მსახიობი ნინო ოკუჯავა ამბობს, რომ ბოლო პერიოდში მხატვრული ლიტერატურის წასაკითხად დროის გამონახვა ძალიან უჭირს. ის მუდმივად გადაღებაზეა, აქვს მეორე სამსახური, სადაც ოფის-მენეჯერის პოზიციაზე მუშაობს. სამსახიობო ფაკულტეტზეც დედის რჩევითა და მხარდაჭერით ჩააბარა. პროფესიული არჩევანით კმაყოფილია.
- ბავშვობაში წიგნის სამყაროში ჩემი მეგზური დედა იყო. მეგობრების მიერ ნაქებ წიგნებსაც ვკითხულობდი. წასაკითხი ლიტერატურა განწყობის მიხედვითაც ხშირად ამირჩევია. ავტორებიდან გამორჩეულად მიყვარს შექსპირი, ჩეხოვი, ცვაიგი... დიდი ინტერესით ვეცნობი ნოველებს, პოეზია დიდად არ მიყვარს, მაგრამ მაქვს ხოლმე პერიოდები, როცა მეგობარი პოეტის ლექსებს სიამოვნებით ვეცნობი.
ლიტერატურული პერსონაჟები, რეალურ სამყაროში რომ არსებობდნენ, დიდი სიამოვნებით ვიმეგობრებდი პეპისთან. მასთან ერთად ვიგიჟებდი, ვიხალისებდი. ბავშვობაში პეპის ვგავდი, მგონია, რომ ჩვენ ერთმანეთს ყველაზე კარგად გავუგებდით. პეპის როლი არაერთხელ მითამაშია. მამაკაცი პერსონაჟებიდან რომეო შემიყვარდებოდა.
ბავშვობაში დედას დავყავდი ცეკვაზე, სიმღერაზე, მეტყველებაზე... სცენა, ტაში, დარბაზიდან წამოსული დადებითი ემოცია ძალიან მომწონდა. დედის მხარდაჭერით ჩავაბარე თეატრალურში. ექიმების გარემოცვაში გავიზარდე, მაგრამ მათ გზას არ გავყევი. მამა გარდაცვლილი მყავს, მან მხოლოდ ჩემი ერთი სპექტაკლი ნახა და მოეწონა. დედა ძალიან მგულშემატკივრობს, სერიალს უყურებს და რჩევებსაც ხშირად მაძლევს, ზოგჯერ მაქებს კიდეც.
წაკითხულ ნაწარმოებებთან მიბრუნება მჩვევია. ზოგიერთი ნაწარმოები სამჯერ მაქვს წაკითხული. მერე უფრო კარგად მამახსოვრდება.
ინტელექტუალური თამაშები დიდად არ მიყვარს, არც არასდროს მითამაშია. ადამიანების სახელების დამახსოვრება ძალიან მიჭირს. პიროვნება ბევრჯერ უნდა ვნახო, რომ მას სახელით მივმართო.
ახალ წელს ყოველთვის შინ ვხვდები. მხოლოდ მე და დედა ვცხოვრობთ და არ მინდა მარტო დავტოვო. წელს გამონაკლისი მოხდა, ახალ წელს მეგობრებთან ერთად ბაკურიანში შევხვდი. დედა თავის დასთან ერთად შეხვდა, ეს საკითხი გამგზავრებამდე მოვაგვარე, რომ იქ მშვიდად ვყოფილიყავი.
წინასაახალწლო სამზადისში ნაკლებად ვერთვები, ალბათ იმიტომ, რომ დედა ძალიან აქტიურია, 2-3 კვირით ადრე იწყებს ტკბილეულისა და საახალწლო ნივთების შეძენას, სახლსაც თავად რთავს. მე უმნიშვნელოდ თუ ვეხმარები, ინტერესი კი მაქვს, მაგრამ მგონია, რომ სამზარეულოში ტრიალი არ მეხერხება. ნაძვის ხის დადგმა მიყვარს. ბავშვობაში მეკვლედაც დავდიოდი. მეგობართან 3 წელი მიბარებდნენ, მოდი, კარგი ფეხი გაქვსო.