საინტერესო ფაქტები სერიალზე "შავი სია"

პოპულარული ამერიკული სერიალი "შავი სია" უკვე ოთხ სეზონს ითვლის და მეხუთე სეზონისთვის ემზადება. სანამ მაყურებელი მოლოდინის რეჟიმშია, წარმოგიდგენთ საინტერესო ფაქტებს შოუს შესახებ.

• მთავარი პერსონაჟის, რეიმონდ რედინგტონის დაბადების თარიღი, რომელიც მის კრიმინალურ საქმეშია მითითებული, იგივეა, რაც მისი როლის შემსრულებლის, ჯეიმს სპეიდერის დაბადების თარიღი - 1960 წლის 7 თებერვალი.

• რედის საფირმო ქუდი სცენარით არ იყო გათვალისწინებული. ჯეიმს სპეიდერმა შეთავაზა შოუს შემქმნელებს, რომ პერსონაჟის ვიზუალს კოლორიტს შეძენდა შლაპა.

• პერსონაჟ მისტერ კაპლანის სახელი ალფრედ ჰიჩკოკის საკულტო ფილმ North by Northwest-ში კერი გრანტის გმირის პატივსაცემადაა შერჩეული.

• რედის როლის შემსრულებლად ადრეულ ეტაპზე სერიალ 24-ის ვარსკვლავი კიფერ საზერლენდი განიხილებოდა.

• როდესაც მსახიობი მეგან ბუნი დაფეხმძიმდა, იმის ნაცვლად, რომ მისი ფეხმძიმობა გადაღებებზე დაეფარათ, სცენარისტებმა პერსონაჟსაც ორსულობის სიუჟეტი შეუქმნეს.

• მეორე სეზონის ბოლოს ირკვევა რეიმონდ რედინგტონის ოფიციალური ბრალდებების ნუსხა, რაც მოიცავს საბოტაჟს, სახელმწიფო ქონების განადგურებას, შეთქმულების მოწყობას, პატიმრობისგან თავის არიდების მიზნით ქვეყნის დატოვებას, რეკეტს, შეიარაღებულ ძალადობას და სხვა დანაშაულებრივ ქმედებებს.