"ვიყო ლამაზი და მომხიბვლელი, საჭირო დროს საჭირო ადგილზე - ჩემი საქმიანობიდან გამომდინარე, ეს აუცილებელია", - ამბობს "მის საქართველო 2016", ვიქტორია კოჩეროვა. ის ჯანსაღი ცხოვრების წესს არასდროს ღალატობს. მის პირად ცხოვრებაშიც სიახლეა: გაგვიმხილა, რომ შეყვარებულია.
ბავშვობა
- ძალიან აქტიური ბავშვი ვიყავი, ვერც ერთი წამი ვერ ვჩერდებოდი სერიოზულად. ყოველთვის რაღაცის "გაფუჭებაზე" ვფიქრობდი. დილის 9 საათზე უკვე ალვის ხის კენწეროზე ვიჯექი და ბიჭებს ველოდებოდი, რომ ფეხბურთი მეთამაშა.
- როგორი მოსწავლე იყავი? მასწავლებლებს აბრაზებდი?
- კარგად ვსწავლობდი, ძალიან ნიჭიერი ვიყავი. სახლში რომც არ მესწავლა გაკვეთილი, შესვენებაზე ერთხელ წაკითხვა მყოფნიდა და ვიცოდი. ამ თვალსაზრისით, მასწავლებლების საყვედურებს არასდროს ვიმსახურებდი. თუმცა, "შატალოებსაც" არ ვაცდენდი, თითქმის ყოველთვის მე ვიყავი ორგანიზატორი.
- ამის გამო დედა არ გიბრაზდებოდა?
- კი არ მეჩხუბებოდა, არამედ ჩუმად იყო - ასე გამოხატავდა გაბრაზებას. მის დუმილს მერჩივნა, ყური აეწია ან სხვა ფორმით დავესჯე.
პროფესიული არჩევანი
- ბავშვობაში მინდოდა, იურისტი ვყოფილიყავი. მახსოვს, 8-9 წლის ასაკში, ზაფხულში, დილით ადრე ვდგებოდი, რათა 9 საათზე "ჩავჯდომოდი" გადაცემას, რომელშიც სხვადასხვა პროცესს განიხილავდნენ.
- იურისტობა რატომ გადაიფიქრე?
- სამოდელო სფერო და სამართალი თანხვედრაში არ გახლდათ... იყო კარგი იურისტი - ეს ძალიან ბევრ შრომას მოითხოვს.
- სკოლის დამთავრების შემდეგ, სწავლა სად გააგრძელე?
- ბიზნესის მართვის ფაკულტეტზე ჩავაბარე, რადგან მინდოდა, საკუთარი თავი ბიზნესის კუთხით მომესინჯა. თუმცა, მალე მივხვდი, რომ ციფრები ჩემი საქმე არ არის... ბოლოს მაინც იურისტობა გადავწყვიტე და საბუთები სამართლის ფაკულტეტზე გადავიტანე. ჯერ კიდევ ვსწავლობ და სავარაუდოდ, მომავალში დიპლომატიას ავირჩევ.