საქართველოში დიდი ბრიტანეთის კინოს ვარსკვლავები ჩამოვიდნენ

საქართველოში დიდი ბრიტანეთის კინოს ვარსკვლავები ჩამოვიდნენ

მსახიობები მეთიუ მაკფეიდანი ("სიამაყე და ცრურწმენა", "ანა კარენინა") და მაიანა ბერინგი ("ბინდი. საგა. განთიადი"), ახალ ბრიტანულ-ქართულ-გერმანულ-რუსულ პროდუქციაში - ”ეპიკში” მიიღებენ მონაწილეობას, რომლის გადაღებებიც რამდენიმე დღეში დაიწყება. ამის შესახებ ”ამბები.გე”-ს საქართველოს კინემატოგრაფის ეროვნული ცენტრის წარმომადგენელმა, ნინია ახვლედიანმა განუცხადა.

-ვინ იღებს ფილმს?

- ფილმს ვლადიმერ კაჭარავას კომპანია "20 Steps Productions", მაიკ დაუნის და სამანტა ტეილორის კომპანია Film and Music Entertainment იღებენ. ეს ფართომასშტაბიანი საერთაშორისო კოპროდუქციის ნაწარმოები იქნება. ფილმის სცენარი შექმნილია ბრიტანეთის კინოინსტიტუტის მხარდაჭერით. მისი ავტორია მრავალი პრემიის ლაურეატი, ბრიტანელი სცენარისტი პაველ პავლიკოვსკი, რეჟისორი კი ბრიტანელი ბენ ჰოპკინსია. გადაღებები თბილისსა და მის შემოგარენში 14 იანვარს დაიწყება და ახალციხეში გაგრძელდება.

-ფილმის შინაარსსზე რას გვეტყვით?

-ეს არის შავი იუმორით გაჯერებული ფილმი დაბნეულ ბრიტანელ რეჟისორზე, რომელსაც კინოაკადემიის ჯილდოები აქვს მოპოვებული. მას სტუმრად იწვევს ახლადშექმნილი სახელმწიფო, რათა გადაიღოს ეპიკური ფილმი კავკასიის ერთ-ერთ რესპუბლიკაში. ამრიგად, ემილ ფორესტერს მოსდის მოწვევა გამოგონილ ავტონომიურ რესპუბლიკაში, რომელსაც კარასტანი ქვია. რეჟისორმა ჯერ არ იცის, რომ მის კარიერაში იწყება ყველაზე გიჟური მოგზაურობა.

-მსახიობები როგორ შეარჩიეთ?

-ფილმის კასტინგი ლონდონში, კასტინგის სააგენტომ Wildman Hall-მა ჩაატარა. მსახიობთა ვარსკვლავურ ჯგუფშია მეთიუ მაკფეიდენი, რომელიც ემილ ფორესტერის როლს თამაშობს. ეს მსახიობი ცნობილია დარსის როლით ფილმში "სიამაყე და ცრურწმენა".

"EPIC"-ში ქალის მთავარ როლს მაიანა ბურინგი შეასრულებს, რომელიც მაყურებლისთვის ცნობილია ფილმით "ბინდი. საგა. განთიადი". განსაკუთრებით უნდა აღინიშნოს ფილმში ცნობილი ავსტრალიელი მსახიობის, ნოა ტეილორის მონაწილეობა, რომელიც ”კარასტანის” დამაარსებლის როლს ასრულებს.

-ვინ აფინანსებს ამ კოპროდუქციას?

-ფილმის მთავარი დამფინანსებლები არიან ბრიტანეთის კინოინსტიტუტი (ლონდონი), HessenInvest Film Fund (ფრანკფურტი), CinePlus (ბერლინი/ფრანკფურტი), ფრანგულ-გერმანული კულტურული ტელეარხი ARTE, გერმანიის კინო-დისტრიბუტორული კომპანია Piffl და საქართველოს ეროვნული კინოცენტრი. საერთაშორისო გაყიდვებს აწარმოებს ლოს-ანჯელესში არსებული მსოფლიო გაყიდვების სააგენტო Shoreline Entertainment.

ბრიტანელი პროდიუსერის, მაიკ დაუნის განცხადებით, საქართველო კინოგადაღებისთვის საინტერესო ქვეყანაა.

"ფილმის წარმოებამდე დიდი გზა გავიარეთ, ბოლო ოთხი თვე კი თბილისში ვმუშაობთ. ჩვენი პარტნიორების და ეროვნული კინოცენტრის მხარდაჭერით უკვე მზად ვართ დავიწყოთ გადაღებები უაღრესად ხელსაყრელ პირობებში. მოუთმენლად ველით თბილისსა და ახალციხეში გადაღებებს და ვიმედოვნებთ, დროულად წარვადგენთ ფილმს საერთაშორისო ჩვენებისთვის ბერლინალეზე 2014 წელს",-აცხადებს მაიკ დაუნი.

ფილმის შემოქმედებით ჯგუფში შედის აღმასრულებელი პროდიუსერი სტივენ დალდრიც, რომლის პირველი ოთხი ფილმი: "ბილი ელიოტი", "მკითხველი", "საათები" და "დაუჯერებლად ხმამაღლა" კინოაკადემიის ჯილდოზე საუკეთესო რეჟისურისთვის იყო ნომინირებული. ამ ფილმების წყალობით ”ოსკარები” მოიპოვეს ნიკოლ კიდმანმა და ქეით უინსლეტმა.

ეროვნული კინოცენტრის დირექტორის, თამარ ტატიშვილის განცხადებით, ქართული კინოინდუსტრია უკვე განვითარების ახალ ეტაპზეა.

"ამას ხელს უწყობს ისეთი საერთაშორისო პროდუქციები, როგორიცაა EPIC, რომელიც თანამშრომლობს ქართულ კომპანიებთან. მაღალი დონის შემოქმედებითი ჯგუფი და საერთაშორისო კომერციის შესაძლებლობები ძალიან მიმზიდველია ქართული კომპანიებისთვის. ეს არის გლობალური პერსპექტივა და მაგალითი იმისა, საერთაშორისო თანამშრომლობის რა შესაძლებლობები აქვს საქართველოს",-აცხადებს თამარ ტატიშვილი.

მინდინარე წლის თებერვალში ფილმის გადაღებები ფრანკფურტსა და მის შემოგარენში გაიმართება.

გიორგი ბერიძე

ambebi.ge

სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე

"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე

„თბილისური ჩუქურთმა“ - იმპრესიონისტი მხატვრის გამოფენა, რომელიც თბილისობას ეძღვნება