მაღალი, ასეთი გზები პირველი რიგის პრიორიტეტბში მოხვდებიან, სხვა გზები შემდეგ პრიორიტეტებში და აქედან გამომდინარე წლის მეორე ნახევარში რისი აღდგენაც მოესწრება, სხვა დანარჩენს დავგეგმავთ მომდევნო წელს. მე ვფიქრობ, რომ ამ გზების რეაბილიტაცია მომდევნო წლის გეგმებში მოხდება.

გოჩა:

ბატონო დავით, დედაქალაქის ძველი უბნები წალეკა მეტალო-პლასტმასის ცეხების ხმაურმა და სიბინძურემ, სხვა პრობლემებთან ერთად უკვე აუტანელია ცხოვრება, მითუმეტეს ძველი თბილისის უბნებში, სადაც ავარიული ბინებია და ყველაფერი ისედაც ინგრევა..აპირებთ თუ არა ასეთი საწარმოების გატანას და შესაბამისის კანონმდებლობის შემუშავებას?

-მნიშვნელოვანია, სამრეწველო ტერიტორიები და უბნები ქალაქის ცენტრალური ნაწილისგან იყოს მოშორებული. ჩვენ როცა გავაკეთებთ ქალაქის განაშენიანების და განვითარების გენერალურ გეგმას, იქ ცალკე გამოიყოფა შესაბამისი სამრეწველო ზონები, უბნები, სადაც უფრო მეტი შეღავათები იქნება იგივე ორგანიზაციების, კომპანიების რეგისტრაციასთან და საქმიანობასთან დაკავშირებით, რათა კერძო სექტორმა ქალაქის ცენტრალურ უბნებში კი არ გახსნას მსგავსი პუნქტები, სადაც უფრო ძვირია საწარმოს გახსნა, არამედ გარეუბნებში, რითაც განიტვირთება ქალაქის ცენტრალური ნაწილი და კომპანიებისთვისაც უფრო საინტერესო იქნება ამ ტერიტორიებზე მუშაობა, ვინაიდან მეტი შეღავათების პირობებში უფრო იაფად აწარმოონ პროდუქტი.

თამილა:

დიდუბეში, აგლაძის 26-ის კორპუსის ქვეშ ნახევრად სარდაფებში, მარჯვნივ, მარცხნივ სკვერში და გარშემო სულ 100 ზე მეტი ავტოსარემონტო ობიექტებია განლაგებული, რამდენად მიზანშეწონილია ერთ პატარა ტერიტორიაზე ასეთი ეკოლოგიური დაბინძურება და როგორ მოაგვარებთ ამ საკითხს?

-მე ვიცნობ ამ პრობლემას და მქონდა მოსახლეობასთან შეხვედრა დიდუბეში, ჩვენ ამ პრობლემის მოგვარებას ვაპირებთ: უნდა შევიმუშაოთ სტანდარტები და რეგულაციები, რომლის მიხედვითაც, დასახლებულ პუნქტებთან ახლოს ეკოლოგიურად დაბინძურების მქონე საქმიანობა იქნება შეზღუდული და ობიექტების მეპატრონეებს მივცემთ გარკვეულ ვადას , რომ ასეთი ობიექტები დასახლებული ტერიტორიებიდან მოშორებით გაიტანონ. ეს არის მეორადი საბურავების გაყიდვა, საავტომობილო ზეთების გამოცვლა და ისეთი ტიპის საქმიანობა რაც ხმაურს იწვევს დასახლებული პუნქტებიდან მოშორებული უნდა იყოს.

ტატო:

როდიდან იგეგმება ლესელიძის ქუჩის სარეაბილიტაციო სამუშაოები?

-ლესელიძის ქუჩის და მის მიმდებარე სახლების რეაბილიტაციასთან დაკავშირებით- (ეს არის დღეს მოქმედი კოტე აფხაზის ქუჩა), გაკეთებულია კვლევები, რაც ინახება მერაიაში, ამიტომ როგორც კი შევალთ არჩევნების შემდეგ მერიაში, გავაკეთებთ ანალიზს და დავიწყებთ ინვესტორებთან მოლაპარაკებას.

