რა შესთავაზა ეკა ბერიძეს ედუარდ შევარდნაძემ

17 წლის წინ ეკა ბერიძემ ფილოლოგობა ჟურნალისტობაზე გაცვალა. მუშაობდა რამდენიმე ტელევიზიაში, ბოლოს მის ცხოვრებაში "მაესტრო" გამოჩნდა. სამსახურში ერთადერთი უფროსი ჰყავს, მეუღლე კახა ბექაური, რომელიც ახლა "მაესტროს" დირექტორია. შენიშვნებს ყველაზე ხშირად მისგან იღებს და ითვალისწინებს კიდეც.- ჩემი ჟურნალისტიკა "იბერვიზიით" დაიწყო, მაგრამ იქ არ მივსულვარ როგორც ჟურნალისტი, ტექსტების კორექტურას ვაკეთებდი. მაშინ კომპიუტერი და ინტერნეტი არ იყო, საინფორმაციო სააგენტოებში ტელეფონით ვრეკავდი და ისე ვიწერდი ახალ ამბებს. განათლებით ფილოლოგი ვარ და იმ პერიოდში ასპირანტურაში ჩაბარებას ვაპირებდი, მუშაობა მხოლოდ გასართობად დავიწყე.

- ანუ ჟურნალისტობის ამბიცია არასოდეს გქონიათ?

- არა, რა თქმა უნდა. მერე ისე მოხდა, რომ სიუჟეტი იყო გასაკეთებელი და ჟურნალისტების ნაკლებობის გამო მე გამიშვეს. მოეწონათ, მეც თანდათან გამიტაცა ამ პროცესმა და ასე მოვხვდი ჟურნალისტიკაში.

- პირველი სიუჟეტი რა თემაზე გააკეთეთ?

- კარგად მახსოვს, სახელმწიფო ფილარმონიაში ორი დირექტორი - ბაღაშვილი და ბარამიძე ერთმანეთს დაუპირისპირდა.

- ოჯახი როგორ შეხვდა თქვენს გადაწყვეტილებას, ასეთი რთული პროფესიისთვის მოგეკიდათ ხელი?

- ძალიან კარგად. მაშინ "იბერვიზია" ერთადერთი დამოუკიდებელი ტელეკომპანია იყო და ხალხი ინფორმაციას ჩვენგან იგებდა. ძალიან პოპულარულები ვიყავით და ჩვენც გვეხალისებოდა საქმის კეთება.

- ზოგიერთ ჟურნალისტს თავისი ძველი ეკრანული სახე აკომპლექსებს. თქვენ თუ გიყვართ ძველი ჩანაწერების ყურება?

- თუ არ ვცდები, კასეტებიც მაქვს სახლში. ყოველდღე არ მიჩნდება მათი ნახვის სურვილი, მაგრამ ნამდვილად არ მაქვს ეგ პრობლემა.

- მაშინ ჯერ კიდევ არ იყო ტელევიზიაში ღია ეთერი?

- არა, მაგრამ ჩვენი ჩანაწერები საკმაოდ ოპერატიულად, 15 წუთის შემდეგ გადიოდა, უბრალოდ, ტექნიკური სიტუაცია იყო ძალიან მძიმე. წარმოიდგინეთ, ჩვენი სამონტაჟო, ეთერი, სამუშაო ტერიტორია მდებარეობდა მაშინდელ შინაგანი ჯარის სარდაფში. ვირთხები დარბოდნენ, სასწაულ პირობებში ვმუშაობდით. მგონი, იქ მუშაობის პერიოდში ხელფასი მხოლოდ ერთხელ ავიღე, მაშინ კუპონები იყო. ახალგაზრდები ვიყავით და ეს სულაც არ გვაღელვებდა. ყოფით პრობლემებს ოჯახი გვიგვარებდა.

- ქართულ პრესას უყვარს ტელეჟურნალისტები, თქვენით როდის დაინტერესდნენ?

