აშშ-ის სამაუწყებლო ქსელის MSNBC-ის წამყვანმა კიტ ოლბერმანმა დემოკრატების საარჩევნო კამპანიაში მონაწილეობის გამო სამსახური დაკარგა.
საინფორმაციო საიტის "Politico"-ის ინფორმაციით, ტელეწამყვანმა დემოკრატიული პარტიის სამი კანდიდატის საარჩევნო ფონდში ფული გადარიცხა.
როგორც MSNBC-ის ხელმძღვანელმა ფილ გრიფინმა განაცხადა, ოლბერმანი არც გადაცემას წაიყვანს და არც ხელფასი შეუნარჩუნდება, მიუხედავად იმისა, რომ აშშ-ის შუალედური არჩევნების გაშუქების დროს ის არხის საუკეთესო წამყვანი იყო.
"NBC-ის საინფორმაციო პოლიტიკის ინტერესების გათვალისწინებით, გადავწყვიტე ის გადაცემას ჩამოვაშორო", - განაცხადა გრიფინმა.
ოლერმანი და მისი კოლეგა რეიჩელ მედოუ ტელეკომპანია NBC-ის ყველაზე ცნობილი სახეები არიან.
ვაშინგტონში BBC-ის კორესპონდენტის ჯონ დაიმონდის თქმით, მიუხედავად იმისა, რომ აშშ-ში საინფორმაციო არხები ბოლო დროს სულ უფრო პოლიტიზირებული ხდება, ყველაფერს თავისი საზღვარი აქვს.
მომზადებულია BBC-ის მიხედვით.