გამაგრებითი სამუშაოიები ძირითადად მერიის დაფინანსებით გაკეთდება. კომუნიკაციების და ქუჩების მოწესრიგება მერიის უფლებამოსილება იქნება, მაგრამ უშულოდ სარებილიტაციო სამუშაოებში გვინდა აქტიურად ჩავრთოთ კერძო სექტორი, სხვა შემთხვევაში მერიის ბიუჯეტი ამას არ ეყოფა და ვერ გავწვდებით ამ პრობლემის მოგვარებას.

თამაზი:

ბატონო დავით,შეიძლება თუ არა მერიამ გაყიდოს საბავშვო მოედანი? ან გაყიდოს გამწვანების ზოლი, 40 წლიანი ნაძვის ხეები?

-დღეს მოქმედი კანონმდებლობა წინა ხელისუფლებას მორგებული აქვს ისეთნაირად, რომ ამის გაკეთება არის შესაძლებელი, ამას მე ვუწოდე "დაკანონებული უკანონობა", როცა შეიძლება განსაკუთრებული მნიშვნელობის ობიექტი საზოგადოებრივი საჭიროებიდან და სხვა მიზნიდან გამომდინარე მერიამ გაასხვისოს და მისცეს კერძო სექტორს განაშენიანებისთვის. ჩვენ ამ პრობლემის მოგვარებას ვხედავთ შემდეგნაირად: მოვახდენთ საკრებულოს შესაბამისი გადაწყვეტილების ცვლილებას, რომლის მიხედვითაც გამწვანების ზონების ამორიცხვა, სათამაშო მოედნების და სხვა მსაგავსი ობიექტების გაყიდვა იქნება შეუძლებელი. მაგრამ მეორეს მხრივ კერძო სექტორს სჭირდება განვითარება და გარკვეული ტერიტორია იქნება გამოყოფილი გენარალური გეგმით და იქნება ტერიტორიები, სადაც შესაძლებელი იქნება ამა თუ იმ ობიექტის გაკეთება.

თამო:

ახალგაზრდების დასაქმებაზე თუ იზრუნებთ?- უნივერსიტეტის დამთავრებისთანავე ყველგან გამოცდილებას ითხოვენ, თუ არ ამუშავეს გამოცდილებას ვერ მიიღებენ, თქვენ რას ფიქრობთ ამასთან დაკავშირებით?

-მე თვითონ, როგორც უნივერსიტეტის პრფესორს ხშორად მომისმენია ჩემი სტუდენტებისგან, რომ მათ ვერ იშოვეს სამსახური, იმიტომ, რომ ყველა, ვისაც სჭირდება სამსახურში კადრის აყვანა, ითხოვს გარკვეულ გამოცდილებას. მე ვფიქრობ, ასეთ შემთხვევაში უნდა მოვახერხოთ და ახალგაზრდები ჩავრთოთ მერიის ისეთ პროექტებში, რომლებიც არ საჭიროებენ ძალიან ზუსტ კვალიფიკაციას, აქედან გამომდინარე პრაქტიკასაც მიიღებენ და სამუშაო შტაჟში ჩაეთვალონ და შემდგომში გაუადვილდეთ სამუშაოს პოვნა. ახალგაზრდების ჩართულობას ეროვნული მიზნებისთვისაც დიდი მნიშვნელობა ექნება და ისინი გახდებიან თანამონაწილე მომავლის მშენებლობისა.

გიორგი:

მაინტერესებს, რა გეგმები გაქვთ სატრანსპორტო ინფრასტრუქტურასთან დაკავშირებით? აპირებთ თუ არა ავტობუსების დამატებას ან ახალი ხაზების დამატებას?

-ავტობუსებთან დაკავშირებით რამდენიმე პრობლემა არსებობს. იმისთვის, რომ სრული სურათი დავინახოთ, ჩვენ წელსვე გავაკეთებთ ავტოსატრანსპორტო ნაკადების კვლევას, რომლის ფარგლებში დადგინდება ის ტერიტორიები, სადაც არსებობს მოთხოვნა საქალაქო ტრასპორტზე და ხაზები არ არის, ან შედარებით უფრო იშვიათად დადის ტრანსპორტი, მაგრამ უფრო ინტენსიურ მოძრაობაზეა მოთხოვნა. აქედან გამომდინარე კვლევის საფუძველზე დავამატებთ ახალ ხაზებს. იქ სადაც არის სიჭარბე და გადატვირთულია ქალაქი-ასეთ შემთხვევაში, პირიქით, ამ ნაწილიდან მოხდება გარკვეული ხაზების განაწილება პერიფერიულ უბნებში.