- პრესას პოპულარული სახე ყიდის. საქართველოში კი ყველაზე პოპულარულები მაინც ტელესახეები და სერიალში დაკავებული მსახიობები არიან. ჩემი პირველი ინტერვიუ რუსულ ჟურნალში დაიბეჭდა, რომელიც საქართველოში გამოდიოდა. მაშინ უკვე "აუდიენციის" თანამშრომელი ვიყავი. შემდეგ ნელ-ნელა ქართული ჟურნალებიც გაჩნდა და ერთ-ერთი მათგანის მესამე ნომრის ყდაზე ჩემი დიდი ფოტო გავიდა, თუმცა მაშინ ქვეყანაში ის სიტუაცია არ იყო, რომ თავში ამვარდნოდა.

- როგორი ურთიერთობა ჩამოგიყალიბდათ პრესასთან?

- ძალიან კარგი. მარტო ის არ მიყვარდა, როდესაც კონტექსტიდან ამოვარდნილ სათაურებს უკეთებდნენ. ეს არა მარტო მე მაღიზიანებდა, სხვებსაც, მწვავედ განვიცდიდი. ყოფილა შემთხვევა, როცა ყდაზე გამოტანილი სათაურის პასუხს ინტერვიუში ვერ ნახავდით, თუმცა ახლა პრესაც დაიხვეწა.

- ყველა რუბრიკაში სტუმრობას თანხმდებით?

- ძირითადად კი, თუმცა გააჩნია ჟურნალს. ყოფილა შემთხვევა, როცა გასვლამდე ინტერვიუსთვის გადამიხედია. მხოლოდ ერთხელ მქონდა ერთ-ერთ გაზეთთან უთანხმოება. ინტერვიუზე იმ დროს დამირეკეს, როცა არ მეცალა და ძალიან მომაწვა ჟურნალისტი, რომ მომეცალა. საერთოდ აღარ მივეცი ინტერვიუ. შემდეგ სხვებისგან აიღეს ინტერვიუ და ჩემზე რაღაც სულელური ისტორია დაწერეს. ჩემზე ამას არ უმოქმედია, რადგან მიმაჩნია, რომ ის გაზეთი ყვითელი ყდის პრინციპით შენიღბული სახელისუფლებო გაზეთია. ცდილობს, იმ ადამიანების კომპრომენტირება მოახდინოს, რომლებიც ხელისუფლებას არ მოსწონს. ყვითელი პრესა ბევრად პატიოსანია.

- დიდი ხანი ტელევიზიით არ ჩანდით, ამ პერიოდში არ ცდილობდით, რომ საზოგადოებისთვის თავი შეგეხსენებინათ?

- მაგის პრობლემა არ მქონია, ორ თვეში ერთხელ მაინც მირეკავდნენ ჟურნალისტები და ინტერვიუს წერდნენ ჩემთან. ეს პერიოდი კარგად გამოვიყენე და ნოემბერში ბიზნესმაგისტრატურის დიპლომს დავიცავ. მანამდე მქონდა მოლაპარაკებები სხვადასხვა ტელევიზიასთან, მაგრამ სრული პასუხისმგებლობით მინდა განვაცხადო, რომ ყველგან დამბლოკეს. სწავლაზე გადავერთე და აღარც მიფიქრია ჟურნალისტობას დავბრუნებოდი. ამ დროს გამოჩნდა ჩემს ცხოვრებაში "მაესტრო", სადაც აღმასრულებელი დირექტორი ჩემი მეუღლეა. დიდხანს ვორჭოფობდი, დავთანხმებოდი თუ არა მის წინადადებას ეთერში დაბრუნებაზე. არ გეგონოთ, თავს ვიფასებდი, უბრალოდ, მიჭირდა დაბრუნება.

- ახალ ეთერს მალე შეეჩვიეთ?

- პირველი კვირა გარკვეული დაძაბულობა და ნერვიულობა მქონდა, თუმცა მალე გამიარა.

- ეკა, კრიტიკაზე როგორ რეაგირებთ?

- გააჩნია, ვინ მაკრიტიკებს.

- ამბობდნენ, ლევან გაჩეჩილაძე რომ გყავდათ ეთერში, დაინდეთ, ფორუმზეც აკრიტიკებდნენ "მაესტროს"...

