სკანდალური ინციდენტი შუაგულ მანჰეტენზე მოხდა. 39 წლის მოდელი ჯერჯერობით დაუდგენელი მიზეზების გამო სასტიკად გაცხარდა და სულ რაღაც ერთი დღით დაქირავებულ Cadillac Escalade-ს მძღოლს უკანა სავარძლიდან თავში ჩაარტყა. მძღოლი თავით საჭეს მიენარცხა და სისხლჩაქცევა განუვითარდა. დაზარალებულმა პოლიცია გამოიძახა, ნაომი ავტომობილიდან გადავიდა და პოლიციის მისვლამდე მიმალვა მოასწრო.

მძღოლმა და მოდელის წარმომადგენელმა პოლიციის განყოფილებაში ახსნა-განმარტება უკვე მისცეს. პოლიცია თავდამსხმელის წინააღმდეგ სანქციების გატარებას არ აპირებს, რადგან ინციდენტს კანონდამცველები არ შესწრებიან. ნაომის წარმომადგენელმა ჟურნალისტებს განუცხადა, რომ მათ "დასკვნების გამოტანა არ უნდა იჩქარონ", რადგან საქმე გაცილებით უფრო რთულადაა, ვიდრე ერთი შეხედვით ჩანს, ხოლო ტოპმოდელი მზადაა, ჭეშმარიტების დასადგენად პოლიციასთან ითანამშრომლოს.

ნაომი კემპბელის მღელვარე ხასიათი საყოველთაოდ ცნობილია. მოდელს ამის გამო კანონთან პრობლემა არაერთხელ შეჰქმნია. გასულ წელს ლონდონის ჰიტროუს აეროპორტში British Airways-ის ავიალაინერის ბორტზე მოწყობილი სკანდალის გამო, რომელიც პოლიციასთან ხელჩართული ჩხუბით დასრულდა, ნაომის საზოგადოების სასარგებლოდ 200-საათიანი შრომა ჰქონდა მისჯილი. ერთი წლით ადრე კი ნაგავსაზიდი ავტომანქანების სადგომზე 5 დღე იატაკს ხეხავდა...

ეს სასჯელი მანჰეტენის საოლქო სასამართლომ კემპბელს მოახლეზე თავდასხმის გამო მიუსაჯა და სიბრაზის შეტევებით დაავადებულთათვის სპეციალურ მეცადინეობაზე დასწრებაც დაავალა, რადგან ეს ფაქტი მომსახურე პერსონალის მიმართ განხორციელებული ძალადობის პირველი შემთხვევა არ იყო, მსგავსი მიზეზების გამო ნაომი პოლიციას ადრეც არაერთხელ დაუკავებია.

სამაგიეროდ, "მსოფლიოში ყველაზე შმაგი მოდელის" პოპულარობა სკანდალების წყალობით არათუ იკლებს, წლიდან წლამდე იზრდება! შესაძლოა, ნაომი კემპბელისა და რუსი მილიარდერის ვლადიმირ დორონინის გასული წლის აგვისტოსთვის მოსალოდნელი ქორწილიც მორიგი PR-აქცია იყო, რადგან მოდელის ოფიციალურმა წარმომადგენელმა ახლახან ბრიტანული გაზეთისთვის Daily Mail მიცემულ ინტერვიუში განაცხადა, რომ "ნაომი დანიშნული არ არის და გათხოვებას არ აპირებს". მოდელმა და რუსმა მილიარდერმა წლინახევრის წინ კანის კინოფესტივალზე გაიცნეს ერთმანეთი და მას შემდეგ ერთად არიან. ამჟამად ნაომი მოსკოვში ბოიფრენდის აპარტამენტებში ცხოვრობს და რუსულ ენას სწავლობს.

გაზეთისთვის  La stampa მიცემულ ინტერვიუში ნაომი ამბობს, რომ რუსეთში თავს ბედნიერად გრძნობს, გატაცებულია ტანვარჯიშით, იოგასა და კარატეშიც ვარჯიშობს, რუსულ აბანოში დადის და მუშაობს. მისი ძირითადი საქმიანობა ქველმოქმედებაა - ვივიენ ვესტვუდის მაისურებს წარმოადგენს და მიწისძვრით განადგურებული ჰაიტის მცხოვრებთათვის მილიონობით გირვანქა სტერლინგს აგროვებს. ხოლო კარიერის 25 წლისთავის აღსანიშნავად საკუთარი ფოტოსურათების გამოფენის მოწყობა სურს.


ნატო მანჯავიძე
ჟურნალი ”გზა”
(გამოდის ხუთშაბათობით)