ნანა:

მაინტერესებს, რა გეგმები გაქვთ კატასტროფულ მდგომარეობაში მყოფ სოლოლაკთან დაკავშირებით?

-სოლოლაკის მოსახლეობასთან მქონდა შეხვედრა და პრობლემა ძალიან მწვავეა. მოვამზადებთ პროექტებს, მერია იზრუნებს კომუნიკაციების და ინფრასტრუქტურის მოწესრიგებაზე, როგორიცაა: გზები და ტროტუარები, დანარჩენ შემთხევაში ვფიქრობთ აქტიურად ჩავრთოთ ინვესტორი კომპანიები.

დიანა:

როგორ აპირებთ გადაწყვიტოთ დასაქმების პრობლემა. მე მაგალითდ საჯარო სამსახურიდან იმის გამო გამათავისუფლეს, რომ არ ვიყავი ნაციონალური მოძრაობის წევრი და 6 წელია დაუსაქმებელი ვარ. რას გვპირდებით ჩემნაირებს?

-სამწუხაროდ ეს პრობლემა არის და ის, ვინც არ იყო "ერთიანი ნაციონალური მოძრაობის" ერთგული, ძალიან ბევრ შემთხვევაში დაითხოვეს სამსახურებიდან. სამსახურიდან დაითხოვეს ასევე განსხვავებული აზრის გამო. ჩვენი მიდგომაა, რომ პოლიტიკური კუთვნილებით და სხვა ნიშნით ადამიანების შერჩევა არ მოხდეს,- დაფასდეს ადამიანების მუშაობა. ამიტომ საჯარო კონკურსები გამოცხადდება მერიაში, ყველას ექნება თანაბარი შესაძლებლობები, თუმცა კონკრეტული მომენტიდან გამომდინარე საკანმომდებლო ცვლილებები მიმდინარეობს ადგილობრივი თვითმართველობის კანონმდებლობაში- თუ როგორი სამთავრობო პოლიტიკა და რეგულაციები იქნება, შესაბამისად, შემდგომა გავნახორციელებთ საკადრო პოლიტიკას.

გია ალავერდაშვილი:

რისი გამოსწორება გაგიჭირდებათ ყველაზე მეტად?

-ყველაზე მეტად გამიჭირდება იმის გამოსწორება, რაც პრაქტიკულად შეუძლებელია. ანუ, იქ, სადაც იერსახეს არ უხდება და შენობებია აშენებული. იქ, სადაც პარკებში და სკვერებში ობიექტებია აშენებული. ეს ის საკითხებია, რომლებიც პრაქტიკულად არის გამოუსწორებელი. სხვა საკითხებთან მიმართებაში გამოსწორების საშუალებები არსებობს, ზოგიერთი მათგანი ცოტა ძვირი ჯდება, მაგრამ ნაბიჯ-ნაბიჯ ყველაფერი უნდა გამოვასწოროთ.

კახაბერი:

მაინტერესებს, მე როგორც თბილისში მაცხოვრებელი, 24 წლის ახალგაზრდა რას უნდა ველოდო თქვენი მერად არჩევის შემდეგ? ვამთავრებ უმაღლეს სასწავლებელს სამართლის ფაკულტეტს და ამვდროულად მაქვს ძალიან ბევრ თბილისელთან უშუალო ურთიერთობა და ვიცი რა პრობლემები აქვთ. მინდა წვლილი შევიტანო ახალგაზრდების კვალიფიკაციის ამაღლებაში და ღირებულ მოქალაქედ ქცევაში.

-თუ სტუდენტია და დამთავრებული არ აქვს სასწავლებელი, მნიშვნელოვანია დაამთავროს. ჩამოყალიბდეს დიპლომირებულ, კვალიფიციურ სპეციალისტად. თუ მისი სურვილია, რომ სხვების განათლების და განვითარების საქმეში მიიღოს მონაწილეობა, რა თქმა უნდა მან პედაგოგიური საქმიანობა უნდა გააგრძელოს რომელიმე სასწავლებელში. თუ მას უნდა ჩაერთოს ტრენინგ-პროგრამებში, რომელსაც მერია განახორციელებს, რა თქმა უნდა ექნება შესაძლებლობა მიიღოს მონაწილეობა გადამზადების პროგრამებში.

