"ბოლო წლებში წიგნების კითხვა შევამცირე. რა დასამალია და, საკუთარი საქციელი არ მომწონს",
- ამბობს მსახიობი, დათო ველიჯანაშვილი და დასძენს, რომ ეს მხოლოდ ინტერნეტის ბრალი არ არის, წიგნებს გარკვეულწილად მომატებული საქმეების გამოც დაშორდა.
- იმასაც ვაცნობიერებ, რომ ეს თავის გასამართლებელ არგუმენტად ვერ გამოდგება. ჩემზე ბევრად დაკავებული ადამიანები ვიცი, რომლებიც წიგნებს კითხულობენ. როგორც მკითხველი, ცოტათი გავზარმაცდი, საკუთარ თავს მობილიზება უნდა გავუკეთო და წიგნებს დავუბრუნდე. პირველი ნაწარმოები, რომლის კითხვასაც დავიწყებ, "ჰარი პოტერი" იქნება. მხოლოდ პირველი ნაწილი მაქვს წაკითხული და მართლა ძალიან მომეწონა. არ წამიკითხავს და ძალიან მაინტერესებს "ბეჭდების მბრძანებელი". წინ სხვა არაერთი ნაწარმოების წაკითხვის ბედნიერება მაქვს.
წიგნის სამყაროში ჩემი მეგზურები მშობლები იყვნენ. მერე ეს საქმე იმდენად შემიყვარდა, მხედველობასთან დაკავშირებული პრობლემები შემექმნა და მიშლიდნენ. ღამე საბნის ქვეშ ჩუმად ვკითხულობდი. "განძთა კუნძულის" კითხვაში ღამე გავათენე.
გარკვეული პერიოდი სათავგადასავლო ლიტერატურით ვიყავი გატაცებული, თინეიჯერობის წლებში - ჯემალ ქარჩხაძისა და გურამ დოჩანაშვილის შემოქმედება შემიყვარდა. "დათა თუთაშხია" ის ნაწარმოებია, რომელსაც პერიოდულად ვუბრუნდები და საყვარელ ეპიზოდებს ხელმეორედ ვკითხულობ.
სკოლა რომ დავამთავრე, უნივერსიტეტში საინჟინრო ეკონომიკურზე ჩავაბარე. მესამე კურსზე ვიყავი, როცა მივხვდი, რომ რასაც ვსწავლობდი, საერთოდ არ მაინტერესებდა. მშობლების თხოვნითა და ხათრით უმაღლესი სასწავლებელი დავამთავრე და თეატრალურში მერე ჩავაბარე. სპექტაკლებზე ხშირად დავდიოდი და მსახიობობა მომინდა. ადამიანმა ის საქმე უნდა აკეთოს, რაც აინტერესებს.
ინტელექტუალური თამაშები ძალიან მიყვარს. მეუღლის (ინტელექტკლუბის წევრი, ირინა ფრუიძე) გუნდის თამაშს დიდი ხნის განმავლობაში არ ვესწრებოდი, ვიმიზეზებდი - შავი პიჯაკი არ მაქვს-მეთქი. მერე ერთი გადაცემის ჩაწერას დავესწარი და მწარედ წააგეს. - შენ ცუდი ფეხი გქონია, მეორედ აღარ მოხვიდეო (იცინის), ამიკრძალა. მეორე თამაშზე მაინც მივედი და მოიგეს.
პერსონაჟები რეალურ სამყაროში რომ არსებობდნენ, დიდი სიამოვნებით ვიძმაკაცებდი დოჩანაშვილის მიჩინიოსთან. ჰეკლბერი ფინთან ვიმეგობრებდი, მდინარეზე მასთან ერთად ტივით დავეშვებოდი. ქალი პერსონაჟებიდან რომელი შემიყვარდებოდა? წიგნებში ძალიან ბევრი კარგი ქალი გვხვდება (ფიქრობს), მაგრამ ცოლმა არ იეჭვიანოს, არ ვიტყვი (იცინის).
- წმინდა იოანე ოქროპირი ამ სასმლის შესახებ ამბობდა: "იმისთვის მოგვეცა, რათა ვიხაროთ და არა იმისთვის, რომ უმსგავსოდ მოვიქცეთ. იმისთვის, რომ ვიცინოთ და არა იმისთვის, რომ დაგვცინონ. ჯანმრთელობის განსამტკიცებლად და არა - სნეულების შესაძენად. სხეულის გასამაგრებლად და არა - სულის მოსაუძლურებლად".
- ღვინის შესახებ ამბობს. თავის დროზე მამაჩემმა დაწერა: "რომაელები იტყოდნენ,/ "ინ ვინო ვერიტას",/ ჩემ გვერდით არ დადგეთ,/ ვინც ღვინოს ვერ იტანთ".
- ვინ არის ავტორი მიხეილ თუმანიშვილის ძეგლისა, რომელიც კინომსახიობთა თეატრის წინ დგას?
- გია ჯაფარიძე.
- ბერძნული მითოლოგიის მიხედვით, რა ერქვა მიწისქვეშა სამყაროს მბრძანებელს?
- ჰადესი.
- როგორ მცენარეებს უწოდებენ მონოკარპულს?
- დამტვერვასთან არის კავშირში?
- მცენარეებს, რომლებიც მხოლოდ ერთხელ ყვავიან. ექიმების აზრით, ის ხელს უშლის კარიესის წარმოქმნას, აძლიერებს ნივთიერებათა ცვლას, აყოვნებს სიბერეს და ამაღლებს ცხოვრების ტონუსს. რა აქვთ ექიმებს მხედველობაში?
- ვერ ვხვდები.
- ადამიანის ქმედებაზეა ლაპარაკი, ოღონდ ამისთვის საჭიროა პარტნიორი გყავდეს.
- კოცნა?
- დიახ. ეს მწვერვალი სვანეთის კავკასიონის მთავარ წყალგამყოფ ქედზე მდებარეობს, ზემო სვანეთისა და ყაბარდო-ბალყარეთის საზღვარზე. ზღვის დონიდან 5 068 მეტრ სიმაღლეზე. რომელ მწვერვალზეა ლაპარაკი?
- უშბაზე?
- არა. ის საქართველოს უმაღლესი მწვერვალია.