- ადრე, როცა ეთერში გავედით, შევდიოდი ფორუმზე, მაგრამ ახლა აღარ. იქ არიან ისეთი ადამიანები, რომლებიც გარკვეულ პოლიტიკურ ინტერესს იცავენ. ისიც ვიცი, რომ ერთ დღეს ძალიან ბევრი ადამიანი დარეგისტრირდა შინაგან საქმეთა სამინისტროდან, ამიტომ ასეთ კრიტიკას დიდი ნდობით არ ვეკიდები.

- ჟურნალისტებს ხშირად აბრალებენ პოლიტიკოსებთან მეგობრობას. თქვენ თუ გყავთ ერთი პოლიტიკოსი მეგობარი მაინც?

- მე არ შევდივარ მასეთ ჟურნალისტთა რიცხვში, არასოდეს მიმეგობრია პოლიტიკოსებთან და არც ამის საფუძველზე მომიყვანია ვინმე ეთერში. ასეთ ადამიანებთან ვალდებულება გიჩნდება და შემდეგ ობიექტურობას კარგავ. ვცდილობ, პოლიტიკოსებთან კარგი ურთიერთობა მქონდეს და ყველას ვესალმები. ყოფილა ისეთი შემთხვევაც, რომ თავად დამმალვიან.

- თავად თუ გითამაშიათ როლი რომელიმე პოლიტიკოსის ჩამოყალიბებაში?

- კი, ეგ ნამდვილად შემიძლია ვთქვა, უფრო სწორად, მე კი არა, იმ ტელეარხს და გუნდს, ვისი წყალობითაც ეკრანზე ჩანდნენ. მიხეილ სააკაშვილიდან დაწყებული, გიგა ბოკერიათი დამთავრებული, შემიძლია ვთქვა, რომ დიდი როლი გვაქვს ნათამაშები მათ პოლიტიკურ კარიერაში. ისინი ჩვენ გარეშე ვერ იარსებებდნენ.

- თუმცა სწორედ ამ ფაქტს თვლიან "რუსთავი 2"-ში შეცდომად და ხშირად აყვედრიან ახალი ხელისუფლების მოყვანას.

- ჩემი "რუსთავი 2"-ზე ყოფნის პერიოდში სრულიად ობიექტურები და გახსნილები ვიყავით. არ მიმაჩნია შეცდომად, რომ მიხეილ სააკაშვილი, გიგა ბოკერია, გივი თარგამაძე და ვანო მერაბიშვილი ჩვენი სტუმრები იყვნენ და ეკრანზე ჩანდნენ. ამის სრული უფლება ჰქონდათ, არჩევანი კი ხალხზე იყო. მათ მოახდინეს მოსახლეობაზე სათანადო შთაბეჭდილება, ამიტომ არანაირად არ ვნანობ, რომ რომელიმე მათგანი ხშირად ან ნაკლებად იყვნენ ჩემი სტუმრები.

- თუმცა ამ ადამიანებს დღეს თქვენს გადაცემაში ვეღარ ვხედავთ.

- მე ყოველთვის ვცდილობ ბალანსის დაცვას, თუმცა აღვნიშნავ, რომ ხელისუფლების წარმომადგენლების დათანხმება ეთერში მოსვლაზე რთულია. საინტერესო ტაქტიკა აქვთ. მაგალითად, ურეკავ მიხეილ მაჭავარიანს, უფრო სწორად, მის პრესმდივანს, დღეს შეცვლილია სიტუაცია, კარგად მოირგო ხელისუფლებამ ეს ინსტიტუტი, მათ სახარბიელოდ ვიტყვი, რომ თამაშის ეს წესები ოპოზიციამაც კარგად მოირგო და არც ისინი გველაპარაკებიან პრესმდივნების გარეშე. მოკლედ, მთელი ბიუროკრატიაა.

- კარგია, ხალხი დაუსაქმებიათ...