ინგა:

როდის ეშველება ჩუღურეთს? შენობები, რომელშიც ხალხი ვცხოვრობთ თავზე გვენგრევა და ჩვენს სიცოცხლეს საფრთხეს უქმნის. გამაგრების თანხები იტალიურ ეზოში არავის გვაქვს, თანაც გამაგრებას აზრი არ აქვს. სასწრაფოდ გვჭირდება ქალაქის "თავისგან" სერიოზული პროექტი.

-ჩუღურეთის ერთი ნაწილის განვითარებასთან დაკავშირებით პროექტი არსებობს, თუმცა ეს არ მოიცავს მთლიანად ჩუღურეთის რაიონს. ჩუღურეთში საბინაო ფონი- ყველაზე მწვავე და ავარიულია. ის სახლები, რომლებიც გამაგრებას ექვემდებარება რა თქმა უნდა მერიის მიერ გამაგრდება და შესაბამისი პროგრამა იქნება ამისთვის ბიუჯეტში. ასევე მერია მოაწესრიგებს კომუნიკაციებთან დაკავშირებულ საკითხებს, მაგრამ როდესაც კერძო სახლებზეა საუბარი, ამ შემთხვევაში ჩვენ უბნობრივი პრონციპით უნდა წავიდეთ- უბნებში არსებული პრობლემა დეტალურად ავღწეროთ , დასკვნა დავდოთ და გაუკეთდეს შეთავაზება კერძო კომპანიებს, იმისთვის, რომ ააშენონ ახალი საცხოვრებელი, ნაწილი დაუთმონ იქ მაცხოვრებლებს და სხვა დანარჩენი გაყიდონ, რათა მიიღონ მოგება. ამ პერიოდში ეს ადამიანები იქნებიან გამოსახლებულები და სანამ კორპუსი აშენდება და დასრულდება, მანამდე ქირის დაფინანსებას მოახდენს მერია.

რაისა:

წლებია ვცხოვრობთ არადევნილებთან ერთად და ვართ ყველა რეგისტრირებული სამოქალაქო რეესტრში. 58 ოჯახი დღემდე ველოდებით საკუთრების დამადასტურებელ ფურცელს ეკონომიკის სამინისტროსგან.

-ეს საკითხები ეტაპობრივად გვარდება სახელმწიფოს მიერ, მერიაში მოსული ყველა ეს პრობლემა იქნება ჩვენი მხრიდან შესწავლილი, გავაკეთებთ შუამდგომლობას ეკონომიკის სამინისტროში. ხოლო ის ადამიანები, ვინც ცხოვრობენ მერიის საკუთრებაში არსებულ ქონებაში, ამასთან დაკავშირებით მერიასა და საკრებულოში იმუშავებს სპეციალური კომისია და მოხდება ამ საქმეების განხილვა და შესაბამისი გადაწყვეტილებების მიღება.

ელენე:

ბატონო დავით, სითი პარკს რას უპირებთ გამარჯვების შემთხვევაში?

-სითი პარკის დოკუმენტაცია ჩვენ დეტალურად გვაქვს შესწავლილი. იმდენად კაბალური ხელშეკრულებაა მასთან დადებული, რომ შეიძლება მწვავე ადმინისტრაციული ზომები ვერ გამოვიყენოთ. თუმცა შევეცდებით გარკვეული საკითხები, რაც ძალიან მწვავეა და პრობლემური-ასეთ საკითხებთან დაკავშირებით ვიმუშაოთ. ეს არის: ავტომანქანების დატაცება და ავტოსადგომებზე წაყვანა. რამდენიმე სასამართლო პროცესი მოიგო კიდეც ავტომანქანების მესაკუთრეებმა. (იყო კურიოზული შემთხვევაც, როცა ავტომანქანაში ბავშვი იჯდა და ბავშვიანად წაიყვანეს ავტომანქანა). მე ვფიქრობ, რომ ეს კანონმდებლობასთან და მორალურ ნორმებთან წინააღმდეგობაში მოდის და ეს აუცილებლად უნდა დათმოს სითი პარკმა.

ნანიკო:

რას ფიქრობთ "პანორამა თბილისი"-ს შესახებ. კერძოდ თუკი აღმოჩნდება, რომ ამ პროექტის განხორციელება არღვევს თბილისის იერსახეს და ეწინააღმდეგება გარემოს დაცვის პრინციპებს, მისცემთ თუ არა უფლებას განხორციელდეს ეს პროექტი?

