ხელოვნების ფესტივალი „კამერა ობსკურა: ბერლინი - თბილისი“ დღეს საზეიმოდ დაიხურება

ხელოვნების ფესტივალი „კამერა ობსკურა: ბერლინი - თბილისი“ დღეს ფაბრიკაში საზეიმოდ დაიხურება.

ღია ცის ქვეშ ქართული-გერმანულ საღამოზე, რომელიც თბილისისა და ბერლინის მეგობრობას ეძღვნება, პირველად გაიმართება ახლად შექმნილი ქართულ-გერმანული ჯაზ-კვინტეტის კონცერტი რეზო კიკნაძის (საქსაფონი), მანფრედ ბრიუნდლის (ბასი), მათიას ლინდერმაიერის (საყვირი), ლუკა თოფურიას (კლავიში), ირაკლი ჭოლაძის (დასარტყამი ინსტრუმენტები) შემადგენლობით.

ღონისძიების ორგანიზატორების ინფორმაციით, ჯაზ-კვინტეტის კონცერტამდე, ფაბრიკის ტერიტორია დაერთმობა ბერლინი-თბილისის მეგობრობის ზეიმს, ფაბრიკის ეზოში თემატური პროექციები მოეწყობა და გაიმართება კინოჩვენებაც.

აღსანიშნავია, რომ მესაყვირე მათიას ლინდერმაიერს 2012 წელს მოგებული აქვს Biberach Jazz პრიზი და kurt Maas-ის ჯილდო, ხოლო მანფრედ ბრიუნდლის, ვაიმარის მუსიკის უნივერსიტეტის პროფესორს, 2012 წელს მიღებული აქვს ისეთი პრესტიჟული ჯილდო, როგორიცაა SWR Jazz პრიზი. ის არის მსოფლიოში პირველი კულტურათაშორისი ჯაზის ჯილდოს, პირველი ACHAVA ჯაზის ჯილდოს ინიციატორი და სამხატვრო ხელმძღვანელი, 19 წლის მანძილზე ვაიმარში Internatonal Jazzmile Workshop-ის სამხატვრო ხელმძღვანელი.

ამავე საღამოს ბერლინიდან ჩამოსული დიჯეები შტეფან გოლდმანი და ბერლინის ელექტრონული სცენის ერთ-ერთი პირველი ლეგენდარული კლუბის WATERGATE-ის რეზიდენტი პატლაკი დაუკრავენ. პატლაკის როგორც DJ-ს და პროდიუსერის შემოქმედებაზე გავლენა იქონია ხანგრძლივმა მეგობრობამ მათიას მაიერთან. მისი პირველი EP გამოვიდა ჰამბურგის ლეიბლით liebe*detail.

შტეფან გოლდმანი ქმნის ინოვაციურ,ელექტრონულ მუსიკას, რომელიც ტექნოს საფუძველზე (თრექი, რასტერი,სემპლი და ლუპი) არის აგებული. ტექნოთრექების გარდა, ძირითადად მუშაობს ცეკვების, ანსამბლებისა და ფილმებისთვის (შეკვეთები MaerzMusik Berlin-ის NyMusikk ნოვერგიისა და BASF კულტურის პროგრამისგან). გამოშვებული აქვს მრავალი ჩანაწერი, დაარსა ლეიბლი Marco და არის DJ მსოფლიოს მასშტაბით. მრავალ საერთაშორისო პროექტებს შორის გაკეთებული აქვს Live პერფორმანსები ისეთ პროექტებში, როგორებიცაა: LACMA ლოს ანჟელესი, The Mutek Festival მონრეალი, The Honen in Temple Kyoto და The Centro Cultural Kirchner ბუენოს აირესში.ბერლინში მისი სახელი მკვეთრად ასოცირდება კლუბთან “Berghain“, რომლისთვისაც აქვს ღონისძიებების სპეციალური ფორმატი „ელექტროაკუსტიკური სალონი“.

შეგახსენებთ, რომ საქართველო-გერმანიის წლის ფარგლებში ხელოვნების ფესტივალი „კამერა ობსკურა: ბერლინი-თბილისი“, რომელიც 19 სექტემბერს დაიწყო და 24 სექტემბრამდე გაგრძელდება, გერმანიის საელჩოს მხარდაჭერით და გერმანული კომპანია RCCR Projects-ის, ქართული სააგენტო Ex: Sound-ის ორგანიზებით წელს პირველად იმართება.

”ხელოვნების ფესტივალი „Camera Obscura ბერლინი-თბილისი“ გერმანელი და ქართველი ხელოვანების მონაწილეობით ორ ქვეყანას შორის ხელოვნებისა და მუსიკის სფეროებში დიალოგის გაღრმავებას ეძღვნება, თუმცა მის ძირითად თემას ორი დედაქალაქის - თბილისისა და ბერლინის კულტურული ურთიერთობები წარმოადგენს. ფესტივალის ფარგლებში დაგეგმილი ღონისძიებები მოიცავს კლასიკური მუსიკის კონცერტს, ჯაზ კონცერტს, ფოტოგამოფენას, დისკუსიებსა და კლუბურ საღამოს ბერლინელი დიჯეების მონაწილეობით. ფესტივალში მონაწილეობას იღებენ გერმანიიდან ჩამოსული ის ცნობილი ხელოვანები, რომლებიც გარდა იმისა, რომ საკუთარ შემოქმედებას წარმოადგენენ, ქართველ კოლეგებს თავის პროფესიულ გამოცდილებასაც გაუზიარებენ”, - აცხადებენ ღონისძიების ორგანიზატორები.

"ინტერპრესნიუსი"