კვლევების თანახმად, სქესობრივი დისფუნქცია ფართოდ არის გავრცელებული (ქალების 43% და მამაკაცების 31%). მიუხედავად ამისა, ის ერთ-ერთ იმ პრობლემად რჩება, რომელსაც ადამიანები უხალისოდ განიხილავენ. საბედნიეროდ, სქესობრივი დისფუნქციის მრავალი შემთხვევა იკურნება. ამიტომაც არის საჭირო, ეჭვი პარტნიორს ან ექიმს გაუზიაროთ. რისი ბრალია ქალთა სქესობრივი დისფუნქცია? სქესობრივი დისფუნქცია შესაძლოა ფიზიკური ან ფსიქოლოგიური პრობლემების შედეგი იყოს.
ფიზიკური პრობლემები
მრავალმა ფიზიკურმა და სამედიცინო მდგომარეობამ შესაძლოა სქესობრივი ხასიათის პრობლემებამდე მიგვიყვანოს. სქესობრივი დისფუნქცია არცთუ იშვიათია დიაბეტის, გულის დაავადებების, ნევროლოგიური პრობლემების, ჰორმონული დისბალანსისა და მენოპაუზის დროს; ისეთი ქრონიკული დაავადებების დროს, როგორებიცაა თირკმლისა და ღვიძლის დაავადებები, ასევე - ალკოჰოლიზმი და ნარკომანია. ზოგიერთი სამკურნალო საშუალება, მათ შორის - ანტიდეპრესანტებიც, გავლენას ახდენს სქესობრივ სურვილებსა და ფუნქციაზე.
ფსიქოლოგიური მიზეზები
ასეთი მიზეზებია სტრესი და შფოთვა, რომლებიც სამუშაოსთან არის დაკავშირებული, მღელვარება საკუთარი სქესობრივი შესაძლებლობების გამო, ურთიერთობის პრობლემები, დეპრესია, დანაშაულის განცდა და წარსულში გადატანილი სქესობრივი ტრავმების შედეგები. გთავაზობთ ქალთა შედარებით ფართოდ გავრცელებული სქესობრივი პრობლემების ჩამონათვალს, რომლებსაც სქესობრივი დისფუნქცია მოჰყვება.