-ღრმად ვარ დარწმუნებული, რომ თუ პროექტი მოვა წინააღმდეგობაში გარემოს დაცვით, თუ არქიტექტურულ სკითხებთან, მას ინვესტორი არ განახორციელებს. ინვესტორი მზად არის გააკეთოს ისეთი პროექტი, რომელიც შესაბამისობაში იქნება ქალაქის ისტორიულ ნაწილთან და შესაბამისი პროცედურების გავლის შემდეგ დაიწყებს პროექტის განხორციელებას.

ნებისმიერი ქალაქის მერი ინატრებდა მის ქალაქში ნახევარმილიარდ დოლარიანი ინვესტიციის განხორციელებას, იმიტომ, რომ როგორც ეკონომიკური, ასევე სოციალური თვალსაზრისით ძალიან მნიშვნელოვანია. განვითარდება სამშენებლო სექტორი, ბიუჯეტში გადასახადების გადახდა გაიზრდება. ადამიანები დასაქმდებიან და ოჯახებში გაჩნდება დამატებითი შემოსავალი, როგორც მშენებლობის, ასევე შემდგომი ექსლუატაციის პროცესში. რაც შეეხება იერსახესთან და გარემოსდაცვასთან დაკავშირებულ საკითხებს, ჩემი პოზიცია არის ის, რომ პროექტი უნდა მომზადდეს კონკურსის წესით ისეთნაირად, რომ შესაბამისობაში იყოს ქალაქის ისტორიულ ღირებებულებთან და კულტურულ მემკვიდრეობასთან. მოეწყოს ფართო განხილვები ურბანისტებთან, გეგმის სპეციალისტებთან, გარემოს დამცველებთან, არქიტექტორებთან და ამის შემდეგ მოხდეს გადაწყვეტილების მიღება.

არჩილი:

როგორ აპირებთ ბატონო დავით, თბილისში საცობების პრობლემის მოგვარებას?!

-თბილისში საცობების პრობლემის მოგვარება ერთ-ერთი მწვავე პრობლემაა. თუმცა რამდენიმე კომპლექსური ღონისძიების განხორციელება შესაძლებელია. ჩვენ მზად გავქვს 10 კონკრეტული ინფრასტრუქტურული პროექტი, რომლის განხორციელება ცალკეულ უბნებში შეამცირებს საცობების მოცულობას. მათ შორის ერთ-ერთი პროექტის პრეზენტაცია შედგა პუშკინის გამზირზე.

მეორე: სახელმწიფო რასაც გეგმავს ტექნიკური დათვალიერების თვალსაზრისით ესეც ძალიან მნიშვნელოვანია.

მესამე: პარკირებასთან დაკავშირებული პრობლემები, ასევე მრავალსართულიანი პარკინგის სისტემის მოწყობით უნდა დარეგულირდეს, რაც ცალკეულ ნაწილებში შეამცირებს ქუჩაში მდგომი ავტომობილების რიცხვს. (ზოგ შემთხვევაში სავალ ნაწილზე დგანან) და შეიძლება ეს ტერიტორია მოძრაობისთვის იქნეს გამოთავისუფლებული. ასევე მნიშვნელოვანია ის, რომ განვავითაროთ სხვა ისეთი რეგულაციები, რომლებიც დღის განმავლობაში დაარეგულირებს დასუფთავების, დისტრიბუციის მანქანების მოძრაობას ვიწრო ქუჩებში და ასეთი რამდენიმე კომპლექსური ღონისძიების განხორციელებით შეიძლება მოვაგვაროთ პარკირების და საცობების პრობლემა, თუმცა ეს ბოლომდე ვერასდროს ვერ მოგვარდება.

თათია:

მაინტერებს თქვენი ხედვა საბავშვო ბაღებთან დაკავშირებით. ძალიან დაბალი ხელფასები აქვთ საბავშვო ბაღის მასწავლებლებს და ამ კუთხით თუ გაქვთ რაიმე გეგმა. გმადლობთ ყურადღებისთვის?