- (იცინის) კი, ზუსტად ასეა. მოკლედ, ვურეკავ ნაციონალების პრესმდივანს და ვეუბნები, რომ ინტერვიუზე მიხეილ მაჭავარიანის, რას გადავეკიდე ამ მაჭავარიანს, მაგალითად, პავლე კუბლაშვილის მოწვევა მინდა. პასუხი არის ძალიან დამაიმედებელი. შუადღეს რეკავ და გეუბნებიან, რომ ჯერ ვერ უკავშირდებიან, საღამოს კი, როცა შეიძლება გადაცემა ჩაგეშალოს, უარს გეუბნებიან. ბევრჯერ იყო ასეთი შემთხვევა და ამას ყოველთვის ეთერში ვაცხადებ. ვერასოდეს მოვიყვანე გადაცემაში მიხეილ მაჭავარიანი, არადა, მისი ძმა ჩემი კლასელი იყო და ყოველთვის კარგი ურთიერთობა გვქონდა. რაც "მაესტროზე" მიმყავს გადაცემა, როდესაც ვურეკავ, მეუბნება, რომ არ არის ქალაქში, თუმცა იმავე დღეს რომელიმე საინფორმაციოს ინტერვიუს აძლევს.

- პრესსამსახური ახსენეთ. ტელეჟურნალისტებიდან ბევრი გადაბარგდა ამ სამსახურში. თქვენ არ გქონიათ შეთავაზება?

- ამ ხელისუფლების პერიოდში არა. ადრე, როცა "იბერვიზიიდან" წამოვედი, ედუარდ შევარდნაძემ შემომთავაზა მსგავსი რამ. მაშინ ადმინისტრაციული აპარატის ხელმძღვანელი ვაჟა ლორთქიფანიძე იყო. არასოდეს წავსულვარ მსგავს წინადადებაზე და არც წავალ. შემდეგ კარგა ხანს უმუშევარი ვიყავი. ზოგადად კი მიმაჩნია, რომ ადამიანი, რომელიც თანამდებობის პირის ან პოლიტიკური პარტიის პრესმდივანი გახდება, ნამდვილ ჟურნალისტიკაში ვერასოდეს დაბრუნდება.

- "მაესტრო" თქვენი ბოლო გაჩერებაა?

- არა, არ მიყვარს ერთსა და იმავე ადგილზე დიდხანს მუშაობა. მაქსიმუმი სამი წელია. წინასწარ ასეთ რაღაცებს არ ვგეგმავ. ახლა ეთერი უკვე დავამთავრე, 24 ივლისს სამი კვირით ამერიკაში გავემგზავრები.

- დასვენება შტატებში გადაწყვიტეთ?

- არა, სტენფორდის უნივერსიტეტში განვითარებადი ქვეყნებისთვის სემინარი იმართება დემოკრატიაზე. მთელი მსოფლიოდან 25 ადამიანი მივდივართ. საქართველოდან მხოლოდ მე.

- სემინარზე როგორ მოხვდით?

- ერთ-ერთ საიტზე სრულიად შემთხვევით წავაწყდი ამ ინფორმაციას. ჩემი მონაცემები გავგზავნე. ორი თვის შემდეგ დამირეკეს და მითხრეს, რომ 500 კანდიდატიდან არჩეულ 25 ადამიანში მეც ვიყავი.

- თქვენი ერთადერთი უფროსი მეუღლეა?

- დიახ და მყავს პროდიუსერი ბაია გადაბაძე. ჩვენ ერთადერთი წყვილი არ ვართ ტელევიზიაში. აქ არიან ვასიკო ოდიშვილი და ეკა აკობია, თამუნა მჟავანაძე და მისი მეუღლე მალხაზი...

- მოკლედ, ერთი დიდი ოჯახი ხართ...

- კი, ოჯახური სიტუაციაა და კარგად ვართ. არც ერთი აღარ ვართ იმ ასაკში, რომ ვიღაცამ მეუღლის თანამდებობით ისარგებლოს. პირიქით, ეს უფრო მეტ პასუხისმგებლობას მიჩენს.

- დასასრულ, რა არის ეკა ბერიძის პოპულარობის დადებითი და უარყოფითი მხარე?

- ძალიან კარგია, როცა პოპულარული ხარ და ადამიანებს უყვარხარ, უფრო მეტ ანგარიშს გიწევენ, გცნობენ და პატივისცემით გეპყრობიან, თუმცა მინუსებიც არის. ზოგჯერ სულ არ გინდა იყო ცნობადი სახე და ჩრდილში დარჩენას ცდილობ, მაგრამ პოპულარობის პლუსები მინუსებს მაინც გადაწონის.

ნინო გიგიშვილი

ჟურნალი "რეიტინგი"

(გამოდის ორშაბათობით)