ტელეკომპანია "იმედის" საინფორმაციო გამოშვება "ქრონიკის" წამყვანმა თამთა სანიკიძემ ტელეკომპანია დატოვა. ზოგის თქმით, ჟურნალისტი ჰოლანდიაში მიემგზავრება სასწავლებლად. ზოგმაც - თამთას მიერ ტელეკომპანიის დატოვება ბიზნესმენ ბიძინა ივანიშვილის პოლიტიკურ გააქტიურებას დაუკავშირა - მის ახლო ნათესავს მიჰყვება ცოლადო. კულუარებში იმასაც ამბობენ, თამთა ტელეკომპანია "იმედის" საინფორმაციო სამსახურის უფროსის, მათე კირვალიძის შენიშვნის გამო განაწყენდაო. ამ ყველაფრის გასარკვევად თამთა სანიკიძეს დავუკავშირდით, რომელიც ძალიან მოკლე კომენტარით შემოიფარგლა.
- თამთა, რატომ დატოვე ტელეკომპანია "იმედი"?
- შექმნილ ვითარებაში ასე ვამჯობინე.
- შექმნილ ვითარებაში რას გულისხმობ?
- დღევანდელ პოლიტიკურ ვითარებას. 14 ოქტომბრიდან ტელეკომპანია "იმედში" აღარ ვყოფილვარ. სწორედ ამ დღეს მქონდა ბოლო ეთერი.
- რას აპირებ?
- სასწავლებლად მივდივარ საზღვარგარეთ.
- ამბობენ, თამთა სანიკიძე ცოლად ბიძინა ივანიშვილის ახლო ნათესავს მიჰყვება და ამიტომაც დატოვა ეს ტელეკომპანიაო...
- ტელეკომპანია "იმედიდან" იმიტომ წამოვედი, რომ მე, როგორც მოქალაქემ და, პირველ რიგში, როგორც ჟურნალისტმა, ჩემივე მორალიდან გამომდინარე, ამ ტელეკომპანაში ჩემი ადგილი ვერ დავინახე. რა თქმა უნდა, ერთ-ერთი მიზეზი არის პირადი ცხოვრებაც, თუმცა მიმაჩნია, რომ ჩემი გადაწყვეტილება მართებულია.
- მართლა ბიძინა ივანიშვილის ახლო ნათესავია შენი საქმრო?
- დიახ. ის ბიძინა ივანიშვილის ნათესავია.
ნინო მაისურაძე
ყოველკვირეული გაზეთი "ყველა სიახლე"
(გამოდის ოთხშაბათობით)