-ჩვენი ხელისუფლების პირობებში საბავშვო ბაღები გახდა უფასო. ძალიან ბევრ მშობელს ვისაც ადრე არ შეეძლო ბაღში მიეყვანა ბავშვი, დღეს თავისუფლად შეუძლია მიიყვანოს, მაგრამ ბაღების ინფრასტრუქტურა არის არადამაკმაყოფილებელი და ბევრ უბანში საერთოდ არ არის ბაღები. გარდა ამისა რთულია ბაგა-ბაღებში ბავშვების რეგისტრაციის პროცესი. აქედან გამომდინარე ჩვენ უნდა გავამარტივოთ რეგისტრაციის პროცესი, მეორეს მხრივ ბაღები, სადაც ინფრასტრუქტურა მოსაწესრიგებელია უნდა მოვაწესრიგოთ, გავარემონტოთ და ისეთი უბნები სადაც არ არის საერთოდ ბარები უნდა მოხდეს ტიპიური პროექტების აშენება. ჩვენ ასეთი რამდენიმე ათეული ბაღის აშენება მოგვიწევს დედაქალაქის ტერიტორიაზე.

ბაღის მასწავლებლებს არ გააჩნიათ პედაგოგის სტატუსი და მათ ეს სტატუსი აუცილებლად უნდა მიეცეთ, რაც ასევე შემდგომში დაკავშირებული იქნება დამატებით სოციალურ ტვირთთან, მაგრამ ეს ნელ-ნელა უნდა გაკეთდეს და მათი შრომის ანაზღაურებაც პერიოდულად უნდა გაიზარდოს.

ეკა:

მაინტერებს რა ბედი ელის გამგებეობს დაქვემდებარებულ მუნიციპალიტეტებს?

- ვაპირებთ მერიის სტრუქტურის ოპტიმიზაციას და აქედან გამომდინარე ეს საკითხი იქნება განხილული, თუმცა უახლოეს მომავალში ის შენარჩუნებული იქნება. შემდგომ კვლევა გვიჩვენებს როგორი მართვის მოდელი უნდა განვითარდეს იმისათვის, რომ დედაქალაქი უფრო უკეთესად იქნას მართული.

მაიკო:

რა გეგმა გაქვთ დაუმთავრებელი კორპუსების წესრიგში მოყვანისათვის, დაისჯებიან თუ არა სამშენებლო კომპანიების ხელმძღვანელები, რომლებიც დღესაც კი გვატყუებენ იმ მიღებული კანონების შემწეობით, რომელიც ქალაქის მერიას და სამწუხაროდ მთავრობასაც აქვს მიღებული.

-მშენებლობის კოდექსზე მუშაობა ეკონომიკის სამინისტრომ უკვე დაასრულა. მე ვიმედოვნებ, რომ წლის განმავლობაში საქართველოს პარლამენტი მას მიიღებს.

მშენებლობის კოდექსი ახალ რეგულაციებს ადგენს ძალიან ბევრი თვალსაზრისით და აწესრიგებს მშენებლობასთან დაკავშირებულ უწესრიგობას, რაც დღეს არსებობს და ამის შემდეგ ჩვენ შევთავაზებთ თბილისის საკრებულოს და უფრო დეტალურ რეგულაციებს მივიღებთ დედაქალაქისთვის, რომლის მიხედვითაც ინვესტორებს მიეცემათ გარკვეული დრო იმისთვის, რომ მათ დაამთავრონ სამუშაო. თუ გარკვეულ დროში ვერ მოხდება სამუშაოს დასრულება მათზე პასუხისმგებლობა უნდა გავრცელდეს.

ჩვენ პარალალურ რეჟიმში უნდა შევისწავლოთ დედაქალაქში არსებული ყველა დაუმთავრებელი მშენებლობა, ვნახოთ მესაკუთრეების შესახებ ინფორმაცია და ამ შესწავლის საფუძველზე შეგვეძლება დამატებითი გადაწყვეტილებების მიღება.

მარიკა:

რუსთაველის გამზირის 1-ლ ნომერში, მე-6 ე სადარბაზოს წინ აკრძალულია მანქანების გაჩერება.. გთხოვთ, გაითვალისწინოთ ჩვენი კორპუსის მაცხოვრებლების თხოვნა და თქვენი ქალაქის მერად არჩევის შემთხვევაში, გააუქმოთ ეს აკრძალვა.

-ყველა სადარბაზოსთან გაჩერება ვერ გაკეთდება, თუმცა კონკრეტული, მსგავსი საკითხები საპატრულო პოლიციასთან კოორდინაციით უნდა მოხდეს. თუ ეს ისეთი ადგილია, სადაც ავტომანქნაის გაჩერება გარკვეულ საფრთხეს ქმნის მოძრაობის თვალსაზრისით, ასეთ შემთხვევაში შეიძლება ვერ მოიხსნას არსებული შეზღუდვა, მაგრამ თუ შესაძლებელი იქნება მოძრაობის უსაფრთხოებიდან გამომდინარე, ასეთ შემთხვევაში შეძლება განხილული იყოს და მიღებული იქნას გადაწყვეტილება.

ზურა:

კალისტრატე ცინცაძის და დიუმას ქუჩებს როდის ეშველება? ასეთ ტურისტულ ზონაში თავზე გვემხობა სახლ-კარი, ამ ქუჩების ცალ–ცალკე გაკეთება შეუძლებელია, რადგანაც სატვირთო მანქანებმა უნდა იმოძრაოს ცინცაძის ქუჩიდან, გთხოვთ, როდესაც გახდებით მერი მალე გვიშველეთ.

-ამ უბნის განვითარებასთან დაკავშირებით ასევე გარკვეული დოკუმენტაცია ინახება მერიაში. თუმცა ეს დეტალურად ჩვენთვის ცნობილი არ არის. როცა ჩვენ ვნახავთ ამ დოკუმენტაციას და გავაანალიზებთ, ამის შემდეგ იქნება შესაძლებელი გარკვეული გადაწყვეტილების მიღება. ჩემი მოსაზრება არის, ის, რომ უბნობრივად თუ არ განვითარდა ქალაქის ძველი უბნები, ცალკეული სახლების რეაბილიტაციით შედეგს ვერ მივიღებთ. ასეთ შემთხვევაში ძალიან დიდი დრო დასჭირდება ამ ყველაფერს. ამიტომ კომპლექსურად უნდა იყოს ყველაფერი გადაწყვეტილი.

-თამარი:

ძალიან მინდა მობრძანდეთ მუხრანის 70 (სანზონა) და მოისმინოთ ხალხის პრობლემები.

-თუ კონკრეტულად ამ მისამართზე არა, უბანზე შეხვედრა მაინც მოხდება. ისინი რაიონული შტაბების მიერ იქნებიან გაფრთხილებული და შეუძლიათ მობრძანდნენ შეხვედრაზე. ყველა შეხვედრაზე ჯერ ხდება პროგრამის გაცნობა და ძირითადი მიმართულებების შესახებ საუბარი და ასევე იხილება კონკრეტულ უბანთან დაკავშირებული პრობლემები. კითხვა-პასუხის რეჟიმში მიმდინარეობს დისკუსია.

თიკო:

ბატონო დავით, საზოგადოების დიდ ნაწილს ძალიან გვაწუხებს ლაგუნა ვერეს უმიზეზოდ დახურვა, ვერ გავარკვიეთ რა ხდება იქნებ ყურადღება მიაქციოთ და რაღაც ზომები მიიღოთ, რომ განახლდეს ძალიან გვჭირდება თბილისის მოსახლეობას.

-ლაგუნა ვერე არის კერძო პროექტი, მას ჰყავს კერძო მესაკუთრე, რამდენადაც ჩემთვის ცნობილია იქ დამატებით ტექნიკურ-ეკონომიკური საკითხების შესწავლა მიმდინარეობს. ობიექტი ამორტიზირებულია და კერძო მესაკუთრის მიერ მიღებული გადაწყვეტილებიდან გამომდინარე მერია ადეკვატურად მოიქცევა.თუ ამ ობიექტის ექსპლუატაცია აღარ გაგრძელდება კერძო მესაკუთრის მიერ, ასეთ შემთხვევაში თბილისის მერია იზრუნებს, რომ ალტერნატიულ ტერიტორიაზე გააკეთოს შესაბამისი საცურაო აუზი.

ჩვენი პროგრამის მიხედვით, ჩემი საარჩევნო პერიოდის განმავლობაში, ანუ მომდევნო ოთხი წლის განვალობაში ყველა რაიონს მინიმუმ თითო საცურაო აუზი ექნება.

ნახეთ ინტერნეტკონფერენციის ვიდეო ვერსია